ႁွင်ႈၵၢၼ် ၾၢႆႇၾိင်ႈၾႃႉရႃႇသီႇ ပိုၼ်ၽၢဝ်ႇ မိူဝ်ႈဝၼ်းတီႈ 01/04/2025 ၼႆႉဝႃႈ – လိူၼ်ဢေႊပရိူဝ်ႊတင်း လိူၼ်မေႊၼႆႉ ပဵၼ်ၶၢဝ်းမႆႈလႄႈ ႁႅင်းမႆႈ ၽွင်းၶၢဝ်းၵၢင်ဝၼ်းၼႆႉ တေၶိုၼ်ႈသုင်မႃးၵူႈမိုဝ်ႉၵူႈဝၼ်း ႁဵတ်းႁႂ်ႈပဵၼ်မႃး ၾူၼ်မွၵ်ႇၵုမ်ႈၼႃ (မိုးတိမ်တောင်)။

ယဝ်ႉၵေႃႈ ၸွမ်းသဵၼ်ႈတၢင်း ၾူၼ်မွၵ်ႇၵုမ်ႈသုတ်ႉၶၢႆႉၼၼ်ႉ ၸၢင်ႈမီးပႃး လူမ်းလႅင်ႉပတ်ႉထွင်း၊ ၾႃႉတႅၵ်ႇၾႃႉလင်၊ ၾူၼ်မၢၵ်ႇႁဵပ်းတူၵ်း ၸိူဝ်းၼႆႉထႅင်ႈ။  

ၸွမ်းၼင်ႇ ၶေႃႈပိုၼ်ၽၢဝ်ႇ ႁွင်ႈၵၢၼ်ၶၢဝ်ႇငၢဝ်းၾူၼ်လူမ်း ပိုၼ်ၽၢဝ်ႇဝႆႉတႄႉ ၼႂ်းဝၼ်းတီႈ 01/04/2025 ၼႆႉ 1 ၸူဝ်ႈမူင်းလႂ် ႁႅင်းလူမ်းပတ်ႉထွင်း 40 လၵ်းထိုင် 50 လၵ်း ၼႆယဝ်ႉ။

ၼႂ်းၶၢဝ်းတၢင်းလၢႆဝၼ်းၼႆႉ တီႈၼႂ်းပၢင်ႇလၢႆႇ ၿင်းၵလႃးတင်း ပၢင်ႇလၢႆႇ ၵပ်ႉပလီႇ တေၸၢင်ႈမီးလူမ်းလႅင်ႉ ႁႅင်းဢွၼ်ႇ (လဵၵ်ႉ) သေ ၸၢင်ႈလၢႆႈထိုင် ၸၼ်ႉလူမ်းလႅင်ႉႁႅင်းယႂ်ႇ။ ၶၢတ်ႈလၢမ်းဝႆႉဝႃႈ လူမ်းလႅင်ႉၼႆႉ တေၸၢင်ႈၽတ်ႉထွင်းၶဝ်ႈမႃး တီႈၼႂ်းမိူင်းမၢၼ်ႈၼႆ – ဢူးလႃႉထုၼ်း ၽူႈၶၢၼ်ပၢၵ်ႇ ႁွင်ႈၵၢၼ်ၾိင်ႈၾႃႉရႃႇသီႇ လၢတ်ႈဝႆႉၼင်ႇၼႆ။

လိူဝ်ၼၼ်ႉ ပၼ်ၾၢင်ႉ ႁႂ်ႈၵူၼ်းမိူင်း ဝႆႉၼၵ်းၼႃတူၺ်းၸွမ်း ၶၢဝ်ႇငၢဝ်းၾိင်ႈၾႃႉၾူၼ်လူမ်း ၼႂ်းၶၢဝ်းမႆႈ၊ တႃႇၶၢဝ်းတၢင်းသၢႆၵၢၼ်မိၼ် ၼႂ်းမိူင်းတင်း သဵၼ်ႈတၢင်းၼမ်ႉ ၸိူဝ်းၼႆႉ ၵေႃႈ ႁႂ်ႈလႆႈၾၢင်ႉပႃးၸွမ်း ဝႃႈၼႆ။  

မိူၼ်ၼႆ ႁွင်ႈၵၢၼ်ၾိင်ႈၾႃႉရႃႇသီႇ မိူင်းထႆးၵေႃႈ ပိုၼ်ၽၢဝ်ႇဝႆႉဝႃႈ တႄႇဢဝ်ဝၼ်းတီႈ 31/03/2025 တေႃႇထိုင် ဝၼ်းတီႈ 03/04/2025 လူမ်းလႅင်ႉၶၢဝ်းမႆႈ ၸၢင်ႈၶဝ်ႈၼႂ်း 42 ၸႄႈတွၼ်ႈ ၼႂ်းမိူင်းထႆး – သိုဝ်ႇၶၢဝ်ႇ BBC – DVB ဢွၵ်ႇဝႆႉၼင်ႇၼႆ။