သၢႆလူမ်းမႆႈ လတ်းၽၢၼ်ႇၶဝ်ႈ တီႈၼႂ်းၵုၼ် ယူးရူပ်ႊ ပွတ်းတူၵ်းဝႆႉလႄႈ ၵူၼ်းမိူင်း ပရဵင်ႊတဵင်ႊ၊ ၾရင်ႇသဵတ်ႈ တင်း မိူင်းသပဵၼ်ႊၶဝ် ၼပ်ႉႁူဝ်လၢၼ်ႉၵေႃႉ လႆႈၶၢမ်ႇတၢမ်ႇ ၾိင်ႈၾႃႉ ႁွၼ်ႉမႆႈဝႆႉႁၢဝ်ႈႁႅင်း ဝႃႈၼႆ။

တီႈငဝ်ႈၸိုင်ႈဝဵင်းလူင် ပႄႊရိတ်ႉသ် မိူင်းၾရင်ႇသဵတ်ႈၼၼ်ႉ ႁႅင်းမႆႈၵၢင်ဝၼ်း မီးထိုင် 41 တီႊၵရီႊ သႄႊ သီႊယႅၵ်ႉ၊ မိူၼ်ၼႆ လိူၼ်ၵျုၼ်ႊ တီႈမိူင်းပရဵင်ႊတဵင်ႊပီၼႆႉၵေႃႈ ပဵၼ်ဢၼ်မႆႈႁႅင်းလိူဝ်ၵူႈပီ။

ၼႂ်းမိူင်းသပဵၼ်ႊ ပွတ်းႁွင်ႇၵေႃႈ ယွၼ်ႉမႆႈႁွၼ်ႉႁႅင်းလႄႈ ၽူႈမီးပုၼ်ႈၽွၼ်းၶဝ် လႆႈပိုၼ်ၽၢဝ်ႇ ပဵၼ်ငဝ်းလၢႆးၶိုၵ်ႉၶၢၵ်ႉဝႆႉ၊ မၢင်ပိုၼ်ႉတီႈ ႁႅင်းမႆႈ ၵၢင်ဝၼ်း ၶိုၼ်ႈသုင်ထိုင် 42 တီႊၵရီႊသႄႊသီႊယႅၵ်ႉ ၼႆယဝ်ႉ။

ၼႂ်းမိူင်းၾရင်ႇသဵတ်ႈ မွၵ်ႈၼိုင်ႈၶိုင်ႈၼႆႉ လႆႈပိုၼ်ၽၢဝ်ႇၽေးၾိင်ႈၾႃႉႁွၼ်ႉမႆႈဝႆႉ။ ယွၼ်ႉၵူၼ်းမိူင်း ဢွၼ်ၵၼ်ပိုတ်ႇ ၶိူင်ႈလူမ်းၵတ်း (ဢႄးလ်ၵွၼ်း) ၼမ်လႄႈ ႁႅင်းထၢတ်ႈၾႆးၾႃႉ ၶၢတ်ႇၵႂႃႇသေ ၵူၼ်းမိူင်း ၸိူဝ်းယူႇသဝ်း ၾၢႆႇပွတ်းတူၵ်း လင်ႁိူၼ်းၼပ်ႉႁူဝ်ႁဵင် လႆႈႁူပ်ႉလွင်ႈယၢပ်ႇၽိုတ်ႇဝႆႉ။ လိူဝ်ၼၼ်ႉ ဢွၼ်ၵၼ်မႆႈၸႂ် ၵူဝ်ၼမ်ႉႁႅင်ႈၵႂႃႇ လႄႈ ၽေးၾႆးမႆႈပႃႇထိူၼ်ႇႁၢဝ်ႈႁႅင်း ၸဵမ်ၸိူဝ်းၼႆႉ ဝႃႈၼႆ။

ယွၼ်ႉၾိင်ႈၾႃႉႁွၼ်ႉမႆႈႁႅင်းလႄႈ ၵူၼ်းၸိူဝ်းလူင်းဢၢပ်ႇၼမ်ႉ ၼႂ်းၼမ်ႉႁွင်ႈ၊ ၼမ်ႉၼွင်သေလူႉတၢႆ ၼမ်ၶိုၼ်ႈမႃး။ ၽူႈမီးပုၼ်ႈၽွၼ်း မိူင်းၾရင်ႇသဵတ်ႈၶဝ်လၢတ်ႈဝႃႈ – ဝၢႆးလင်ဝၼ်းတီႈ 18 လိူၼ်ၵျုၼ်ႊ မႃးၼႆႉ ၵူၼ်းၸူမ်ၼမ်ႉတၢႆ မီး 40 ပၢႆယဝ်ႉ ဝႃႈၼႆ။

လိူဝ်သေ မိူင်းၾရင်ႇသဵတ်ႈ၊ မိူင်းပရဵင်ႊတဵင်ႊ လႄႈ မိူင်းသပဵၼ်ႊယဝ်ႉ ၼႂ်းမိူင်း ဢီႊတလီႊ ပွတ်းႁွင်ႇ တင်း ပွတ်းၵၢင်ၸိူဝ်းၼႆႉၵေႃႈ ႁႅင်းလူမ်းမႆႈ ပုင်ႈၶိုၼ်ႈသုင်ဝႆႉ ၼႆယဝ်ႉ။

တႅမ်ႈ – ၼၢင်းငိုၼ်းႁွမ်