တႄႇႁူဝ်လိူၼ်ၵျူႊလၢႆႊမႃး ၾူၼ်လူမ်းႁႅင်း ၼမ်ႉၼွင်းလူၼ်ႉၾင်ႇလၢႆလၢႆတီႈ ၼႂ်းမိူင်းတႆး လႄႈ မိူင်းၶၢင် ၼမ်ႉႁူၺ်ႈၼမ်ႉလွႆၵေႃႈ လုပ်ႇၼွင်းလွင်ႈလႆလူင်းမႃးထူမ်ႈသႂ်ႇပႃး ႁိူၼ်းယေး သူၼ် တိူၵ်ႇႁႆႈလွၵ်းၼႃးၵူၼ်းမိူင်း ၸိူဝ်းယူႇၼႂ်းပိုၼ်ႉတီႈႁၢဝ်ႈႁႅင်းဝႆႉ မၢင်တီႈၵူၼ်းလွင်ႈလႆပႃးၵႂႃႇၸွမ်းၼမ်ႉၼွင်း ထိုင်တီႈလူႉတၢႆႁၢႆ ႁႃတူဝ်ဢမ်ႇႁၼ်ၸိူဝ်းၼႆႉၵေႃႈမီး – ၼႆယဝ်ႉ။

ၸဵမ်မိူဝ်ႈ မိူင်းၶႄႇ ၺႃးၾူၼ်လူင်လူမ်းလႅင်ႉသေ ၾၢႆလူင်ၵူၼ်ႇပင်းၵႂႃႇလၢႆလၢႆတီႈ ၼမ်ႉလေႃႇၼွင်းထူမ်ႈ ပတ်းပိုၼ်ႉမိူင်းၶႄႇပွတ်းၸၢၼ်းၼၼ်ႉ လူင်ပွင်ၸိုင်မိူင်းၶႄႇ ပိုၼ်ၽၢဝ်ႇဢွၵ်ႇဝႃႈ တေပိုတ်ႇၼမ်ႉၼႂ်းၾၢႆဢွၵ်ႇမႃး တၢင်းႁႅင်း တၢင်းဝႆးၼမ်ႉၼႆႉ ၼိုင်ႈၼႅၵ်ႉၸၢၼ်ႉၼႆႉ တေပဵၼ်ၼႂ်း 500 ထိုင် 1200 ၵူႉပမီႇတႃႇလႄႈ ႁႂ်ႈၵူၼ်းမိူင်းၸိူဝ်းယူႇၸွမ်းသၢပ်ႇၵႄးၼမ်ႉမၢဝ်း ၾၢင်ႉၵၼ်တင်းသဵင်ႈ ဝႃႈၼႆ။

ၵူၼ်းမိူင်းၵေႃႉၶၢႆၽၵ်းယိူဝ်ႈၼၢင်းၶဵဝ် လႄႈ ၵုၼ်ႇၵူႈသႅၼ်း ႁိမ်းၾင်ႇၼမ်ႉမၢဝ်းၵေႃႉၼိုင်ႈ လၢတ်ႈၼႄတီႈ ၽူႈတွႆႇႁွၵ်ႈဝႃႈ “ၸဵမ်မိူဝ်ႈဝၼ်းဢၼ်ၶႄႇၶဝ် ပွႆႇၼမ်ႉလူင်းမႃးၼၼ်ႉ တၢင်း ႁဝ်းၼႆႉၵေႃႉ ၾူၼ်တူၵ်းထပ်းၵၼ် တင်းဝူင်ႈဢမ်ႇထၢတ်ႇ။ ၼမ်ႉမၢဝ်းၵေႃႈ ၶိုၼ်ႈမႃးၵမ်းလွႆးလွႆးၵူႈမိုဝ်ႉၵူႈဝၼ်း။ ဢၼ်ႁၢႆႉႁႅင်းမႃးၼႆႉတႄႉ ပဵၼ်ဝူင်ႈၵၢင်လိူၼ်ၵျူႊလၢႆႊၼႆႉဢေႃႈ။ မိူဝ်ႈလဵဝ် တၢင်းပွၵ်ႉတေႃႇယွတ်ႈ ဝဵင်းမူႇၸေႊႁဝ်းၼႆႉၵေႃႈ ၼမ်ႉထူမ်ႈ ႁၢၼ်ႉၶၢႆၽၵ်းယိူဝ်ႈၼၢင်းၶဵဝ် ၸိူဝ်းမီးႁိမ်းၾင်ႇၼမ်ႉမၢဝ်းၼၼ်ႉတင်းသဵင်ႈယဝ်ႉၶႃႈ။ ၼမ်ႉၼႆႉ ၶိုၼ်ႈမႃးမွၵ်ႈ 6 ထတ်း (ပေႇ) 7 ထတ်းၼႆႉဢေႃႈ” ဝႃႈၼႆ။

လႆႈႁူႉဝႃႈ တၢင်းဝၢၼ်ႈပၢင်ႇၶမ်း ဢွင်ႈတီႈႁိမ်း ၵႄးၼမ်ႉပူဝ်ႉ (ၼမ်ႉပေႃႈ) တင်း ၼမ်ႉမၢဝ်း မႃးၶွႆႈၵၼ်ၼၼ်ႉၵေႃႈ ၼမ်ႉလူၼ်ႉၾင်ႇႁႅင်းသေ ထူမ်ႈသူၼ် လႄႈ လွၵ်းၼႃး ၵူၼ်းမိူင်း ပိုၼ်ႉတီႈၵႂႃႇတင်းသဵင်ႈ – ၼႆယဝ်ႉ။

ၵူၼ်းမိူင်းပိုၼ်ႉတီႈဝဵင်းမူႇၸေႊ လၢတ်ႈတီႈၽူႈတွႆႇႁွၵ်ႈဝႃႈ “တၢင်းပၢင်ႇၶမ်း-ၼမ်ႉပူဝ်ႉၶိုၼ်ႈမႃး ၶွႆႈၵၼ်တင်းၼမ်ႉမၢဝ်း တီႈသဵၼ်ႈတၢင်းပၢင်ႇၶမ်းတေၵႂႃႇႁူဝ်ပူဝ်ႉဝဵင်းၼၢင်းၼၼ်ႉၵေႃႈ ၼမ်ႉထူမ်ႈ။ တၢင်းၼွင်မူႇ၊ ၸေႊလၢၼ်ႉ ႁိမ်းၾင်ႇၼမ်ႉမၢဝ်း ၸိူဝ်းၽုၵ်ႇသွမ်ႈၶဝ်ႈဝႆႉၼၼ်ႉၵေႃႈ ထူမ်ႈၵႂႃႇတင်းသဵင်ႈ” ဝႃႈၼႆ။

လိူဝ်ၼၼ်ႉ တၢင်းဝၢၼ်ႈၼွင်ၶမ်း ဝဵင်းၼမ်ႉၶမ်းၼၼ်ႉၵေႃႈ ၼမ်ႉမၢဝ်းၼွင်းလူၼ်ႉၾင်ႇထူမ်ႈပႃးႁိူၼ်းယေး လႄႈ သဵၼ်ႈတၢင်းၵႂႃႇမႃး ၵူၼ်းမိူင်းပိုၼ်ႉတီႈ ႁဵတ်းႁႂ်ႈၵူၼ်းမိူင်းၵႂႃႇမႃး ယၢပ်ႇၽိုတ်ႇဝႆႉ – ၼႆယဝ်ႉ။

ပူၼ်ႉမႃးမိူဝ်ႈပီၵၢႆ 2025 လိူၼ်ဢွၵ်ႊထူဝ်ႊပိူဝ်ႊၼၼ်ႉၵေႃႈ ၾူၼ်တူၵ်းႁႅင်းသေ ႁဵတ်းႁႂ်ႈၼမ်ႉထူမ်ႈ ၸွမ်းသဵၼ်ႈတၢင်းၵႂႃႇ ၽၵ်းတူၶၢမ်ႈမိူင်း မိူင်းမၢၼ်ႈ-မိူင်းၶႄႇသေ ပီ 2026 ၼႆႉ ၼမ်ႉမၢဝ်းၼွင်းလူၼ်ႉ ၾင်ႇၼမ်ႁႅင်းလိူဝ်ၵူႈပီတေႉတေႉဝႃႈဝႃႈၼႆ – ၵူၼ်းမိူင်းပိုၼ်ႉတီႈလၢတ်ႈၼင်ႇၼႆ။

ဢၼ်ႁဵတ်းႁႂ်ႈၾိင်ႈၾႃႉရႃႇသီႇလႅၵ်ႈလၢႆႈ ၾူၼ်တူၵ်းဢမ်ႇမႅၼ်ႈၸွမ်းၶၢဝ်း၊ ၵႄးၼမ်ႉယႂ်ႇလူင် ၼွင်းလူၼ်ႉၾင်ႇလႆႈငၢႆႈမႃးလိူဝ်ၵဝ်ႇသေ လုပ်ႇၼွင်းသဵၼ်ႈတၢင်း၊ ႁိူၼ်းယေး၊ တိူၵ်ႇႁႆႈလွၵ်းၼႃး၊ တီႈၽုၵ်ႇတီႈသွမ်ႈၶွင်ၵူၼ်းမိူင်းယူႇၼႆႉ ပဵၼ်ယွၼ်ႉ ၵၢၼ်ၶုတ်းႁႄႈ၊ ၶုတ်းၶမ်း၊ တႅပ်းတူၼ်ႈမႆႉ၊ ယႃႇထိူၼ်ႇပႃႇလူႉၵွႆႁႅင်းယဝ်ႉသေ ဢမ်ႇသူင်ၵၼ်ၽုၵ်ႇၶိုၼ်းတူၼ်ႈမႆႉတူၼ်ႈတွၵ်ႇ ႁႂ်ႈပေႃးၵိုင်ႇငမ်ႇ ၼၼ်ႉယဝ်ႉ။

ၾၢႆႇၼိုင်ႈၵေႃႈ ဝၢႆးလင် ၽႅၼ်ယၼ်ႇသိုၵ်း 1027 မႃးၼႆႉ ၸုမ်းသိုၵ်းၸၢဝ်းၶိူဝ်းၸိူဝ်းၵုမ်းၵမ်ယူႇ ၼႂ်းမိူင်းတႆးပွတ်းႁွင်ႇၼႆႉ တႅပ်းဢဝ်မႆႉယႂ်ႇမႆႉလူင် ယႃႉပႃႇထိူၼ်ႇ ၶုတ်းဢဝ်ၶမ်းႁိမ်း ၾင်ႇမႄႈၼမ်ႉၼမ်လူၼ်ႉႁႅင်း ၵူၺ်းဢမ်ႇၵႃး ၼႂ်းတိူၵ်ႇႁႆႈလွၵ်းၼႃးၵေႃႈ ၽုၵ်ႇဢွႆႈ၊ ၽုၵ်ႇၵူၺ်ႈသေ ၸႂ်ႉတိုဝ်းၾုၼ်ႇထၢတ်ႈၼမ်လူၼ်ႉႁႅင်းလႄႈ ထၢတ်ႈလိၼ်ဢမ်ႇမီးႁႅင်းတႃႇလုတ်ႇ ဢဝ်ၼမ်ႉ ၼႆယဝ်ႉ။