သိုၵ်းၶႄႇၵဝ်ႈၵၢင်ႉ MNDAA တီႉၺွပ်း ၵူၼ်းလၵ်ႉရူတ်ႉၶိူင်ႈ ၊ သၢႆၾႆး သၢႆတွင်း လႄႈ ၵူၼ်းၶၢႆယႃႈ ၼႂ်းဝဵင်းသႅၼ်ဝီသေ တႅမ်ႈလိၵ်ႈၵွင်ႉၶေႃး တၢင်ႇၵႃးပၼ်ႇလဵပ်ႈဝဵင်း ပဵၼ်တူဝ်ယၢင်ႇ ဢမ်ႇလီၼေၵူၼ်းမိူင်း။

ဝၼ်းတီႈ 9/5/2026 ယၢမ်းၵၢင်ၼႂ် 8 မူင်း သိုၵ်းၶႄႇၵဝ်ႈၵၢင်ႉ MNDAA ဢၼ်ပၼ်ႇၵၢၼ်ၽွင်းငမ်း ဝဵင်းသႅၼ်ဝီဝႆႉယူႇၼႆႉ ဢဝ် ၵူၼ်းမီးတၢင်းၽိတ်း 5 ၵေႃႉ တၢင်ႇရူတ်ႉၵႃးသေပၼ်ႇလဵပ်ႈဝဵင်း – ၸႂ်ႉၶဝ် ႁွင်ႉပၢဝ်ႇလွင်ႈဢၼ်ၶဝ်ႁဵတ်းၽိတ်းၼၼ်ႉ ႁႂ်ႈၵူၼ်းမိူင်းလႆႈႁူႉႁၼ်ၸွမ်းသေ ယႃႇႁႂ်ႈလႆႈယိူင်ႈႁဵတ်းၽိတ်း။

ၵူၼ်းမိူင်းသႅၼ်ဝီ လၢတ်ႈၽူႈတွႆႇႁွၵ်ႈဝႃႈ “ၵူၼ်းၸၢႆးသၢမ်ၵေႃႉၼၼ်ႉ ၶဝ်လၵ်ႉရူတ်ႉၶိူင်ႈ ပီႈၼၢင်းၵေႃႉၼၼ်ႉသမ်ႉ မၼ်းၶၢႆယႃႈ ၵူၼ်းၵေႃႉဢၼ်ၸုၵ်းႁိမ်းပီႈၼၢင်းၼၼ်ႉသမ်ႉ လၵ်ႉသၢႆတွင်းၼႆၶႃႈဝႃႇ။ သွင်ၵေႃႉတႄႉ ပဵၼ်ၵူၼ်းၼႂ်းသႅၼ်ဝီၵူၺ်း။ ထႅင်ႈသၢမ်ၵေႃႉတႄႉ ပဵၼ်ၵူၼ်း တၢင်ႇတီႈ။ တႃႇ 3 ၵေႃႉၼႆႉ ပဵၼ်တႆးၵူၺ်းၶႃႈ။ ထႅင်ႈ 2 ၵေႃႉတႄႉ ပဵၼ်မၢၼ်ႈၼႆ ၶႃႈဢေႃႈ” ဝႃႈၼႆ။

ၼႂ်းၵူၼ်း 5 ၵေႃႉၼၼ်ႉ မီးၵေႃႉၼိုင်ႈ ၼုင်ႈၶူဝ်း(ၵူၼ်) သိုၵ်းမၢၼ်ႈဝႆႉ။

ၽွင်းလဵပ်ႈပၼ်ႇဝဵင်းၼၼ်ႉၸိူဝ်းၶဝ်လႆႈႁွင်ႉပၢဝ်ႇလၢတ်ႈဝႃႈ “ ၵဝ်ၶႃႈ ပဵၼ်ၽူႈလၵ်ႉ – ပဵၼ်ၵူၼ်းၶၢႆယႃႈၶႃႈဢေႃႈ” -ဝႃႈၼႆ။

ဝဵင်းသႅၼ်ဝီၼႆႉ ဝၢႆးလင်ပၢင်တိုၵ်းၽႅၼ်ၵၢၼ်ယၼ်ႇသိုၵ်း 1027 မႃး ၵူၼ်းပႅၵ်ႇၼႃႈ ၸိူဝ်းလုၵ်ႉတၢင်ႇဝၢၼ်ႈတၢင်ႇဝဵင်း ၶဝ်ႈယူႇသဝ်းၼမ်။

ၽူႈမၢၵ်ႈ လၢဝ်းပၢၼ်းၶႄႇ ၸိူဝ်းယူႇတၢင်း ဝဵင်းၵၢတ်ႇၵဝ်ႇ (လၢဝ်ႇၵၢႆး) ၸိူဝ်းၼႆႉ မႃးလူင်းတိုၼ်းႁဵတ်းၵၢၼ်ၵႃႉၶၢႆ ၼမ်လူၼ်ႉ။ ႁဵတ်းပၢႆးမၢၵ်ႈမီးၵူႈမဵဝ်း ။ ႁဵတ်းႁႂ်ႈၵူၼ်းမိူင်းပိုၼ်ႉတီႈ ႁႃၵိၼ်လဵင်ႉတွင်ႉယၢပ်ႇၽိုတ်ႇမႃးလိူဝ်ၵဝ်ႇ – ၵူၼ်းပိုၼ်ႉတီႈလၢတ်ႈၼင်ႇၼႆ။

ယၢမ်းလဵဝ် သိုၵ်းၶႄႇၵဝ်ႈၵၢင်ႉ ၵုမ်းၵမ်ပၼ်ႇၵၢၼ်ၽွင်းငမ်းဝႆႉပဵၼ်တၢင်းၵၢၼ်သေ ယွၼ်းႁႅင်းၵူၼ်းသိုၵ်းမႂ်ႇ တီႈၵူၼ်းဝၢၼ်ႈ ၼိုင်ႈဝၢၼ်ႈလႂ် ဢေႇသုတ်းယူႇ 1 ၵေႃႉ။ ႁဵတ်းႁႂ်ႈၵူၼ်း မိူင်း ၵူၼ်းၼုမ်ႇ ဢႃႇယု 18 ၶိုၼ်ႈၼိူဝ် ၸဵမ်ယိင်း ၸဵမ်ၸၢႆး ငိူင်ႉဢွၵ်ႇဝၢၼ်ႈၵိူတ်ႇႁိူၼ်းၼွၼ်း ၽႂ်မၼ်း ယူႇၵူႈဝၼ်း။