မိူဝ်ႈၶမ်ႈဝႃးဝၼ်းတီႈ 12/07/2026 ယၢမ်းတဵင်ႈၶိုၼ်း ၾႆးၵိုင်ႉၵၢင်ႉလုၵ်ႉမႆႈတီႈႁၢၼ်ႉတၢင်းၵိၼ်ၵၢင်ၶိုၼ်း “ႁူင်းပီႊယႃႊ ၼ ရၢတ်ႉၽရၢဝ်ႉ” တီႈဝဵင်းလူင်ၵုင်းထဵပ်ႈ မိူင်းထႆးၼၼ်ႉ ၵူၼ်းတၢႆ 27 ၵေႃႉ မၢတ်ႇၸဵပ်း 60 ပၢႆ ဢၼ်ႁၢႆဝႆႉၵေႃႈမီး။

ၶၢဝ်းယၢမ်း 11 မူင်း 50 မိၼိတ်ႉ တဵင်ႈၶိုၼ်းဝၼ်းတီႈ 12/07/2026 ၾႆးၵိုင်ႉၵၢင်ႉလုၵ်ႉမႆႈသေ တႅၵ်ႇၽူင်ႉၼႂ်းႁူင်းၵိၼ်ၵျေႃႇ โรงเบียร์ ณ.ลาดพร้าว တီႈႁိမ်းသဵၼ်ႈတၢင်း ရၢတ်ႉၽရၢဝ်ႉ 1 ၶႂႅင်ၸွမ်ႊၽူၼ်ႊ ၶဵတ်ႇ ၵျတုၵျၢၵ်ႇ ဝဵင်းလူင်ၵုင်းထဵပ်ႈၸိုင်ႈထႆး။ ၾႆးမႆႈယဝ်ႉမွၵ်ႈ 5 မိၼိတ်ႉ ရူတ်ႉၶႄၾႆးထိုင်မႃးတီႈၾႆးမႆႈၼၼ်ႉ ၾႆးသမ်ႉပေႃးလုၵ်ႉလၢမ်းမႆႈတူဝ်ႈႁၢၼ်ႉ ပဵဝ်ၾႆးပုင်ႈဢွၵ်ႇမႃးၵူႈႁူးၽၵ်းတူလႄႈ ႁူးလႅင်း ႁၢၼ်ႉ။ ၵူၼ်းၼႂ်းႁၢၼ်ႉ ႁွင်ႉႁွင်ႉႁႆႈႁႆႈ ဢွၼ်ၵၼ်ပၢႆႈတႆၢလႅၼ်ႈဢွၵ်ႇႁၢၼ်ႉ၊ မၢင်ၵေႃႉၾႆးမႆႈၸွမ်းတူဝ်ၸွမ်းႁူဝ် သိူဝ်ႈၶူဝ်းယွၵ်းယွႆ။

ၸဝ်ႈၼႃႈတီႈၾၢႆႇၶႄၾႆးလႆႈၸႂ်ႉၶၢဝ်းယၢမ်းမွၵ်ႈ 30 မိၼိတ်ႉၶႄၾႆးႁူတ်းၾႆးမွတ်ႇသေ ၸင်ႇဢဝ်ၵူၼ်းၸိူဝ်းလွတ်ႈတၢင်းတၢႆၸိူဝ်းၼၼ်ႉဢွၵ်ႇမႃးလႆႈ သူင်ႇယူတ်းယႃတူဝ်ဝႆႉတီႈႁူင်းယႃ။

သိုဝ်ႇၶၢဝ်ႇထႆး ၶၢဝ်ႇသူတ်ႇ – ထႆးရတ်ႉ ၸိူဝ်းၼႆႉဢွၵ်ႇဝႆႉဝႃႈ – ဢၼ်ပၢႆႈဢွၵ်ႇပူၼ်ႉလွတ်ႈတၢင်းတၢႆမီးဢေႇၼႃႇ။ ၵူၼ်းထူပ်းၽေးၾႆး မီး 90 ၵေႃႉ။ တၢႆ 27 ၵေႃႉ ပဵၼ်ၵူၼ်းၸၢႆး 9 ၵေႃႉ ၼၢင်းယိင်း 18 ၵေႃႉ။ၵမ်ႈၼမ် ၵႅၼ်ႉၵႂၼ်းတၢႆ ။ ၼႂ်းဢၼ်တၢႆၵႂႃႇ ၸိူဝ်းၼၼ်ႉဢၼ်ႁူႉၸၵ်းၸိုဝ်ႈမီး 6 ၵေႃႉၵူၺ်း။

ၵူၼ်းၸိူဝ်းလူႉတၢႆၵႂႃႇၸိူဝ်းၼၼ်ႉ ၵမ်ႈၼမ် ဢမ်ႇၸၢင်ႈႁူႉလႆႈဝႃႈပဵၼ်ၽႂ် ။ ဢမ်ႇမီးသၢၵ်ႈသေႇ လၵ်းထၢၼ် သင်။ ယွၼ်ႉၺႃးၾႆးမႆႈဝႆႉထိုင်တီႈဢမ်ႇတွင်းၼႃႈတွင်းတႃလႆႈ။ ၵွပ်ႈၼႆ လုၵ်ႈလၢင်းၵူၼ်းႁိူၼ်းၽႂ်ႁၢႆဝႆႉၵေႃႈ ႁႂ်ႈဢွၼ်ၵၼ်ၵႂႃႇၸႅင်ႈတီႈႁူင်းပလိၵ်ႈ ၽႁူၼ်ယူဝ်ႊထိၼ်ႊ ဝႆးဝႆး ၾၢႆႇပလိၵ်ႈပိုၼ်ၽၢဝ်ႇဝႆႉၼင်ႇၼႆ။

ၵူၼ်းဢၼ်ၺႃးၾႆးမႆႈ လႆႈမၢတ်ႇၸဵပ်းထုၵ်ႇႁၢမ်သူင်ႇႁူင်းယႃ မီး 63 ၵေႃႉ။ ပဵၼ်ၵူၼ်းၸၢႆး 21 ၵေႃႉ ၼၢင်းယိင်း 26 ၵေႃႉ၊ ဢၼ်ပႆႇၸၢင်ႈယိုၼ်ယၼ်ဝႃႈပဵၼ်ယိင်းႁႃႉၸၢႆး ၼၼ်ႉ 16 ၵေႃႉ မၢတ်ႇၸဵပ်းႁၢဝ်ႈႁႅင်း 8 ၵေႃႉ။ ငဝ်းလၢႆးလီလႆႈမႆႈၸႂ် သိုဝ်ႇၶၢဝ်ႇထႆးရတ်ႉ – ဢမရိၼ်ႊ ပိုၼ်ၽၢဝ်ႇဝႆႉၼင်ႇၼႆ။

ၾႆးမႆႈႁၢၼ်ႉတၢင်းၵိၼ်ထိုင်တီႈမီးၵူၼ်းလူႉတၢႆၼမ်ၵမ်းၼႆႉ ပဵၼ်ယွၼ်ႉသင်- ၾႆးတႄႇမႆႈတီႈလႂ်ၼႆၼၼ်ႉ ၾၢႆႇၸဝ်ႈၼႃႈတီႈတိုၵ်ႉၸွပ်ႇတူၺ်းယူႇ ယင်းပႆႇပိုၼ်ၽၢဝ်ႇဢွၵ်ႇမႃးဝႃႈႁိုဝ် ။ ၼႂ်းၵူၼ်းမၢတ်ႇၸဵပ်းလူႉတၢႆၼၼ်ႉ ပႃးႁႅင်းၵၢၼ်တႆး/မၢၼ်ႈ ၵႃႈႁိုဝ်၊ ၼႂ်းၵူၼ်းမႃးၵိၼ်ၵျေႃႇၼၼ်ႉၵေႃႈ ပႃးၵူၼ်းမိူင်းထႆးလၢႆၵေႃႉ ၵူၼ်းၼွၵ်ႈမိူင်းလၢႆၵေႃႉၼႆၸိူဝ်းၼႆႉၵေႃႈ ပႆႇၸၢင်ႈႁူႉလႄႈပႆႇၸၢင်ႈယိုၼ်ယၼ်ပႃး။

လိူဝ်ၼၼ်ႉၸဝ်ႈၼႃႈတီႈ တေၵူတ်ႇထတ်းတူၺ်းပႃးႁူင်းၵိၼ်ၵျေႃႇမူၼ်ႈၸႂ်ၵၢင်ၶမ်ႈၸိူဝ်းမီးႁိမ်းႁွမ်းၼၼ်ႉထႅင်ႈ 14 တီႈ ။ ၸွင်ႇႁဵတ်းဝႆႉပၼ်တႃႇလွတ်ႈၽေး လီငၢမ်း ၼႆၸိူဝ်းၼႆႉ ဝႃႈၼႆ။

တီႈမိူင်းထႆးၼႆႉ လွင်ႈၾႆးမႆႈႁူင်းၵိၼ်ၵျေႃႇၵၢင်ၶိုၼ်းသေႁဵတ်းႁႂ်ႈၵူၼ်းတၢႆၼမ်ၼႆႉ ပွၵ်ႈၼႆႉပဵၼ်ပွၵ်ႈ 3 ယဝ်ႉ။

ၽွင်းပီ 2009 လိူၼ်တီႊသႅမ်ႊပိူဝ်ႊ ဝၼ်းတီႈ 31 သူင်ႇပီၵဝ်ႇႁပ်ႉပီမႂ်ႇၼၼ်ႉၵေႃႈ ယွၼ်ႉၸုတ်ႇမူၵ်ႇၾႆးၼႂ်းႁၢၼ်ႉၵိၼ်ၵျေႃႇ “သၢၼ်ႊတီႊၵႃႉ ၽၢပ်ႇ” သေ ႁဵတ်းႁႂ်ႈၾႆးမႆႈႁၢဝ်ႈႁႅင်း ထိုင်တီႈၵူၼ်းတၢႆ 67 ၵေႃႉ။

ထိုင်မႃးပီ 2022 ဝၼ်းတီႈ 5 လိူၼ်ဢေႃႊၵတ်ႉသ် ၼၼ်ႉ ၾႆးမႆႈတီႈႁၢၼ်ႉတၢင်းၵိၼ် “မၢဝ်ႊထဵၼ်ႊ ပီႊ ၽၢပ်ႇ” တီႈၼၼ်ႉၵေႃႈ ၵူၼ်းတၢႆ 22 ၵေႃႉ။

ၵမ်းၼႆႉသမ်ႉဝၼ်းတီႈ 12 လိူၼ်ၵျူႊလၢႆႊ 2026 ၾႆးမႆႈတီႈ “ႁူင်းပီႊယႃႊ ၼ ရၢတ်ႉၽရၢဝ်ႉ” ၵူၼ်းတၢႆ 27 ၵေႃႉ။

သိုဝ်ႇၶၢဝ်ႇထႆး တႅမ်ႈတၢင်ႇပိုၼ်ၽၢဝ်ႇဝႆႉဝႃႈ ဢၼ်ပဵၼ်ၵႂႃႇမိူဝ်ႈဢွၼ်တၢင်းၸိူဝ်းၼၼ်ႉတႄႉ ပဵၼ်ယွၼ်ႉၽၵ်းတူပၢႆႈၽေး ၼႂ်းႁူင်းၵိၼ်ၵျေႃႇၸိူဝ်းၼၼ်ႉ ႁဵတ်းဝႆႉဢမ်ႇၶႅမ်ႉ၊ ဢမ်ႇၸၢင်ႈပိုတ်ႇလႆႈငၢႆႈငၢႆႈ ၽွင်းလူဝ်ႇပၢႆႈ ၵွပ်ႈၼႆလႄႈၸင်ႇႁဵတ်းႁႂ်ႈၵူၼ်းတၢႆယွၼ်ႉၽေးၾႆးၼမ် – ဝႃႈၼႆ။

တေႃႇထိုင်မိူဝ်ႈၼႆႉ 13/07/2026 ယၢမ်းၵၢင်ၼႂ် ၼႂ်ၼႆႉ ႁၢၼ်ႉတၢင်းၵိၼ်ၵၢင်ၶိုၼ်း “ႁူင်းပီႊယႃႊ ၼ ရၢတ်ႉၽရၢဝ်ႉ” တီႈဝဵင်းလူင်ၵုင်းထဵပ်ႈၼၼ်ႉ မိုဝ်းထိုဝ်ၵူၼ်းမႃးၵိၼ်တၢင်းၵိၼ် ၸိူဝ်းၵိုတ်းဝႆႉၼႂ်းႁၢၼ်ႉသေ ၾႆးဢမ်ႇတၼ်းမႆႈၺႃးၼၼ်ႉ တိုၵ်ႉမီးၵူၼ်းႁူႉၸၵ်းမိုတ်ႈၵိုဝ်း ၵပ်းသိုပ်ႇထူဝ်းၶဝ်ႈမႃးၸူးယူႇတိၵ်းတိၵ်း။ တူဝ်ၸဝ်ႈမိုဝ်းထိုဝ်တႄႉ ၵႂႃႇမီးတီႈႁူင်းယႃယဝ်ႉႁိုဝ် မီးႁူင်းယႃတီႈလႂ် ဢမ်ႇၼၼ် ၸွင်ႇတိုၵ်ႉမီးသၢႆၸႂ်ယူႇ၊ လူႉတၢႆၵႂႃႇၸွမ်းၼႂ်းၾႆးယဝ်ႉႁိုဝ်ၼႆ ၽႂ်ၵေႃႈဢမ်ႇႁူႉ ဢမ်ႇၸၢင်ႈပၼ်ၵႂၢမ်းတွပ်ႇ။

ဢၢင်ႈဢိင်- Thairath- Khao Sod- E Jan- กรรมกรข่าว