ဝၼ်းတီႈ 30/08/2026 ယၢမ်းၵၢင်ၼႂ်ၸဝ်ႉ မီးၸုမ်းႁူမ်ႇလူမ်ႈဝၢၼ်ႈဢိူင်ႇ ဝဵင်းတႃႈၶီႈလဵၵ်း ႁႄႉသေၵူတ်ႇထတ်းရူတ်ႉၵႃး တီႈဢိူင်ႇၾၢင်ႇမိၼ်ႇ တီႉလႆႈၵူၼ်း 3 ၵေႃႉ ဢၼ်တီႉမတ်ႉၵူၼ်း 2 ၵေႃႉ သႂ်ႇမႃးၼႂ်းၵူၼ်ႈရူတ်ႉ။

ပလိၵ်ႈတႃႈၶီႈလဵၵ်းတႄႉပိုၼ်ၽၢဝ်ႇဝႆႉဝႃႈ ၵူၼ်း 3 ၵေႃႉၼၼ်ႉပဵၼ် မတႄးဢိၶဵဝ်ႇ လႄႈ ၸွႆးၺီႇၺီႇၶၢၼ်ႉ ၵူၼ်းမိူင်းၽျၢၵ်ႈ၊ ၺၢၼ်ႇလိၼ်းထႅတ်ႉ ယူႇပွၵ်ႉသိူဝ်ၶမ်း ဝဵင်းတႃႈၶီႈလဵၵ်း။ ယၢမ်းလဵဝ်လႆႈတီႉၺွပ်းၸိူဝ်းၶဝ်ဝႆႉတီႈႁူင်းပလိၵ်ႈ ႁွင်ႈလိုၵ်ႉ တႃႈၶီႈလဵၵ်းယဝ်ႉဝႃႈၼႆ။

ၶဝ် 3 ၵေႃႉလၢတ်ႈဝႃႈ – တီႉၵူၼ်းၸိူဝ်းဢွၵ်ႇၼွၵ်ႈႁိူၼ်း ၶၢဝ်းယၢမ်းၵၢင်ၶိုၼ်း တႃႇဢဝ်ၵႂႃႇၶၢႆပၼ် ၸုမ်းႁပ်ႉသိုဝ်ႉၵူၼ်းတႃႇၾိုၵ်းၵၢၼ်သိုၵ်း- ဝႃႈၼႆ။

ၵေႃႉဢၼ်ၺႃးတီႉမတ်ႉမိုဝ်းသေသႂ်ႇမႃးၼႂ်းရူတ်ႉ 2 ၵေႃႉၼၼ်ႉပဵၼ် တိၼ်ႇၵူဝ်ႇလုၼ်ႇလႄႈ ၺီႇဢူး။

တိၼ်ႇၵူဝ်ႇလုၼ်ႇလၢတ်ႈတီႈပလိၵ်ႈဝႃႈ – မၼ်းၸၢႆးၺႃးၸုမ်းၶဝ် တီႉမိူဝ်ႈဝၼ်းတီႈ 29/08/2026 ယၢမ်းၵၢင်ၶိုၼ်း 11 မူင်း ၽွင်းမၼ်းၸၢႆးတိုၵ်ႉပႆမႃးၸွမ်းတၢင်း တၢင်းၼႃႈၵျွင်းၶႄႇ ဢၼ်မီးၼႂ်းပွၵ်ႉ ယၢၼ်ႇဢွင်ႇမျေႇ။

ၺီႇဢူး ၼၼ်ႉသမ်ႉလၢတ်ႈတီႈပလိၵ်ႈဝႃႈ – ဝၼ်းတီႈ 30 ယၢမ်းၵၢင်ၼႂ်ၸဝ်ႉ 1 မူင်း မၼ်းၸၢႆးတိုၵ်ႉပႆတၢင်းယူႇတီႈႁိမ်းပၢႆႉၶဝ်ႈဝဵင်း “ယိၼ်းလီႁပ်ႉတွၼ်ႈ” “ကြိုဆိုပါ၏” ၼႆၼၼ်ႉ။

တင်း 2 ၵေႃႉလၢတ်ႈဝႃႈ – ၽွင်းတိုၵ်ႉပႆတၢင်းယူႇၼၼ်ႉရူတ်ႉလမ်းၼႆႉႁေႃႈမႃးၵိုတ်းႁိမ်းၶၢင်ႈသေ ၵူၼ်း 2 ၵေႃႉလူင်းရူတ်ႉမႃး မႃးလၢတ်ႈဝႃႈ “ပဵၼ်ၽူႈမီးပုၼ်ႈၽွၼ်း- ၶႂ်ႈႁွင်ႉၵႂႃႇ မီးလွင်ႈလူဝ်ႇတွင်ႈထၢမ် ” ၼႆသေ ႁွင်ႉၶိုၼ်ႈရူတ်ႉ။ ၽိူဝ်ႇတေၶိုၼ်ႈရူတ်ႉ ၶဝ်ၵေႃႈ ဢဝ်သေႃးမိုဝ်း လွၵ်ႉမိုဝ်းသေ ယဵတ်ႈသႂ်ႇလင်လူတ်ႉၼၼ်ႉၵမ်းလဵဝ်။ ဝၢႆးၼၼ်ႉလွၵ်ႇငိုတ်ႈပႃးဝႃႈ ပေႃးဢွၵ်ႇသဵင် ပေႃးႁွင်ႉ တေပၢတ်ႇလိၼ်ႉၼႆသေ မီးလွင်ႈပေႃႉထုပ်ႉ ပိတ်ႉပၢပ်းထႅင်ႈလူးၵွၼ်ႇ ဝႃႈၼႆ။

ၵဵဝ်ႇၵပ်းလွင်ႈၼႆႉ ပေႃႈမႄႈလုၵ်ႈဢွၼ်ႇၵူၼ်းမိူင်းဝဵင်းတႃႈၶီႈလဵၵ်း ဢွၼ်ၵၼ်မႆႈၸႂ် ။

ၼၢင်းယိင်း ၸဝ်ႉႁၢၼ်ႉတၢင်းၵိၼ်ၼႂ်းၵၢတ်ႇ လၢတ်ႈၽူႈတွႆႇႁွၵ်ႈဝႃႈ- “ ဢမ်ႇမီးလွင်ႈႁူမ်ႇလူမ်ႈ ၊ ယွၼ်ႉဝႃႈ လုၵ်ႈလၢင်း ၵူၼ်းႁိူၼ်းၸဝ်ႈၵဝ်ႇ ဢမ်ႇပႃးသဵၼ်ႈၸိုဝ်ႈၼႂ်းတႃႇၾိုၵ်းၵၢၼ်သိုၵ်းသေတႃႉ ယွၼ်ႉၵူၼ်းၸုမ်း ၼႆႉသေ ၸၢင်ႈၺႃးတီႉဢဝ်ၵႂႃႇၾိုၵ်းၵၢၼ်သိုၵ်းလႆႈၵူႈမိူဝ်ႈ ။ တေပဵၼ်သိုၵ်းမၢၼ်ႈၸႂ်ႉၵူၼ်းၶဝ်ႁဵတ်းၵေႃႈပဵၼ်လႆႈ။ ဢၼ်ႁဝ်းၶႃႈဢမ်ႇႁူႉၸွမ်းသေ ၺႃးလၵ်ႉတီႉၵႂႃႇၸိူင်ႉၼႆတေမီးပဵၼ်မွၵ်ႈႁိုဝ်ယဝ်ႉ။ သင်ဝႃႈဢမ်ႇၸႂ်ႈၵေႃႈ ၶႂ်ႈႁႂ်ႈ သိုၵ်း ဢမ်ႇၼၼ် ပလိၵ်ႈ ၵူတ်ႇထတ်းတူၺ်းလီလီသေၸဵဝ်းၵႄႈလိတ်ႈပၼ်ဝႆးဝႆး” – ဝႃႈၼႆ။

ၸွမ်းၼင်ႇသဵၼ်ႈမၢႆ ဢၼ်ၽူႈတွႆႇႁွၵ်ႈလႆႈဝႆႉတႄႉ – လွင်ႈလၵ်ႉၵူၼ်း တီႉၵူၼ်းၼႆႉ ဢမ်ႇၵႃးတီႈ ဝဵင်းတႃႈၶီႈလဵၵ်းၵူၺ်း။ မိူၼ်ၼင်ႇဝဵင်းလူင်တူၼ်ႈတီး- လႃႈသဵဝ်ႈ – ၵဵင်းတုင် ၸိူဝ်းၼႆႉၵေႃႈမီး။ ဢၼ်ႁၢႆၼႆႉ ဢမ်ႇၵႃးၵူၼ်းၸၢႆးၵူၼ်းၼုမ်ႇၵူၺ်း ၸိူဝ်းပဵၼ်ၼၢင်းယိင်းဢွၼ်ႇ လႄႈ ၸၢႆးၵူၼ်းဢႃယုယႂ်ႇ ၊ၵူၼ်းၵိၼ်လဝ်ႈၵိၼ်ယႃႈၸိူဝ်းၼႆႉၵေႃႈၺႃးတီႉ။

တင်ႈတႄႇသိုၵ်းမၢၼ်ႈ ပိုၼ်ၽၢဝ်ႇၵူၼ်းမိူင်းႁၢပ်ႇၵၢၼ်သိုၵ်းသေ တေႃႇထိုင်ယၢမ်းလဵဝ် ပဵၼ်ၵႂႃႇ ၸုပ်ႈထိ 27 ယဝ်ႉ။ ၵူၼ်းၼုမ်ႇၵူၼ်းမိူင်းဢမ်ႇၶႂ်ႈၾိုၵ်းၵၢၼ်သိုၵ်းသေဢွၼ်ၵၼ်ဢွၵ်ႇပၢႆႈ။

သိုဝ်ႇၶၢဝ်ႇမၢၼ်ႈ သိုဝ်ႇၶၢဝ်ႇယႂ်ႇလၢႆလၢႆႇဢၼ် ဢွၵ်ႇဝႆႉမိူဝ်ႈလိူၼ်ဢေႃႊၵတ်ႉသ်ၼႆႉဝႃႈ – “ ပၢင်ၾိုၵ်းၵၢၼ်သိုၵ်းၸုပ်ႈထိ 27 ၼႆႉ ႁူဝ်ၼပ်ႉၵူၼ်းမႂ်ႇတႃႇၾိုၵ်းၵၢၼ်သိုၵ်းဢမ်ႇတဵမ်လႄႈလႆႈသုတ်ႉၶၢႆႉၵႂႃႇပိုတ်ႇပၢင်တူၵ်းလိုၼ်း။ မၵ်းမၼ်ႈဝႆႉဝႃႈ ႁူဝ်ၼပ်ႉၵူၼ်းမႂ်ႇၼိုင်ႈၸုပ်ႈၼႆႉ 5000 ၵေႃႉဝႃႈၼႆသေတႃႉ ၸုပ်ႈ 27 ၼႆႉလႆႈပိုတ်ႇၵႂႃႇလူၺ်ႈ ႁူဝ်ၼပ်ႉၵူၼ်း 4000 ၵေႃႉၵူၺ်း။ ၵွပ်ႈၼႆ တႃႇပၢင်ၾိုၵ်းသိုၵ်းမႂ်ႇၸုပ်ႈ 28 ၼႆႉ သိုၵ်းမၢၼ်ႈၸီႉသင်ႇဝႃႈႁႂ်ႈၵဵပ်းသိုၵ်းဝႆႉ လူင်ႈၼႃႈ ၸဝ်ႉၸဝ်ႉဢိတ်းၼိုင်ႈ ” ဝႃႈၼႆဝႆႉ။

သိုပ်ႇလၢတ်ႈထႅင်ႈဝႃႈ – ၵွပ်ႈၼႆလႄႈ ၵၢၼ်ၵဵပ်းသိုၵ်းမႂ်ႇတႃႇၸုပ်ႈမႂ်ႇၼႆႉ သိုၵ်းမၢၼ်ႈ လိုပ်ႈလမ်းတီႉၺွပ်းၵူၼ်းၼုမ်ႇၼႂ်းပိုၼ်ႉတီႈ၊ ၵူၼ်းၼုမ်ႇပၢႆႈမူတ်းယဝ်ႉလႄႈ တီႉပႃးၵူၼ်းၵိၼ်လဝ်ႈၵိၼ်ယႃႈ။ တႃႇဢဝ်ၵႂႃႇတႅၼ်းပႃးတီႈၵူၼ်းပၢႆႈပၢင်သွၼ်ၵၢၼ်သိုၵ်း။ ယၢမ်းလဵဝ်တႄႉ ႁၼ်ၽႂ်ၼိူဝ်သဵၼ်ႈတၢင်း ယၢမ်းၵၢင်ၶိုၼ်း ၵၢင်ဝၼ်းဢမ်ႇဝႄႈ တီႉၺွပ်းဢဝ်။ ၽႂ်တီႉမႃးလႆႈၵေႃႈ သိုဝ်ႉၶၢႆဢဝ်ၼင်ႇၶူဝ်းၼင်ႇၶွင်။ ၵူၼ်းၼႂ်းတူင်ႇဝူင်းသိုၵ်းမၢၼ်ႈယင်းလၢတ်ႈၵၼ်ဝႃႈ – မီးလွၵ်ႈၵၢတ်ႇသိုဝ်ႉၶၢႆၵူၼ်းတႃႇႁၢပ်ႇၵၢၼ်သိုၵ်း -ၼႆလူးၵွၼ်ႇ။

ၵမ်ႈၼမ် ဢၼ်ၵူၼ်းႁၢႆၼႆႉတေပဵၼ်ၼႂ်းဝဵင်းယႂ်ႇဝဵင်းလူင် မိူင်းမၢၼ်ႈပႃးၸဵမ်မိူင်းတႆး – ၼႆ သိုဝ်ႇၶၢဝ်ႇမၢၼ်ႈ တႅမ်ႈတၢင်ႇဝႆႉၼင်ႇၼႆ။