မိူဝ်ႈဝႃး ဝၼ်းတီႈ 27 လိူၼ်ဢေႃးၵၢတ်ႉသ် ယၢမ်းၵၢင်ၼႂ် 10 မူင်းပၢႆ ၸုမ်းသိုၵ်းမၢၼ်ႈယိုတ်းမိူင်း တင်း ၸဝ်ႈၼႃႈတီႈပလိၵ်ႈ ၶဝ်ႈတီႉၺွပ်း ၵူၼ်းမိူင်းၶႄႇ ၸိူဝ်းၶဝ်ႈမႃးႁဵတ်းၵၢၼ်ၵျႃႊ ၽျႅၼ်ႉ ၼႂ်းၾၢႆႇႁူဝ်ၼႃး ပွၵ်ႉၵွင်းမူးတူင်ႈ ဝႃႈၼႆ။

ၵူၼ်းႁဵတ်းၵၢၼ်ၵျႃႊၽျႅၼ်ႉၸိူဝ်းၺႃးတီႉၺွပ်းၼၼ်ႉ ပဵၼ်ၸၢဝ်းၶိူဝ်းၶႄႇ ၵူၼ်းၸၢႆး 18 ၵေႃႉ၊ ၵူၼ်းမိူင်းမၢၼ်ႈ ၸၢဝ်းၶိူဝ်းမၢၼ်ႈ 5 ၵေႃႉ၊ ၼၢင်းယိင်း 8 ၵေႃႉၼႆ ႁွင်ႈၵၢၼ်သိုဝ်ႇၶၢဝ်ႇ သိုၵ်းမၢၼ်ႈ MOI ႁၢႆးငၢၼ်းဢွၵ်ႇဝႆႉၼင်ႇၼႆ။

လိူဝ်ၼၼ်ႉယင်းယိုတ်းဢဝ်လႆႈပႃး ၾူၼ်းၵူႈသႅၼ်းသႅၼ်း 422 လုၵ်ႈ၊ ၶွမ်ႊပိဝ်ႊတိူဝ်ႊ (ၶွမ်း) ALL In One – 18 လုၵ်ႈ၊ ၶွမ်ႊပိဝ်ႊတိူဝ်ႊသႅၼ်းယႂ်ႇ Desktop 20 လုၵ်ႈ လႄႈ ၶိူင်ႈသတႃးလိင်ႉ Starlink 2 ၸုမ်ႇ၊ ၶိူင်ႈၸႂ်ႉ ဢိၼ်ႊထိူဝ်ႊၼႅတ်ႊ Wifi 2 လုၵ်ႈ၊ ငိုၼ်းၶႄႇ 24500 ယႂၼ်ႊ၊ ၵႃးသႅၼ်း Lexus ၼိုင်ႈလမ်း လႄႈ ၵႃး Crown သွင်လမ်း၊ ရူတ်ႉၶိူင်ႈ 3 လမ်း ဢိၵ်ႇပႃး ၶိူင်ႈၸႂ်ႉၶူဝ်းတိုဝ်းၵူႈလွင်ႈလွင်ႈ ၸိူဝ်းၵဵဝ်ႇၶွင်ႈ ဝႃႈၼႆ။

ဝၼ်းတီႈ 26 ၼၼ်ႉသမ်ႉ ၶဝ်ႈတီႉၺွပ်းဢဝ် ၵူၼ်းၸၢဝ်းၶႄႇ 3 ၵေႃႉ ၸိူဝ်းႁဵတ်းၵၢၼ်ၵျႃႊၽျႅၼ်ႉယူႇ ၸဵင်ႇၸၢၼ်းဝၼ်းဢွၵ်ႇ ဝဵင်းမိူင်းယႆ ၾၢႆႇၸၢၼ်းဝၢၼ်ႈမၢၼ်ႉၽၢႆႇ မွၵ်ႈ 5000 မီႊတိူဝ်ႊၼၼ်ႉသေ ယိုတ်းဢဝ်လႆႈ ၶိူင်ႈၸႂ်ႉတိုဝ်း ၼႂ်းၵၢၼ်ၵျႃႊၽျႅၼ်ႉ ၸိူဝ်းပဵၼ်ၾူၼ်း၊ ၶွမ်ႊပိဝ်ႊတိူဝ်ႊ၊ ၶိူင်ႈသၻႃးလိင်ႉ ၶိူင်ႈ Wifi ၸဵမ်ၸိူဝ်းၼႆႉ ဝႃႈၼႆ။

လိူၼ်ဢေႃးၵၢတ်ႉသ်ၼႆႉ သိုၵ်းမၢၼ်ႈယိုတ်းမိူင်းၶဝ်ႈတီႉၺွပ်းဢဝ် ၵူၼ်းမိူင်းၶႄႇၸိူဝ်းႁဵတ်းၵၢၼ်ၵျႃႊၽျႅၼ်ႉ ယူႇၼႂ်းမိူင်းတႆးပွတ်းၸၢၼ်း တႃႇ 106 ၵေႃႉ၊ တၢင်းမိူင်းတႆးပွတ်းႁွင်ႇ ဝဵင်းမူႇၸေႊ လႄႈ ဝဵင်းမိူင်းယႆ 34 ၵေႃႉ။

ၵၢၼ်တီႉၺွပ်းၵူၼ်းႁဵတ်းၵၢၼ်ၵျႃႊၽျႅၼ်ႉၼႆႉ ဢမ်ႇၵွမ်ႉၵႃးသိုၵ်းမၢၼ်ႈၵူၺ်းတူင်ႉၼိုင် ၸုမ်းသိုၵ်းဝႃႉ၊ ၸုမ်းသိုၵ်းၶႄႇၵဝ်ႈၵၢင်ႉ လႄႈ ၸုမ်းယိပ်းၵွင်ႈၵၢင်ႇၸၢဝ်းၶိူဝ်း ၸိူဝ်းယူႇၸွမ်းလႅၼ်လိၼ် မိူင်းတႆး-မိူင်းၶႄႇ၊ မိူင်းယၢင်းၽိူၵ်ႇ-မိူင်းထႆး ၸိူဝ်းၼႆႉၵေႃႈ တူင်ႉၼိုင်ႁဵတ်းသၢင်ႈယူႇႁင်းၽႂ်မၼ်း။