ဝၢႆးလင်သိုၵ်းမၢၼ်ႈ ယိုတ်းဢႃႇၼႃႇၸိုင်ႈမိူင်းမႃးၼႆ ယွၼ်ႉပၼ်ႁႃပၢင်တိုၵ်းသိုၵ်းသိူဝ်၊ ၵၢၼ်ႁႃၵိၼ် လဵင်ႉတွင်ႉ ယၢပ်ႇၵိၼ်း၊ ယွၼ်ႉပၵ်းပိူင် ၵူၼ်းမိူင်းႁၢပ်ႇၵၢၼ်သိုၵ်းၸိူဝ်းၼႆႉသေ ၵူၼ်းမိူင်းႁူမ်ႈတုမ်မၢၼ်ႈ ဢွၼ်ၵၼ် ၶၢႆႉပၢႆႈ ၶဝ်ႈယူႇသဝ်းႁဵတ်းၵၢၼ် ၼႂ်းမိူင်းထႆး ၼမ်ၶိုၼ်ႈမႃးၵူႈမိုဝ်ႉၵူႈဝၼ်း။
ၸုမ်းၶၢႆႉလႅၵ်ႈတီႈယူႇ ၵူႈမိူင်းမိူင်း ၸၢတ်ႈၸိုင်ႈလုမ်ႈၾႃႉ (IOM) လၢတ်ႈဝႃႈ – တႄႇဢဝ်လိူၼ် ၵျႅၼ်ႊ ၼိဝ်ႊရီႊ တေႃႇထိုင် လိူၼ်ဢေႊပရိူဝ်ႊ ပီ 2026 ၼႂ်းၶၢဝ်းတၢင်း 4 လိူၼ်ၼႆႉ ၵူၼ်းမိူင်းမၢၼ်ႈ ၶၢႆႉၶဝ်ႈယူႇ သဝ်း ႁဵတ်းၵၢၼ် ၼႂ်းမိူင်းထႆး မီး ႁိမ်းၸမ် 7 သႅၼ်ၵေႃႉ ဝႃႈၼႆ။
ၵူၼ်းမိူင်းမၢၼ်ႈ ႁိမ်းၸမ် 7 သႅၼ်ၵေႃႉ (687,000) ၼႆႉ လုၵ်ႉတီႈ ၼႂ်းၸႄႈတွၼ်ႈ တၢၵ်ႇ၊ ရၼွင်း၊ ၵၼ်ႊၶျၼပူႊရီႊ၊ ၵဵင်းႁၢႆး ၸိူဝ်းၼႆႉသေ ၶၢမ်ႈၵဵတ်ႉလၢၼ်ႇလႅၼ်လိၼ်ၶဝ်ႈၼႂ်းမိူင်းထႆး ပိူဝ်ႈတႃႇ တေလႆႈယူႇသဝ်း မီးလွင်ႈႁူမ်ႇလူမ်ႈလွတ်ႈၽေး လႄႈ မီးတိုဝ်ႉတၢင်းလီ ဝႃႈၼႆ။
IOM လၢတ်ႈဝႃႈ – ၼႂ်းၵူၼ်းမိူင်းမၢၼ်ႈ ၸိူဝ်းၶဝ်ႈၵႂႃႇယူႇ တီႈၼႂ်းမိူင်းထႆးၼၼ်ႉ တႃႇ 11% ၼႆႉ ပဵၼ်ၵူၼ်း ၸိူဝ်းဢမ်ႇလၢမ်းလႆႈဝႃႈ တေယူႇသဝ်း ၼႂ်းမိူင်းထႆးၵႂႃႇ ႁိုင်ၼၢၼ်းၵႃႈႁိုဝ်ၼႆလႄႈ လႆႈမၵ်းမၼ်ႈပဵၼ် ၵူၼ်းၸိူဝ်းယူႇသဝ်း ၶၢဝ်းယၢဝ်း၊ မၢင်ၸိူဝ်းၵေႃႈ လုၵ်ႉတီႈလႅၼ်လိၼ်မိူင်းထႆးပွတ်းၸၢၼ်းသေ သိုပ်ႇၶၢမ်ႈၶဝ်ႈၵႂႃႇထႅင်ႈ ၾင်ႇမိူင်း မလေးသျႃး၊ တႃႇတေႁူႉႁူဝ် ၼပ်ႉတႅတ်ႈတေႃးလႆႈၼၼ်ႉတႄႉ တိုၵ်ႉမီးလွင်ႈယၢပ်ႇၽိုတ်ႇယူႇ ၼႆယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ