မိူဝ်ႈၼႆႉဝၼ်းတီႈ 10 လိူၼ်ၵျူႊလၢႆႊ ယၢမ်းၵၢင်ၼႂ်ၸဝ်ႉ ၾႆးပႃႇလၢမ်းမႆႈဝႆႉႁၢဝ်ႈႁႅင်း တီႈဝဵင်းဢႄႊလ်မီးရီးယႃး (Almería) မိူင်းသပဵၼ်ႊ ပွတ်းၸၢၼ်း ၽူႈမီးပုၼ်ႈၽွၼ်းၾၢႆႇၶႄၾႆး ၸႂ်ႉဢဵၼ်ႁႅင်းမွၵ်ႈ 150 ၵေႃႉသေ ဢွၼ်ၵၼ်ၶႄၾႆး ၊ မီးၵူၼ်းလူႉတၢႆယွၼ်ႉၾႆးမႆႈ 12 ၵေႃႉ ၼႆယဝ်ႉ။

ၸွမ်းၼင်ႇ ၼႂ်းငဝ်ႈႁၢင်ႈသဵင် ၸုမ်းၾၢႆႇၶႄၾႆးၶဝ် ပိုၼ်ၽၢဝ်ႇဢွၵ်ႇမႃးဝႆႉၼၼ်ႉ လႆႈႁၼ်ၽူႈႁၢပ်ႇၵၢၼ် ၾၢႆႇၶႄၾႆးၶဝ် တိုၵ်ႉဢွၼ်ၵၼ်ၶႄၾႆး ဢၼ်လုၵ်ႉလၢမ်းမႆႈဝႆႉ ၸွမ်းၶၢင်ႈတၢင်း ၸိူဝ်းၼၼ်ႉယူႇ။

ဢႅၼ်ႊတူဝ်ႊၼီႊယူဝ်ႊသၼ်ႊ ႁွင်ႈၵၢၼ်ၽွင်းလူင် ၾၢႆႇပၢႆးယူႇလီ လႄႈ ငဝ်းလၢႆးၶိုၵ်ႉၶၵ်ႉတီႈ လုမ်းၸွမ်ၸိုင်ႈတူၵ်ႇတၵ်ႉဝႃႈ – ယွၼ်ႉၾႆးမႆႈပႃႇၼႆႉသေ ၼႂ်းပိုၼ်ႉတီႈ မီးလွင်ႈလူႉသုမ်း ၵႂႃႇတၢင်းၼမ်၊ ပဵၼ်ၽေးသၽႃႇဝဢၼ်ႁၢႆႉၸႃႉႁၢဝ်ႈႁႅင်း ဢၼ်ဢမ်ႇယၢမ်ႈထူပ်းမႃး ဝႃႈၼႆ။

ၼႂ်းဝူင်ႈၼႆႉၵူၺ်း ယွၼ်ႉၾႆးမႆႈပႃႇ ၼႂ်းမိူင်းၾရင်ႇသဵတ်ႈပွတ်းၸၢၼ်းသေ ဝၢၼ်ႈဝဵင်းလဵၵ်ႉဢွၼ်ႇ ၸိူဝ်းမီးႁိမ်းႁွမ်း လႅၼ်လိၼ်မိူင်းသပဵၼ်ႊ မွၵ်ႈ 20 ပၢႆ ႁူဝ်ၼပ်ႉၵူၼ်း 1 မိုၼ်ႇပၢႆ လႆႈ ၶၢႆႉပၢႆႈၵႂႃႇယူႇသဝ်း ဢွင်ႈတီႈလွတ်ႈၽေး။

ၼႂ်းလိူၼ် မေႊ တင်း လိူၼ်ၵျုၼ်ႊ ပူၼ်ႉမႃးၼႆႉ သၢႆလူမ်းမႆႈ ၶၢဝ်းမႆႈ လတ်းၶဝ်ႈၼႂ်းၵုၼ်ယူးရူပ်ႊ ပွတ်းတူၵ်း ႁဵတ်းႁႂ်ႈပိုၼ်ႉတီႈၼႃႈလိၼ် ႁႅင်ႈႁွင်သေ ပီၼႆႉ ၾႆးမႆႈပႃႇ တိူဝ်းလၢမ်းမႆႈငၢႆႈ။

ၸုမ်းၾိင်ႈၾႃႉၾူၼ်လူမ်းလုမ်ႈၾႃႉ (WMO) လၢတ်ႈဝႃႈ – ႁႅင်းလူမ်းမႆႈ ၼႂ်းၵုၼ်ယူးရူပ်ႇ ပီၼႆႉ တိူဝ်းမႆႈ ၶိုၼ်ႈမႃး 2 ပုၼ်ႈလႄႈ ၶၢဝ်းယၢမ်း သၢႆလူမ်းမႆႈလတ်းၽၢၼ်ႇၼႆႉၵေႃႈ တေတိူဝ်း ႁိုင်လိူဝ်ၵူႈပီ ၼႆယဝ်ႉ။