မိူဝ်ႈၼႆႉ ဝၼ်းတီႈ 27/5/2026 တႄႇယၢမ်းဝၢႆးဝၼ်း 1 မူင်း ၾႆးမႆႈ ႁူင်းၵၢၼ်ႁပ်ႉသိုဝ်ႉ လႄႈ ၵႃႉၶၢႆ မၢၵ်ႇမႆႉ (ခိုင်ပွဲရုံ) တီႈဝၢၼ်ႈလွႆလွမ်ႉ တၢင်းၶဝ်ႈဝဵင်းလႃႈသဵဝ်ႈ ၼႂ်းၼႃႈတီႈသိုၵ်းၶႄႇၵဝ်ႈၵၢင်ႉၵုမ်းၵမ် ။
ၵူၼ်းမိူင်းပိုၼ်ႉတီႈ ၵေႃႉယူႇဝဵင်းလႃႈသဵဝ်ႈ လၢတ်ႈၼႄတီႈၽူႈတွႆႇႁွၵ်ႈဝႃႈ “ၾႆးၼႆႉ တႄႇမႆႈၸဵမ်မိူဝ်ႈ 1 မူင်း တေႃႇထိုင် 2 မူင်းၵေႃႈ ၾႆးတိုၵ်ႉႁႅင်းယူႇ။ ဢမ်ႇမီးၽႂ်ၵႂႃႇၸမ်လႆႈ ၼႂ်းၵူဝ်ႇတွင်ႇၼၼ်ႉ မီးဝႆႉ ရူတ်ႉၶိူင်ႈဢၼ်မႂ်ႇ မၼ်းတင်းၼမ်ၼႆဢေႃႈ။ မိူဝ်ႈလဵဝ်ၼႆႉ ပႆႇႁူႉလႆႈဝႃႈ ၾႆးႁဵတ်းႁိုဝ်မႆႈ။ ၵႃးၶႄၾႆးၵေႃႈ မႃးႁူတ်းၼမ်ႉၸွႆႈယူႇ ဢမ်ႇၶႄလႆႈလႄႈ ပွၵ်ႈၶိုၼ်းမိူဝ်းၵႂႃႇယဝ်ႉ။ မိူဝ်ႈလဵဝ် ၵိုတ်းၵူၼ်းဝၢၼ်ႈ ႁိမ်းႁွမ်းၼၼ်ႉၵူၺ်း ၸွႆႈၵၼ်ႁူတ်း ၸွႆႈၵၼ်ဢဝ်ၶူဝ်းဢွၵ်ႇ ၶၢႆႉၶူဝ်းယူႇ ၶိူဝ်းယႂ်း” ဝႃႈၼႆ။
ၼႂ်းလိူၼ်မေႊၼႆႉ ၾႆးၵႆႉမႆႈ ႁၢၼ်ႉၶၢႆၵုၼ်ႇ ယွၼ်ႉၾႆးသူဝ်ႇလႃႇသျွတ်ႉ လႄႈ ၾႆးၾႃႉသျွတ်ႉ ၸိူဝ်းၼႆႉသေ မိူဝ်ႈဝၼ်းတီႈ 9/5/2026 ၼၼ်ႉၵေႃႈ ၶႅပ်းသူဝ်ႇလႃႇ လုၵ်ႉပဵၼ်ၾႆးသေ လၢမ်းမႆႈၵႂႃႇပႃးႁၢၼ်ႉၶၢႆၵုၼ်ႇ၊ မိူဝ်ႈဝၼ်းတီႈ 16/5/2026 ၼၼ်ႉၵေႃႈ ၾႆးၾႃႉသျွတ်ႉသေ မႆႈႁၢၼ်ႉၶၢႆၵုၼ်ႇၵူႈသႅၼ်းသႅၼ်း ၼႂ်းၵၢင်ဝဵင်းလႃႈသဵဝ်ႈ ထိုင်တီႈမႆႈၵႂႃႇပႃး ၵႃးသွင်လမ်း ရူတ်ႉၶိူင်ႈ သွင်လမ်း ၼႆယဝ်ႉ။
ယၢမ်းလဵဝ် ၾိင်ႈၾႃႉဢမ်ႇမႅၼ်ႈၸွမ်းၶၢဝ်း ပေႃးၶၢဝ်းမႆႈၵေႃႈႁွတ်ႉႁႅင်းလူၼ်ႉလိူဝ်လႄႈ ထုၵ်ႇလီဢွၼ်ၵၼ် ၾၢင်ႉၽေးၾႆးလီငၢမ်းယူႇ။
ပိူဝ်ႈတႃႇလွတ်ႈၽေးၾႆးၼႆႉ ပေႃးတေဢွၵ်ႇႁိူၼ်းၵႂႃႇတၢင်းၼွၵ်ႈၸိုင် ၵိုင်ႇလီမွတ်ႇၾႆး၊ ထွၼ်သၢႆၾႆးၵူႈသဵၼ်ႈ ထွၼ်သၢႆႁႅင်းၾူၼ်ႊ သၢႆထႅမ်ႁႅင်းပႅတ်ႊထရီႊၸိူဝ်းၼႆႉၵူႈဢၼ် လီ ငၢမ်းယဝ်ႉၸင်ႇဢွၵ်ႇႁိူၼ်းၼႆ ၸဝ်ႈႁၢၼ်ႉၶၢႆၵုၼ်ႇယွႆႈ ၼႂ်းဝဵင်းလႃႈသဵဝ်ႈ ပၼ်ၾၢင်ႉ လၢတ်ႈၼင်ႇၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ