မိူဝ်ႈဝၼ်းတီႈ 14/6/2026 ယၢမ်းဝၢႆးဝၼ်း 2 မူင်းပၢႆ 15 မိၼိတ်ႉ သိုၵ်းမၢၼ်ႈ တင်း ပလိၵ်ႈမၢၼ်ႈ ႁူမ်ႈၵၼ်ၵႂႃႇတီႉၺွပ်းဢဝ် ၵူၼ်းႁဵတ်းၵၢၼ်ၵျႃႊၽျႅၼ်ႉ ၸိူဝ်းလွၵ်ႇလႅၼ်ၵိၼ်ငိုၼ်းပိူၼ်ႈတင်းဢွၼ်ႊလၢႆႊ ဢၼ်မီးယူႇၼႂ်းႁိူၼ်းလင်ၼိုင်ႈ ပွၵ်ႉၵွင်းမူးလွႆ ဝဵင်းမူႇၸေႊ – ယိုတ်းဢဝ်ၵႂႃႇလႆႈ ၵူၼ်းၸိူဝ်းၵဵဝ်ႇၶွင်ႈတႃႇ 94 ၵေႃႉ လႄႈ ၶိူင်ႈၸႂ်ႉတိုဝ်းၼႂ်းၼႃႈၵၢၼ် ၵူႈသႅၼ်းသႅၼ်း ဝႃႈၼႆ။

ၵူၼ်းမိူင်းၵေႃႉယူႇၼႂ်းဝဵင်းမူႇၸေႊ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ႁူင်းႁဵတ်းၵၢၼ်ၵျႃႊၽျႅၼ်ႉၼႆႉ တိုၵ်ႉၵိုတ်းၼမ်ၼႃႇၼႃႇ မိူဝ်ႈလဵဝ် ၶဝ်ၺွပ်းၼႆႉ ပဵၼ်ဢၼ်လဵၵ်ႉဢၼ်ၼွႆႉမၼ်းၵူၺ်း ပေႃးဝႃႈ ၺွပ်း ပျီႇတူႉၸိတ်ႉဢဝ်ၵႂႃႇၼႄတၢင်းႁႄ တီႉလူင်ၵႂႃႇတိၵ်းတိၵ်းဢမ်ႇထၢတ်ႇတႄႉ တေၸၢင်ႈမူတ်းၵႂႃႇလႆႈယူႇ” ဝႃႈၼႆ။

ၾၢႆႇသိုၵ်းမၢၼ်ႈယိုတ်းမိူင်းပိုၼ်ၽၢဝ်ႇဢွၵ်ႇဝႆႉပဵၼ်တၢင်းၵၢၼ်ဝႃႈ ၸုမ်းၸိူဝ်းႁဵတ်းၵၢၼ်ဢဝ်လွင်ႈႁူမ်ႇလူမ်ႈ ၼႂ်းပိုၼ်ႉတီႈၶဝ် တီႉၺွပ်းလႆႈဝႆႉ ၵူၼ်းမိူင်းၶႄႇ တႃႇ 17 ၵေႃႉ လႄႈ ၵူၼ်း မိူင်းမၢၼ်ႈ ၵူၼ်းၸၢႆး 34 ၵေႃႉ ၼၢင်းယိင်း 37 ၵေႃႉ ႁူမ်ႈသဵၼ်ႈ 88 ၵေႃႉ။ ၶိူင်ႈၾူၼ်းၵူႈသႅၼ်းသႅၼ်း 180 လုၵ်ႈ ၊ ၶွမ်ႊပိဝ်ႊတိူဝ်ႊ All In One 44 လုၵ်ႈ၊ Power Station ဢၼ်လဵၵ်ႉ သွင်လုၵ်ႈ၊ ၵႃး Crown ၼိုင်ႈလမ်း လႄႈ Alphard ၼိုင်ႈလမ်း ၼႂ်းဝၢင်းႁိူၼ်းလင်လဵဝ် ဝႃႈၼႆ။

လိူဝ်ၼၼ်ႉ ယင်းသိုပ်ႇၵႂႃႇၶဝ်ႈသွၵ်ႈတီႈႁိူၼ်းလင်ၼိုင်ႈ ၼႂ်းပွၵ်ႉၵွင်းမူးတူင်ႈ တီႉလႆႈၵူၼ်းမိူင်းၶႄႇ ၵူၼ်းၸၢႆး 5 ၵေႃႉ လႄႈ ၼၢင်းယိင်းၵေႃႉၼိုင်ႈ။ တင်း ၾူၼ်းၵူႈသႅၼ်းသႅၼ်း တႃႇ 103 လုၵ်ႈ ၊ ၶွမ်ႊၵူႈသႅၼ်းသႅၼ်း တႃႇ 6 လုၵ်ႈ၊ ၶွမ်ႊလူင်ဢၼ်ၸႂ်ႉတိုဝ်းလႆႈၵူႈလွင်ႈလွင်ႈၼၼ်ႉ တႃႇ 2 လုၵ်ႈ၊ ၶိူင်ႈဝၢႆႊၾၢႆႊ ဢၼ်ဢွၼ်ႇ လုၵ်ႈၼိုင်ႈ လႄႈ CPU သွင်လုၵ်ႈ ၸဵမ်ၸိူဝ်း ၼႆႉ ဝႃႈၼႆ။

ၵူၼ်းၸိူဝ်းႁဵတ်းၵၢၼ်ၵျႃႊၽျႅၼ်ႉ လွၵ်ႇလႅၼ်ၵိၼ်ငိုၼ်းတင်းဢွၼ်ႊလၢႆႊ လႄႈ ၶိူင်ႈၸႂ်ႉတိုဝ်း ၵူႈသႅၼ်းသႅၼ်း ဢၼ်တီႉၺွပ်း ယိုတ်းဢဝ်လႆႈၼၼ်ႉ ယၢမ်းလဵဝ် ၾၢႆႇၸုမ်းပလိၵ်ႈၶဝ် ဢဝ်လိူင်ႈဝႆႉတီႈႁူင်းပလိၵ်ႈ ၼႂ်းဝဵင်းမူႇၸေႊ ပဵၼ်တၢင်းၵၢၼ်ဝႆႉ ဝႃႈၼႆ။

ဝၢႆးလင်သိုၵ်းမၢၼ်ႈယိုတ်းမိူင်း ၸတ်းပၢင်လိူၵ်ႈတင်ႈပွမ်ယဝ်ႉသေ မိၼ်းဢွင်ႇလၢႆႇ လႆႈၶိုၼ်ႈပဵၼ်ၸၼ်ႉၸွမ်ၸိုင်ႈ ၶွတ်ႇၽွတ်ႈၸုမ်းလူင်ပွင်ၸိုင်ႈယဝ်ႉတူဝ်ႈလီငၢမ်း ၾၢႆႇၽူႈမီးပုၼ်ႈ ၽွၼ်းၶဝ် ဝၢင်းၽႅၼ် ႁႂ်ႈၸုမ်းလူင်ပွင်ၸိုင်ႈ ႁဵတ်းသၢင်ႈၵၢၼ်ငၢၼ်းၼႄ တႃႇၶၢဝ်းတၢင်း 100 ဝၼ်းၼၼ်ႉ ၸုမ်းသိုၵ်းမၢၼ်ႈ တင်း ၸုမ်းပလိၵ်ႈ ဢိၵ်ႇပႃးၶႃႈႁၢပ်ႇၵၢၼ်ၶုၼ် ၸိူဝ်းယူႇတႂ်ႈဢႃႇၼႃႇသိုၵ်းမၢၼ်ႈၶဝ် တင်းသဵင်ႈ ဢွၼ်ၵၼ် တႄႇႁဵတ်းၵၢၼ် တီႉၺွပ်းၵူၼ်းႁဵတ်းၵၢၼ်ၵျႃႊၽျႅၼ်ႉ တီႈၼိုင်ႈယဝ်ႉတီႈၼိုင်ႈ သိုပ်ႇဢဝ်ၵူၼ်းမိူင်းၼွၵ်ႈ သူင်ႇပွၵ်ႈၸိုင်ႈမိူင်းၽႂ်မၼ်းၶိုၼ်းယူႇ ဢမ်ႇထၢတ်ႇဢမ်ႇဝၢႆး။

ယၢမ်းလဵဝ် ၵၢင်လိူၼ်ၵျုၼ်ႊၼႆႉၵေႃႈ မိၼ်းဢွင်ႇလၢႆႇ ၸွမ်ၸိုင်ႈယိုတ်းမိူင်း ဢွၼ်ဢဝ် ၸုမ်းပွင်ၵၢၼ် လူင်ပွင်ၸိုင်ႈၶဝ်သေ ၵႂႃႇႁူပ်ႉထူပ်းဢုပ်ႇဢူဝ်းၸွမ်း သျီႊၵျိၼ်ႉၽိင်ႊ ၸွမ်ၸိုင်ႈ မိူင်းၶႄႇ ပိူဝ်ႈတႃႇ ႁူမ်ႈၵၼ်ႁဵတ်းသၢင်ႈ ၵၢၼ်ၵႂၢတ်ႇလၢင်ႉၽဵဝ်ႈမူၺ်ႉၸုမ်းၵျႃႊၽျႅၼ်ႉ ၸွမ်းလႅၼ်လိၼ် လႄႈ ၶူင်းၵၢၼ် သဵၼ်ႈတၢင်းႁွပ်ႈလူၵ်ႈ BRI ပဵၼ်တၢင်းၵၢၼ်ဝႆႉယူႇ ဝႃႈၼႆ။