မိူဝ်ႈၼႆႉ ဝၼ်းတီႈ 6 လိူၼ်ၵျူႊလၢႆႊ ယၢမ်းဝၢႆးဝၼ်း 2 မူင်းၶိုင်ႈ ၾႆးသျွတ်ႉသေ မႆႈႁိူၼ်းၵူၼ်းမိူင်း ဝဵင်းၵေး (ၵွင်းထူဝ်ႇလိၼ်) ပွၵ်ႉ 3 ၼႂ်းဝဵင်းသႅၼ်ဝီ မိူင်းတႆးပွတ်းႁွင်ႇ ၸဝ်ႈႁိူၼ်းဢမ်ႇတၼ်းလႆႈၶူဝ်းႁိူၼ်းသင် ၼႆယဝ်ႉ။

ၵူၼ်းမိူင်းပိုၼ်ႉတီႈၵေႃႉယူႇဝႆႉၼႂ်းဝဵင်းသႅၼ်ဝီၵေႃႉၼိုင်ႈ လၢတ်ႈၼႄတီႈၽူႈတွႆႇႁွၵ်ႈဝႃႈ “ ပဵၼ်ၾႆးၾႃႉသျွတ်ႉႁႃႉ ၾႆးသူဝ်ႇလႃႇသျွတ်ႉ ႁိုဝ်ဢမ်ႇလႆႈႁူႉတေႉတေႉ။ မိူဝ်ႈၼႆႉၵေႃႈ ၾႆးၾႃႉၼႆႉ မႃးတင်းဝၼ်းယဝ်ႉ။ မၼ်းၵိုင်ႉၵၢင်ႉပဵၼ်ၵႂႃႇဝႆးၼႃႇ။ ႁိူၼ်းသမ်ႉပဵၼ်ႁိူၼ်း ၽႃသၢၼ် လၢႆးသွင်ၸၼ်ႉလႄႈ ၵႃးၶႄၾႆးၶဝ်ၵႂႃႇထိုင်ၵေႃႈ သမ်ႉပေႃးမႆႈၵႂႃႇတင်းၼမ်ယဝ်ႉ” ဝႃႈၼႆ။

လႆႈႁူႉဝႃႈ ၾႆးမႆႈႁိူၼ်းၵႂႃႇတင်းလင်သေတႃႉ ၵူၼ်းတႄႉဢမ်ႇမီးၽႂ်မၢတ်ႇၸဵပ်းၵႂႃႇၸွမ်းသေၵေႃႉ – ဝႃႈၼႆ။

ဝၢႆးလင်ပၢင်တိုၵ်းၽႅၼ်ၵၢၼ်ယၼ်ႇသိုၵ်း 1027 မႃးၼႆႉ ၵူၼ်းမိူင်းၸိူဝ်းယူႇဝဵင်းသႅၼ်ဝီ ဢမ်ႇလႆႈၸႂ်ႉတိုဝ်းၾႆးၾႃႉ လႆႈပိုင်ႈဢိင်ၾႆးသူဝ်ႇလႃႇ လႄႈ ပႅတ်ႇထရီႇပိူဝ်ႈတႃႇသႂၢင်းႁႅင်းၾူၼ်း၊ ႁႅင်းမၢၵ်ႇထၢၼ်ႇၵူႈလွင်ႈလွင်ႈ။

ထိုင်မႃးၼႂ်းၵၢင်ပီ 2026 ၾၢႆႇၸုမ်းသိုၵ်းၶႄႇၵဝ်ႈၵၢင်ႉၶဝ် ႁဵတ်းၶိုၼ်းႁူင်းၾႆးၾႃႉသေ မူၼ်ႉမႄးသၢႆၾႆးၾႃႉၼႂ်းဝဵင်းသႅၼ်ဝီ တင်းသဵင်ႈယဝ်ႉ ပၼ်ၵူၼ်းမိူင်းၸႂ်ႉတိုဝ်းၾႆးၾႃႉလႆႈ တိုၵ်ႉမီးမွၵ်ႈ 2 လိူၼ်ၼႆႉၵူၺ်း – ၼႆယဝ်ႉ။

ၼႂ်းၶၢဝ်းတၢင်းသိုၵ်းၶႄႇၵဝ်ႈၵၢင်ႉ (MNDAA) ၵုမ်းၵမ်ပၼ်ႇၵၢၼ်ၽွင်းငမ်း ဝဵင်းသႅၼ်ဝီၼႆႉ ၾႆးမႆႈႁၢၼ်ႉၶၢႆၼမ်ႉမၼ်းယႂ်ႇလူင်ၵႂႃႇ 2 တီႈ ၵူၼ်းမိူင်းလူႉသုမ်းငိုၼ်းၵႂႃႇ ၼပ်ႉႁူဝ်မိုၼ်ႇသႅၼ်ပျႃး – ဝႃႈၼႆ။