ယိူင်းဢၢၼ်းတႃႇပဵၼ်လွင်ႈႁူမ်ႇလူမ်ႈၵူၼ်းမိူင်း ၊ တႃႇႁႂ်ႈၵႃႈၶွၼ်ႇၵူၼ်းပိုၼ်ႉမိူင်း တေလႆႈပဵၼ်တႃႇၵူၼ်းပိုၼ်ႉမိူင်းၶိုၼ်းၵူၺ်းၼႆသေ ၸုမ်းႁၵ်ႉၸိူဝ်ႉၸၢတ်ႈမိူင်းထႆး တူင်ႉၼိုင်ၵဵပ်းလၢႆး မိုဝ်းၵူၼ်းမိူင်းတႃႇ 1 သႅၼ်ၵေႃႉ တႃႇတေယိုၼ်ႈတၢင်ႇၸူးလူင်ပွင်ၸိုင်ႈထႆး “ႁႂ်ႈလိုပ်ႈႁႅင်းၵၢၼ်ၸိူဝ်းပဵၼ်မႄႈမၢၼ်း ပွၵ်ႈၶိုၼ်းဝၢၼ်ႈၽႂ်မိူင်းမၼ်း မိူဝ်းၵိူတ်ႇလဵင်ႉလုၵ်ႈလီငၢမ်းယဝ်ႉ ၸင်ႇမႃးႁဵတ်းၵၢၼ်ၶိုၼ်းမိူင်းထႆး” – ဝႃႈၼႆ။
တႄႇႁူဝ်လိူၼ်ၵျူႊလၢႆႊၼႆႉမႃး “တေႉ ဢႃၶျီဝ” ၸၢႆးထႆး ႁူဝ်ၼႃႈၸုမ်း “ၵူၼ်းထႆးမႆႉထူၼ်း” ၼၼ်ႉ တႄႇတူင်ႉၼိုင် ၵဵပ်းလၢႆးမိုဝ်းၵူၼ်းမိူင်းထႆး တႃႇၼိုင်ႈသႅၼ်ၵေႃႉ – တႃႇႁႂ်ႈပဵၼ်ႁႅင်း ၵမ်ႉထႅမ် တႃႇသူၼ်းဢီးၾၢႆႇပၵ်းပိူင်မၢႆမီႈ ႁဵတ်းဢွၵ်ႇမၢႆမီႈမႂ်ႇတႃႇ လိုပ်ႈႁႅင်းၵၢၼ် မႄႈမၢၼ်း ပွၵ်ႈၶိုၼ်းမိူင်း ၽႂ်မၼ်း ။
မၼ်းၸၢႆးလၢတ်ႈတီႈသိုဝ်ႇၶၢဝ်ႇထႆး လႄႈ တၢင်ႇၼိူဝ်ၼႃႈ သိုဝ်ႇၼႅင်ႈသၢၼ်သုၼ်ႇတူဝ်မၼ်းၸၢႆးဝႃႈ – “ ၶႂ်ႈၸႅၵ်ႇယႅၵ်ႈၶိူဝ်းၵူၼ်းလႄႈ ၸႅၵ်ႇၼႃႈလဵၵ်ႉၼႃႈယႂ်ႇတႄႉဢမ်ႇၸႂ်ႈ ။ ယိူင်း ဢၢၼ်းတႃႇႁၵ်ႉသႃ ငိုၼ်းတွင်းၶွၼ်ႇၽၼ်ႇတႃႇဢၼ်ၵူၼ်းမိူင်းထႆးသႂ်ႇဝႆႉၼၼ်ႉ ႁႂ်ႈလႆႈပဵၼ်တႃႇၵူၼ်းမိူင်းထႆးၸၢမ်ႇပူၺ်ႈၶိုၼ်း။ ၽိူဝ်ႇတေပၼ်ၼၢင်းယိင်းတၢင်ႇမိူင်းမႃးၵိူတ်ႇလဵင်ႉလုၵ်ႈၼႂ်းမိူင်းထႆးသေ ႁႂ်ႈလူင်ပွင်ၸိုင်ႈထႆးၸွႆႈလဵင်ႉလူ ပူၵ်းပွင်လုၵ်ႈၶဝ်ၼၼ်ႉ တႃႉဢဝ်ငိုၼ်းတွင်းၵႃႈၶွၼ်ႇၸိူဝ်းၼၼ်ႉၶိုၼ်းမႃးၸႂ်ႉ တႃႇပူၵ်းပွင်ၵူၼ်းမိူင်းထႆး၊ ဢဝ်မႃးထႅမ်ပၼ်တႃႇ ငိုၼ်းလိူၼ် ၶႃႈႁၢပ်ႇၵၢၼ်ၶုၼ်ၼႂ်းမိူင်းထႆး ႁႂ်ႈပေႃးၵုမ်ႇထူၼ်ႈပေႃးၸႂ်ႉပေႃးၵိၼ်၊ ႁႂ်ႈၵူၼ်းမိူင်းထႆးယူႇငၢႆႈလူမ်ၸႂ် ၼႂ်းငဝ်းလၢႆးပၢႆးမၢၵ်ႈမီးတူၵ်းဝၼ်းမိူဝ်ႈၼႆႉ။ လႄႈၸင်ႇတေမီးၵၢၼ်တူင်ႉ ၼိုင် 2 ဢၼ်ၵဵဝ်ႇၵပ်းႁႅင်းၵၢၼ်ယၢၼ်မိူင်း။ လူဝ်ႇႁဵတ်းပၵ်းပိူင်မႂ်ႇတႅတ်ႈတေႃး လူဝ်ႇယိူင်ႈတၢင်ႇၸိုင်ႈမိူင်းၼႂ်းလုမ်ႈၾႃႉၽွင်ႈ” ဝႃႈၼႆ။
ၵၢၼ်တူင်ႉၼိုင် 2 ဢၼ် ဢၼ် “တေႉ ဢႃၶျီဝ” လၢတ်ႈၵႂႃႇၼၼ်ႉတႄႉ 1- တႃႇသူင်ႇႁႅင်းၵၢၼ်ယၢၼ်မိူင်းၸိူဝ်းပဵၼ် မႄႈမၢၼ်းပွၵ်ႈၶိုၼ်းမိူင်းၽႂ်မၼ်း။ 2- တႃႇလိုပ်ႈၵူၼ်းၵူၼ်းထဝ်ႈ ၵူၼ်းပဵၼ်လႄႈ လုၵ်ႈလၢၼ်ၸိူဝ်းမႃးပိုင်ႈဢိင် ႁႅင်းၵၢၼ်ယၢၼ်မိူင်းသေ ယူႇသဝ်းယူႇမိူင်းထႆးၼႆႉ -ၸဵမ်ၸိူဝ်းၼႆႉ။ ယွၼ်ႉဝႃႈ 2 လွင်ႈၼႆႉ ႁဵတ်းႁႂ်ႈပဵၼ်ႁၢပ်ႇၼၵ်းလူင်ဢၼ်ၼိုင်ႈဢၼ် မိူင်းထႆးတေလႆႈႁပ်ႉပုၼ်ႈၽွၼ်း ၸွႆႈယူတ်းယႃလဵင်ႉလူ – တိုၵ်းသူၼ်းလၢတ်ႈၼင်ႇၼႆ။
ၵွပ်ႈၼႆလႄႈယၢမ်းလဵဝ် မၼ်းၸၢႆးတိုၵ်ႉၵဵပ်းလၢႆးမိုဝ်းလႄႈသဵၼ်ႈၸိုဝ်ႈ ၵူၼ်းႁၵ်ႉၸိူဝ်ႉၸၢတ်ႈထႆးယူႇ ။ သင်ဝႃႈတဵမ် 1 သႅၼ်ၸိုင် တေယိုၼ်ႈၸူးတီႈလုမ်းတြႃးၸိုင်ႈမိူင်း တႃႇမီးမႃးပၵ်းပိူင်မၢႆမီႈမႂ်ႇ တွၼ်ႈတႃႇယိပ်းၵုမ်းႁႅင်းၵၢၼ်ယၢၼ်မိူင်း ၊ တွၼ်ႈတႃႇႁႄႉၵင်ႈလွင်ႈႁူမ်ႇလူမ်ႈ လွင်ႈၵတ်းယဵၼ်ၼိမ်တဵင်ႈၸိုင်ႈမိူင်း – မၼ်းၸၢႆးလၢတ်ႈၵႂႃႇၼင်ႇၼႆ ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ