ၼႂ်းၶၢဝ်းတၢင်း မိၼ်းဢွင်ႇလၢႆႇ ၶိုၼ်ႈပဵၼ်ၸွမ်ၸိုင်ႈသေ ၶွတ်ႇၽွတ်ႈၸုမ်းလူင်ပွင်ၸိုင်ႈယိုတ်းမိူင်းယဝ်ႉ တႄႇၽႅၼ်ၵၢၼ် လူင်းပိုၼ်ႉတီႈ ႁဵတ်းသၢင်ႈၼႃႈၵၢၼ် ႁိုင်ၶၢဝ်းတၢင်း 100 ဝၼ်းၼၼ်ႉ လိူၼ်မေႊၼႆႉ မၢၵ်ႇတႅၵ်ႇၼႂ်းဝဵင်းမူႇၸေႊ သွင်ပွၵ်ႈ ပဵၼ်ၶၢဝ်းၵၢင်ၶိုၼ်း တင်းသွင်ဝၼ်း ဝႃႈၼႆ။
မိူဝ်ႈဝႃးဝၼ်းတီႈ 25/5/2026 ယၢမ်းၵၢင်ၶိုၼ်းတဵင်ႈ မွၵ်ႈ 12 မူင်း သဵင်မၢၵ်ႇတႅၵ်ႇၵိုင်ႉၵၢင်ႉလင်ၶိုၼ်ႈမႃး ၼႂ်းဝဵင်းမူႇၸေႊ ႁဵတ်းႁႂ်ႈၵူၼ်းမိူင်းၸိူဝ်းယူႇၼႂ်းပိုၼ်ႉတီႈ တူၵ်းၸႂ်ၵူဝ် ၸဝ်ႈ ၼႃႈတီႈပလိၵ်ႈၶဝ်ၵေႃႈ ၸွမ်းသွၵ်ႈႁႃဢွင်ႈတီႈသဵင်မၢၵ်ႇတႅၵ်ႇလင်မႃးၼၼ်ႉယူႇ ၼႆယဝ်ႉ။
ၵူၼ်းမိူင်းပိုၼ်ႉတီႈ ၵေႃႉယူႇဝႆႉၼႂ်းဝဵင်းမူႇၸေႊ လၢတ်ႈၼႄတီႈ ၽူႈတွႆႇႁွၵ်ႈဝႃႈ “မိူဝ်ႈလဵဝ်ၼႆႉ ပလိၵ်ႈ တင်း သိုၵ်းၶဝ် ၵၢၼ်သုၵ်ႉဝႆႉယူႇ။ မိူဝ်ႈၶမ်ႈဝႃးၼႆႉ လႆႈငိၼ်းသဵင်မၢၵ်ႇတႅၵ်ႇ ဢမ်ႇႁူႉဝႃႈတႅၵ်ႇႁိမ်းလႂ် ၶဝ်တိုၵ်ႉၸွမ်းႁႃ ဢွင်ႈတီႈမၼ်းယူႇ။ ၵမ်ႈၼမ်ၵေႃႈဝႃႈ ပဵၼ် “အသံမှိုင်း” ၵူၺ်းၼႆယူႇဢေႃႈ” ဝႃႈၼႆ။
လႆႈႁူႉဝႃႈ မိူဝ်ႈပူၼ်ႉမႃး ဝၼ်းတီႈ 23/5/2026 ယၢမ်းၵၢင်ၶိုၼ်း မွၵ်ႈ 12 မူင်းၼၼ်ႉၵေႃႈ မၢၵ်ႇတႅၵ်ႇၵႂႃႇ ၼႂ်းပွၵ်ႉၼိူဝ် (ဟိုမွန်ရပ်ကွက်) သဵၼ်ႈတၢင်းၽႄၵမ်ႉၵေႃႇ (ကံ့ကော်လမ်းခွဲ) ပဵၼ်ၼႂ်းၵၢင်ဝဵင်းမူႇၸေႊ ၵမ်းသိုဝ်ႈသေတႃႉ ပဵၼ်မၢၵ်ႇသႅၼ်းဢၼ်ပွႆႇႁႂ်ႈလႆႈငိၼ်းသဵင်ၼၼ်ႉၵူၺ်းလႄႈ ဢမ်ႇတိူဝ်ႉမၢတ်ႇၵူၼ်း ဢမ်ႇမီးလွင်ႈလူႉသုမ်းသင် ၼႆ ၵူၼ်းမိူင်းပိုၼ်ႉတီႈ လၢတ်ႈၼင်ႇၼႆ။
မိူဝ်ႈလိူၼ်ဢေႇပရႄႇပူၼ်ႉမႃးၼႆႉ သိုၵ်းမၢၼ်ႈယိုတ်းမိူင်း ၸႂ်ႉတိုဝ်းႁိူဝ်းမိၼ်သိုၵ်းသေ တေႃႉသူင်ႇၵူၼ်း လၢႆႈၶႃႈႁၢပ်ႇၵၢၼ်ၶုၼ် ၸုမ်းလူင်ပွင်ၸိုင်ႈလႄႈ ၵူၼ်းသိုၵ်း ၶိုၼ်ႈၶိုၼ်ႈလူင်းလူင်း ၼိုင်ႈဝၼ်း ဢမ်ႇယွမ်း 4-5 လမ်း။
ယၢမ်းလဵဝ် ၾၢႆႇၸဝ်ႈၼႃႈတီႈပလိၵ်ႈ လႄႈ ၸုမ်းသိုၵ်းမၢၼ်ႈ တင်း ၸုမ်းပျီႇတူႉၸိတ်ႉ ၼႂ်းဝဵင်းမူႇၸေႊ ႁူမ်ႈၵၼ် ၸွမ်းတီႉၺွပ်းၵူၼ်းႁဵတ်းၵၢၼ်ၵျႃႊၽျႅၼ်ႉ ၸိူဝ်းပဵၼ်ၸုမ်းလဵၵ်ႉ ၸုမ်းယွႆႈၸိူဝ်းၼၼ်ႉဝႆႉယူႇ ၼႆယဝ်ႉ။
ၼႂ်းဝဵင်းမူႇၸေႊၼႆႉ မီးၸဝ်ႈၼႃႈတီႈပလိၵ်ႈ လႄႈ ၸုမ်းသိုၵ်းမၢၼ်ႈ တင်း ၸုမ်းပျီႇတူႉၸိတ်ႉ ၶဝ်ၵုမ်းၵမ် ပၼ်ႇၵၢၼ်ၽွင်းငမ်းဝႆႉသေတႃႉ ယွၼ်ႉပၵ်းပိူင်ၾိင်ႈမိူင်းဢမ်ႇႁူမ်ႇငမ်းၸႂ်ႉတိုဝ်းလႆႈတေႉတေႉလႄႈ ၵၢၼ်ၵႃႉၶၢႆယႃႈမဝ်းၵမ် တင်း ၵၢၼ်ၵျႃႊၽျႅၼ်ႉ ၵၢၼ်တေႃႇလွင်း ႁူင်းမိပ်ႇၼူတ်ႈ (မႄႈမွၵ်ႇယႃႈ) တင်း ၵၢၼ်လၵ်ႉၵၼ်ၸူၼ်ၵၼ် တီႉၺွပ်းၵၼ်သေယွၼ်း ၵႃႈထုတ်ႇတူဝ်ၶိုၼ်းၸိူဝ်းၼႆႉ တိုၵ်ႉလိူင်ႇၼမ်ႁႅင်းယူႇ ၼႆယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ