ၸုမ်းပလိၵ်ႈ CIB မိူင်းထႆး ပိုၼ်ၽၢဝ်ႇၵႂႃႇ မိူဝ်ႈဝႃး ဝၼ်းတီႈ 21 လိူၼ်ၵျူႊလၢႆႊၼႆႉဝႃႈ တီႉၺွပ်းလႆႈ ၵူၼ်းမိူင်းမၢၼ်ႈၵေႃႉၼိုင်ႈ ဢၼ်တေႃႉၶိူင်ႈၻရူၼ်ႊ FPV မႃးတီႈမႄႈသွတ်ႇလႅၼ်လိၼ် ထႆး – မၢၼ်ႈ လူၺ်ႈဢမ်ႇမႅၼ်ႈတၢင်းၵၢၼ်သေ တေဢၢၼ်းသူင်ႇၶဝ်ႈၵႂႃႇ ၼႂ်းမိူင်းမၢၼ်ႈၼၼ်ႉ ဝႃႈၼႆ။

ၸွမ်းၼင်ႇလႆႈၶၢဝ်ႇဝႆႉသေ ၸုမ်းပလိၵ်ႈၾၢႆႇၵူတ်ႇထတ်း CIB ၶဝ် လႆႈႁူမ်ႈၵၼ်တင်း ပလိၵ်ႈ လႄႈ ၸုမ်းၶိုၵ်ႉတွၼ်း ဝဵင်းမႄႈသွတ်ႇသေ ၶဝ်ႈၵူတ်ႇထတ်း ၼႂ်းၶွမ်ႊပၼီႊႁဵတ်းၵၢၼ်တေႃႉသူင်ႇ သုၼ်ႇလဵဝ်ဢၼ် ၼိုင်ႈ တီႈဝဵင်းမႄႈသွတ်ႇ၊ ထူပ်းႁၼ်ၶိူင်ႈၻရူၼ်ႊ FPV (First – Person View) ဢၼ်ၽွမ်ႉတႃႇၸႂ်ႉတိုဝ်း လႆႈၵမ်းလဵဝ် 4 လမ်း ဢိၵ်ႇတၢင်း ၵွင်ႈထႆႇၻရူၼ်ႊ၊ ၶိူင်ႈၵုမ်းထိင်း၊ မေႃႊတႃႇ လႄႈ ၶိူင်ႈၶူဝ်းၸိူဝ်း ၵဵဝ်ႇၶွင်ႈၸွမ်း ၻရူၼ်ႊတင်းသဵင်ႈ 16 မဵဝ်း ၼႆယဝ်ႉ။

ၵူၼ်းမိူင်းမၢၼ်ႈ ၵေႃႉၺႃးတီႉၺွပ်းၼၼ်ႉ ၸိုဝ်ႈႁွင်ႉ ၵူဝ်ႇမိၼ်းၼီႇၵျေႃႇ။ ယွၼ်ႉမၼ်းၸၢႆး ဢဝ်ၶူဝ်းၶွင် ဢၼ်ၾၢႆႇၵဵပ်းၶွၼ်ႇမိူင်းထႆး ႁႄႉႁၢမ်ႈဝႆႉ ဢမ်ႇၼၼ် ဢဝ်ၶူဝ်းၶွင်ၸိူဝ်းဢမ်ႇမႅၼ်ႈၸွမ်း မၢႆမီႈ သိူင်ႇသိမ်းဝႆႉ၊ ၸွႆႈထႅမ်တေႃႉသူင်ႇ ၶူဝ်းၶွင်ၸိူဝ်းၽိတ်းမၢႆမီႈ ဢမ်ႇၼၼ် ႁပ်ႉၶူဝ်းၶွင်ဝႆႉ လူၺ်ႈဢမ်ႇ ႁူႉၸၵ်း ၸဝ်ႈၶွင်ပဵၼ်ၽႂ်ၼႆသေ ၸင်ႇလႆႈၺႃးတီႉၺွပ်း ဝႃႈၼႆ။

ၶိူင်ႈတရူၼ်း ၸိူဝ်းတီႉၺွပ်းလႆႈဝႆႉၼႆႉ ပဵၼ်ၻရူၼ်ႊၸိူဝ်းၸႂ်ႉတိုဝ်း လွၵ်းလၢႆးပၢႆးၸၢင်ႈ ၸၼ်ႉသုင်သေ ႁဵတ်းဝႆႉ၊ ဢမ်ႇမိူၼ်ၵၼ်တင်း ၻရူၼ်ႊၸိူဝ်းၸႂ်ႉတိုဝ်း ၼႂ်းၵၢၼ်ငၢၼ်းပၢႆးမၢၵ်ႈမီး။ ၶိူင်ႈၻရူၼ်ႊၸိူဝ်းၼႆႉ လုၵ်ႉတီႈ ဝဵင်းၵဵင်းမႂ်ႇသေ တေႃႉသူင်ႇၵႂႃႇတီႈ မႄႈသွတ်ႇ ဝႃႈၼႆ။

ယၢမ်းလဵဝ် ပလိၵ်ႈၶဝ် ႁွင်ႉဢဝ်တူဝ်ၵူၼ်းမိူင်းမၢၼ်ႈ ၵေႃႉၺႃးထၢင်ႇထိူမ်ဝႆႉၼၼ်ႉ သိုပ်ႇၵႂႃႇၵူတ်ႇထတ်း ဝႆႉတီႈႁူင်းပလိၵ်ႈ ဝဵင်းမႄႈသွတ်ႇ ၸွမ်းၼင်ႇပၵ်းပိူင်မီးဝႆႉ။ မၼ်းၸၢႆးတႄႉ တွပ်ႇထဵင်ဝႆႉဝႃႈ ပဵၼ် ၵူၼ်း ႁပ်ႉၶူဝ်းၶွင်ၵူၺ်း၊ ဢမ်ႇလႆႈႁူႉၸွမ်းဝႃႈ ၼႂ်းတိူၵ်ႈၼၼ်ႉပဵၼ်ၶူဝ်းၶွင်သင် ဝႃႈၼႆ။

ၵူၺ်းၵႃႈ မၼ်းၸၢႆးဢမ်ႇၼႄလႆႈပႃး ၽိုၼ်လိၵ်ႈလၢႆး ၸိူဝ်းလႆႈလတ်းၽၢၼ်ႇ ၶၵ်ႉတွၼ်ႈၾၢႆႇၵၢၼ်ၵဵပ်းၶွၼ်ႇ – ၶၢဝ်ႇထႆး ႁၢႆးငၢၼ်းဝႆႉၼင်ႇၼႆ။