မိူဝ်ႈဝၼ်းတီႈ 19 လိူၼ်ၵျုၼ်ႊ တႄႇယၢမ်းၵၢင်ၼႂ် 9 မူင်း ၾႆးမႆႈႁူင်း KTV ၼၵႃးသွင်တူဝ် (နဂါးနှစ်ကောင်) ႁိမ်းၽၵ်းတူၸၢင်ႉၽိူၵ်ႇ ၼႂ်းပွၵ်ႉၵွင်းမူး (ဆင်ဖြူအိမ်ရာ) လႅၼ်လိၼ် မိူင်းတႆး- မိူင်းၶႄႇ ၼႂ်းၸႄႈဝဵင်းမူႇၸေႊ မိူင်းတႆးပွတ်းႁွင်ႇ ။

လႆႈၸႂ်ႉရူတ်ႉၶႄၾႆး ၼႂ်းဝဵင်းမူႇၸေႊ တႃႇ 9 ပွၵ်ႉ 9 ၾၢႆႇ တင်းသဵင်ႈၵႂႃႇႁူတ်းၼမ်ႉၸွႆႈၵူၺ်းဢမ်ႇၵႃး လႆႈၸႂ်ႉတိုဝ်းပႃး ၶိူင်ႈၸၢၵ်ႈထုၺ်လိၼ် ပႅၵ်ႉၾူဝ်ႊ ယႃႉၽႃႁူင်းပျေႃႇမူၼ်ႈၵွႆတင်း သဵင်ႈဢွၼ်တၢင်းၵွၼ်ႇ ဝႃႈၼႆ။

ၽူႈမီးပုၼ်ႈၽွၼ်းၼႂ်းၸုမ်းၶႄၾႆး ဝဵင်းမူႇၸေႊၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ “ ႁူင်း KTV ၶဝ်ၼႆႉ ႁဵတ်းဝႆႉၶႅမ်ႉ ႁႅင်းၼႃႇ ယဝ်ႉၵေႃႈ ၼႂ်းမၼ်း ၸႂ်ႉဝႆႉပဵၼ်ၶိူင်ႈဢၼ်ၾႆးမႆႈငၢႆႈ ၼၼ်ႉတင်းသဵင်ႈ။ ၸဵမ်တီႈၼင်ႈ သူဝ်ႇၾႃႇ၊ ၽေႃႉ၊ ၽႃမၼ်းသမ်ႉ ဢဝ်မႆႉတၢင်းမိူင်းၶႄႇ ႁဵတ်းဝႆႉလေႃးပႃး ပဵၼ်ဝႆႉသွင်ၸၼ်ႉ။ ၾၢႆႇၼွၵ်ႈမၼ်းသမ်ႉ ပဵၼ်လဵၵ်းဝႆႉ တင်းသဵင်ႈ လႄႈ ႁဵတ်းႁႂ်ႈၶဝ်ႈယၢပ်ႇၼႃႇ။ ၶဝ်ႁဵတ်းၼႆႉ မၼ်းဢမ်ႇမိူၼ်ႁိူၼ်းၵူၼ်း။ တၢင်းၼႂ်းမၼ်းၼႆႉ ၶဝ်ႁဵတ်းဝႆႉပဵၼ်ၾၢင်ႁၢင်ႈ 3D – LCD ၸိူဝ်းၼႆႉ။ ၵွပ်ႈၼၼ် လႆႈဢဝ်ပႅၵ်ႉၾူဝ်ႊယႃႉလႅဝ်လႅဝ် ယဝ်ႉ ၸင်ႇဢဝ်ၼမ်ႉၶဝ်ႈၵႂႃႇႁူတ်းလႆႈ။ တၢင်းႁိုင်ဢၼ်ၾႆးမႆႈၼႆႉ မီးၵႂႃႇ 5 ၸူဝ်ႈမူင်းၶိုင်ႈၼႆႉဢေႃႈ” ဝႃႈၼႆ။

ၾႆးၼႆႉတႄႇမႆႈမိူဝ်ႈယၢမ်းၵၢင်ၼႂ် 9 မူင်း တေႃႇထိုင် ယၢမ်းဝၢႆးဝၼ်း 2 မူင်းၶိုင်ႈ ၸွင်ႇၵွႆႈမွတ်ႇၵႂႃႇတင်းသဵင်ႈ ဝႃႈၼႆ။

ႁူင်းမူၼ်ႈသိူဝ်း KTV ဢၼ်ၾႆးမႆႈၵႂႃႇၼႆႉ မီးဝႆႉၾၢႆႇၼွၵ်ႈဝဵင်းမူႇၸေႊ မီးၵူၼ်းမၢတ်ႇၸဵပ်းၵႂႃႇၸွမ်း 4 ၵေႃႉ။ လႆႈႁူႉဝႃႈ ပဵၼ်ၵူၼ်းၼႂ်းၸုမ်း ပျီႇတူႉၸိတ်ႉ လူင်ႊထၢင်ႊ ယၢမ်းလဵဝ် လႆႈ သူင်ႇယူတ်းယႃတူဝ်ဝႆႉ တီႈႁူင်းယႃ ဝဵင်းမူႇၸေႊ ဝႃႈၼႆ။