ဝၼ်းတီႈ 10-09-2026 ယၢမ်းၵၢင်ၼႂ်မွၵ်ႈ 10 မူင်း ၸုမ်းယိပ်းၵွင်ႈၵၢင်ႇၸုမ်းၼိုင်ႈ ၶဝ်ႈၸူၼ်ႁိူၼ်းလင်ၼိုင်ႈတီႈ ပွၵ်ႉၸွၼ်ႊၸူဝ်ႇ ဝဵင်းမူႇၸေႊ၊ ပေႃႉထုပ်ႉပႃႈၸဝ်ႈႁိူၼ်း ထိုင်တီႈလိုမ်းတူဝ်။

ၸုမ်းၸူၼ်ၼၼ်ႉပဵၼ်ၽူႈၸၢႆး 2 ၵေႃႉ ၶဝ်ႈႁိူၼ်းမႃးပေႃႉၸဝ်ႈႁိူၼ်းလိုမ်းတူဝ်ၵႂႃႇသေ သွၵ်ႈဢဝ်ၶူဝ်းၶွင်ငိုၼ်းၶမ်းၵႂႃႇၵူၼ်းပိုၼ်ႉတီႈၵေႃႉၼိုင်ႈလၢတ်ႈၼင်ႇၼႆ။

“ ၸူၼ်ၼၼ်ႉၶဝ်ႈႁိူၼ်းမႃးၽွင်းပႃႈၸဝ်ႈႁိူၼ်းယူႇၵေႃႉလဵဝ်။ ၶဝ်ပေႃႉထုပ်ႉပႃႈၼၼ်ႉ သမ်ႉပေႃးလိုမ်းတူဝ်ၵႂႃႇ။ ၶဝ်သွၵ်ႈဢဝ်လႆႈၵႂႃႇၶမ်းတင်းၼမ်။ ငိုၼ်းၵေႃႈလႆႈၵႂႃႇ 5 မိုၼ်ႇယႂၼ်ႊ ၼႆ။ ၶမ်းတႄႉလႆႈၵႂႃႇၼမ်ႉၼၵ်းၵႃႈႁိုဝ်တႄႉဢမ်ႇႁူႉ ”  – ဝႃႈၼႆ။

 ပႃႈၸဝ်ႈႁိူၼ်းဢၼ်ၺႃးပေႃႉႁႅမ်ထိုင်တီႈလိုမ်းတူဝ်ၵႂႃႇၼၼ်ႉ လႆႈၵႂႃႇယူတ်းယႃတူဝ်တီႈႁူင်းယႃ တၢင်းၾၢႆႇမိူင်းၶႄႇ ဝႃႈၼႆ။

ဝၢႆးလင်ၺႃးၸူၼ်ယဝ်ႉ ၵၢင်ႉၵႄႇဝၢၼ်ႈဢိူင်ႇလႄႈၽူႈမီးပုၼ်ႈၽွၼ်းၶဝ်ၸွမ်းတူၺ်းၵွင်ႈထၢႆႇ    CCTV သေ လိုပ်ႈလမ်းတီႉၺွပ်းၵူၼ်းၸူၼ်ၼၼ်ႉဝႆႉယူႇဝႃႈၼႆသေတႃႉတေႃႇထိုင်ယၢမ်းလဵဝ်ပႆႇငိၼ်းဝႃႈတီႉၺွပ်းလႆႈ။

တီႈဝဵင်းမူႇၸေႊၼႆႉ ၸၢဝ်းၶိူဝ်းၵေႃႈၼမ် ၊ ၶႄႇၵေႃႈၼမ်၊ ၸုမ်းယိပ်းၵွင်ႈၵၢင်ႇၵေႃႈၼမ် ပျီႇတူႉၸိတ်ႉၵေႃႈ ၸုမ်းလဵၵ်ႉ-ယႂ်ႇဢမ်ႇယွမ်း 40 ၸုမ်း။ ၼႂ်းၼၼ်ႉၸုမ်းတႂ်ႈသိုၵ်းမၢၼ်ႈၵုမ်းၵမ်ၵူၺ်းမီးယူႇ 15 ၸုမ်း- ၵူၼ်းပိုၼ်ႉတီႈလၢတ်ႈၼင်ႇၼႆ။

ၸၢႆးသႅင်ဢၢႆႈ- တႅမ်ႈဝႆႉၾၢႆႇမၢၼ်ႈ