ဝၼ်းတီႈ 12/08/2026 ၼႆႉ မိူင်းထႆးမၵ်းမၼ်ႈဝႆႉပဵၼ် ဝၼ်းမႄႈ ။ ပဵၼ်ဝၼ်းၵိူတ်ႇၸဝ်ႈၼၢင်းႁေႃၶမ်းလူင် ၼၢင်းၶၢင်းႁူဝ်တူၼ်ထူၼ်ႈ 9 ဢၼ်ၸၢမ်ႇပူႈၼွၼ်းၽေးၵႂႃႇယဝ်ႉၼၼ်ႉ။

ယွၼ်ႉပိူဝ်ႈမၼ်းၸဝ်ႈႁၵ်ႉ ၶႃႈဝၢၼ်ႈၵူၼ်းမိူင်းထႆး ၼင်ႇလုၵ်ႈဢူၵ်းလုၵ်ႈၸႂ်မၼ်းဢွၵ်ႇဢွၵ်ႇသေ ႁဵတ်းဝႆႉပၼ်တႃႇယူႇတႃႇၵိၼ် ပူၵ်းပွင်ဝႆႉပၼ် ၵူၼ်းမိူင်းၵူႈဝၢၼ်ႈၵူႈဢိူင်ႇ ၵူႈၸွၵ်ႉၵူႈငွၼ်ႈ ႁႂ်ႈမီးၸၢတ်ႈပၢၼ်ဢၼ်လီ၊ ဢၼ်ၵတ်းယဵၼ် ၶိုၼ်ႈယႂ်ႇလွတ်ႈလႅဝ်း။ ၼွၵ်ႈလိူဝ်ၵူၼ်းမိူင်းယဝ်ႉ – ၸိူဝ်းပဵၼ်ၼူၵ်ႉၼူၵႃၵႆႇ သတ်ႉတဝႃႇၼိူဝ်လိၼ်ၼႂ်းၼမ်ႉ ဢိၵ်ႇတၢင်းၵၢင်ႁၢဝ်ၵေႃႈ ၸဝ်ႈၼၢင်းႁေႃၶမ်းႁၵ်ႉ။ မၼ်းၸဝ်ႈသင်ႇယူႇတႃႇသေႇ ႁႂ်ႈၵူၼ်းမိူင်းႁၵ်ႉသႃသိင်ႇဝႅတ်ႉလွမ်ႉ၊ ႁႂ်ႈပွႆႇၼူၵ်ႉပွႆႇၼူ။ ဢမ်ႇၵႃးၸိူဝ်းမီးတူဝ်မီးၸႂ်ၵူၺ်း ၸဝ်ႈၼၢင်းလူင်ႁၵ်ႉပႃး တူၼ်ႈမႆႉတူၼ်ႈတွၵ်ႇ မွၵ်ႇမၢၵ်ႇႁၢၵ်ႈႁူဝ် -ထိူၼ်ႇပႃႇႁူၺ်ႈလွႆ ၊ ၸဝ်ႈၼၢင်းႁၢမ်ႈတႅပ်းမႆႉယႃႉပႃႇထိူၼ်ႇ။ ႁႂ်ႈၽုၵ်ႇတူၼ်ႈမႆႉတႅၼ်းတၢင်ၶိုၼ်းတႃႇသေႇ။ ၵွပ်ႈၼႆလႄႈ မိူင်းထႆး ၸင်ႇဝႆႉၵုင်ႇၵုၼ်းမုၼ်ငဝ်းၸဝ်ႈၼၢင်းႁေႃၶမ်းလူင်ယႂ်ႇၼမ်သေ ဝၼ်းၵိူတ်ႇၸဝ်ႈၼၼ်ႉ မၵ်းမၼ်ႈဝႆႉပဵၼ်ဝၼ်းမႄႈ။ သၽႃႇဝၶွင်မႄႈၼႆႉ မီးမုၼ်ၵုၼ်းဢၼ်ယႂ်ႇ ဢမ်ႇမီးသင်မႃးတႅၵ်ႈၼိူင်းလႆႈ တွၼ်ႈတႃႇလုၵ်ႈလၢင်း။

ပေႃးပဵၼ် မိူင်းထႆးတႄႉ ဝၼ်းမႄႈၼႆႉ ပဵၼ်ဝၼ်းပိၵ်ႉၵၢၼ်လိုဝ်ႈၵၢၼ် ပဵၼ်တၢင်းၵၢၼ်။ ၵွပ်ႈၼႆ ပေႃးဝၼ်းမႄႈမႃး လုၵ်ႈလၢင်းလၢၼ်လိၼ် ၸိူဝ်းၵႂႃႇႁဵတ်းၵၢၼ်တၢင်ႇတီႈတၢင်ႇဝဵင်း ဢွၼ်ၵၼ်ပွၵ်ႈၶိုၼ်းႁိူၼ်းယေး မိူဝ်းႁႃမႄႈ။ ၵၼ်ႇတေႃးမႄႈ၊ ၵွတ်ႇမႄႈ ၊ ႁွမ်ၵႅမ်ႈမႄႈ၊ မွၵ်ႇလၢတ်ႈ ဝႃႈႁၵ်ႉမႄႈ။

တွၼ်ႈတႃႇပီႈၼွင်ႉတႆးႁဝ်းၵေႃႈ ပႆႇမီးဢႃႇၼႃႇၽွင်းငမ်း ပႆႇမီးဝၢၼ်ႈမိူင်း ပၵ်းပိူင် လူင်ပွင်ၸိုင်ႈတူဝ်ၵဝ်ႇလႄႈ ဝၼ်းပေႃႈ ဝၼ်းမႄႈ ၼႆၼၼ်ႉပႆႇမီးသင်တႃႇဢဝ်မႃးတမ်းသေမၵ်းမၼ်ႈဝႆႉ။ ၵူၺ်းၵႃႈပေႃးမႃးတူၺ်းလွင်ႈႁၵ်ႉမႄႈၼႆတႄႉ လႅပ်ႈတေဢမ်ႇယွမ်းၽႂ် ၸၢဝ်းၶိူဝ်း လႂ်ၼင်ႇၵဝ်ႇ။

ႁူမ်ႈဝႃႈမိူင်းတႆးႁဝ်းဢမ်ႇလႆႈမၵ်းမၢႆဝႆႉဝႃႈ “ဝၼ်းမႄႈ” ၼႆၵေႃႈ ယုမ်ႇယမ်ဝႃႈ ၼႂ်းၸႂ်ႁဝ်းၵူႈဝၼ်းၼႆႉ တိုၼ်းပဵၼ်ဝၼ်းမႄႈယူႇယဝ်ႉ။ ၵွပ်ႈဝႃႈၼႂ်းမုင်ႉႁေႃႁိူၼ်းတႆးႁဝ်းတိုၼ်းယူႇႁူမ်ႈၵၼ်ပဵၼ်ၼႃႈႁိူၼ်း လဵဝ်ၵၼ်။

ၵၢပ်ႈပၢၼ်မိူဝ်ႈလဵဝ်ၼႆႉ ၵွပ်ႈဝႃႈလုၵ်ႈတဝ်ႈလဝ်ႇလၢၼ် ဢွၵ်ႇၵႂႃႇႁဵတ်းၵၢၼ်တၢင်ႇဝၢၼ်ႈတၢင်ႇမိူင်း။ ပိူင်လူင်ၵႂႃႇမိူင်းထႆး။ ၼႆလႄႈပေႃးထိုင်မႃး ဝၼ်းမႄႈမိူင်းထႆးၼႆၵေႃႈ ဢွၼ်ၵၼ်ၾၢၵ်ႇၵႂၢမ်းႁၵ်ႉထိုင်မႄႈ သိုပ်ႇၾူၼ်ႊၸူးမႄႈတီႈႁိူၼ်း၊ သူင်ႇၶူဝ်းၶွင်ငိုၼ်းတွင်းပၼ်မႄႈ။

ဝၢႆးသေမီးပၢင်တိုၵ်း သိုၵ်းသိူဝ် ႁၢဝ်ႈႁႅင်းၼႂ်းမိူင်းတႆးသေ ပေႃႈမႄႈဢၼ်ယူႇ ၼႂ်းမိူင်း တႆးၵေႃႈ ဢမ်ႇမီးတီႈပိုင်ႈတီႈဢိင်။ မၢင်ၸိူဝ်း လႆႈပၢႆႈၶဝ်ႈမႃးႁႃလုၵ်ႈတဝ်ႈလဝ်ႇလၢၼ်ဢၼ်ႁဵတ်းၵၢၼ်ယူႇ ၼႂ်းမိူင်းထႆး တင်းၼမ်တင်းလၢႆ – ပေႃးဝၼ်းလိူၼ်လပ်းလိူၼ်မူၼ်းၼႆ တေလႆႈႁၼ်ၵူၼ်းထဝ်ႈယိင်းထဝ်ႈၸၢႆး ၼွၼ်းဝတ်ႉၼွၼ်းဝႃး ထိုဝ်သိလ် ၵမ်ထမ်း မၢင်ဝတ်ႉမီးၼပ်ႉႁူဝ်သိပ်း မၢင်ဝတ်ႉမီးၼပ်ႉႁူဝ်ပၢၵ်ႇ။လႄႈ ဢမ်ႇဝႃႈ ၵူၼ်းၼုမ်ႇၵူၺ်း ယၢမ်းလဵဝ် ၵူၼ်းထဝ်ႈပေႃႈမႄႈတႆးႁဝ်းၵေႃႈၸင်ႇပွင်ႇၸႂ်လွင်ႈၼႆႉမႃး။

မိူင်းထႆးၼႆႉ ၵွၼ်ႇၼႃႇတေမၵ်းမၼ်ႈ ဝၼ်းတီႈ 12/08/2026 ပဵၼ်ဝၼ်းမႄႈၼႆႉ ယၢမ်ႈႁဵတ်းပွႆး“ဝၼ်းမႄႈႁႅင်ႇၸၢတ်ႈ” ၼႆၼႂ်းဝၼ်းတီႈ 10 လိူၼ်မၢတ်ႉလႄႈ ဝၼ်းတီႈ 15 လိူၼ်ဢွၵ်ႉထူဝ်ႊၿိူဝ်ႊ။ ႁွင်ႈၵၢၼ်လူင်ၾၢႆႇပၢႆးယူႇလီ လႆးၸတ်းႁဵတ်းပွၵ်ႈၵမ်းႁႅၵ်ႈမိူဝ်ႈပီ 1943 တီႈသူၼ်ဢမ်ႊၽွၼ်ႊ ။ ဝၢႆးၼၼ်ႉယွၼ်ႉဝႃႈပဵၼ်သိုၵ်းလုမ်ႈၾႃႉပွၵ်ႈၵမ်း 2 လႄႈ လႆႈၵိုတ်းၵႂႃႇသေ ထိုင်မႃးပီ 1950 ၸင်ႇၶိုၼ်းႁဵတ်းပွႆးဝၼ်းမႄႈ ၼႂ်းဝၼ်းတီႈ 15 လိူၼ်ဢေႊပရိူဝ်ႊလ် ။

သိုပ်ႇတေႃႇမႃးယွၼ်ႉလူၺ်ႈႁွင်ႈၵၢၼ်လူင် ၾၢႆႇၾိင်ႈငႄႈႁိတ်ႈႁွႆး လႆႈၵိုတ်းလိုဝ်ႈၵၢၼ်ၵႂႃႇလႄႈ သမႃးၶူမ်းၶူး ၶႅတ်ႊတလိၵ်ႊ (Catholic Teachers Association) ၸိုင်ႈထႆး ၸင်ႇလႆႈၸတ်းဝၼ်းမႄႈ ၼႂ်းဝၼ်းတီႈ 4 လိူၼ်ဢွၵ်ႉထူဝ်ႊၿိူဝ်ႊ 1972 ထႅင်ႈ ၵမ်းၼိုင်ႈ ။

ထိုင်မႃး ပီ 1976 ၸုမ်းၵေႃၵမ်ၵၢၼ်ၶပ်းၶိုင်ၵၢၼ်သၽႃးတူင်ႇဝူင်းၵူၼ်း မိူင်းထႆး ၸင်ႇဢဝ်ဝၼ်းၵိူတ်ႇ ၸဝ်ႈၼၢင်းလူင် ၼၢင်းၶၢင်းႁူဝ်ၸဝ်ႈႁေႃၶမ်းတူၼ်ထူၼ်ႈၵဝ်ႈ ၸဝ်ႈၼၢင်းသိရိၵိတ်ႇ ဝၼ်းတီႈ 12 လိူၼ်ထူၼ်ႈ 8 မႃးပဵၼ်ဝၼ်းမႄႈ မိူင်းထႆး။

ၵွပ်ႈၼႆ ဝၼ်းမႄႈၼႆႉ ယွၼ်းသူးႁႂ်ႈၵူႈၵေႃႉ ၶုၵ်းၸႂ်လႆႈမႄႈၸဝ်ႈၵေးၸူးၽႂ်မၼ်းသေ ပေႃးမီးၶၢဝ်းယၢမ်းမိူဝ်ႈလႂ်ၵေႃႈ ႁႂ်ႈလႆႈႁႃတိုဝ်ႉတၢင်းတွပ်ႇတႅၼ်းၵေးၸူးမႄႈ သေၵမ်း ။