ႁၢင်လိူၼ်ၵျူႊလၢႆႊၼႆႉ သိုၵ်းမၢၼ်ႈယိုတ်းမိူင်း ၊ ပလိၵ်ႈ လႄႈ ႁွင်ႈၵၢၼ်ၽွင်းငမ်းၵူႈလွင်ႈလွင်ႈ (ထူၺ်ႇဢူၵ်ႉ) ၶဝ်ၼႂ်းဝဵင်းမိူင်းသူႈ ႁူမ်ႈၵၼ်သေ ၸွမ်းတီႉၺွပ်းဢဝ် ၼုမ်ႇၸၢႆး သႅၼ်း ဢႃႇယု ၶဝ်ႈပႃးၼႂ်းႁၢပ်ႇၵၢၼ်သိုၵ်း ယၢမ်းလဵဝ် ၵူၼ်းၸိူဝ်းၺႃးတီႉၺွပ်းၵႂႃႇၼၼ်ႉ ဢမ်ႇပႆႇလႆႈၶၢဝ်ႇငၢဝ်းသင် ၼႆယဝ်ႉ။
မိူဝ်ႈဝၼ်းတီႈ 28/7/2026 ယၢမ်းႁူဝ်ၶမ်ႈၵူၼ်းၼုမ်ႇ ၼႂ်းဝဵင်းမိူင်းသူႈ 4 ၵေႃႉ ၺႃးၸုမ်းသိုၵ်းမၢၼ်ႈယိုတ်း မိူင်း တီႉၺွပ်းဢဝ်ၵႂႃႇ တၢင်းဢွၵ်ႇဝၢၼ်ႈပၢင်ႇၸွႆး တၢင်းဢၼ်လုၵ်ႉလွႆသႅင် လူင်းမႃးၼၼ်ႉ ဝႃႈၼႆ။
ၵူၼ်းၼုမ်ႇၵေႃႉယူႇဝႆႉၼႂ်းမိူင်းသူႈၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ “တႆးၵေႃႉၶႃႈၵေႃႉၼိုင်ႈၵေႃႈ ၺႃး သိုၵ်းမၢၼ်ႈၺွပ်းဢဝ်ၵႂႃႇၶႃႈဢေႃႈ။ မိူဝ်ႈလဵဝ်ၼႆႉ ပေႃးၶဝ်ႁၼ် ၵူၼ်းၼုမ်ႇၵႂႃႇမႃး ၸွမ်းတၢင်း ၶၢဝ်းၵၢင်ၶမ်ႈ ႁူဝ်ၶမ်ႈၼႆႉ ႁေႉၵိုတ်းႁႄ ၺွပ်းဢဝ်ၵႂႃႇတိၵ်းတိၵ်း။ ၵွပ်ႈဝႃႈၶဝ်ဢမ်ႇႁႃလမ်း ၺွပ်းဢဝ် ပေႃးပၼ်းၸီးပၼ်း ၸင်ႇ ဢမ်ႇႁဵတ်းႁႂ်ႈသုၵ်ႉသၵ်ႉယုင်ႈယၢင်ႈသင်လႄႈ ၽႂ်ၵေႃႈ ဢမ်ႇႁူႉဝႃႈ ၶဝ်ၺွပ်း။ ဢၼ်ပႂ်ႉၺွပ်းဢဝ်ၵူၼ်း ၼႆႉ ပႃးသိုၵ်းမၢၼ်ႈ၊ ပလိၵ်ႈ (ယႄး)၊ တင်း ထူၺ်ႇဢူၵ်ႉၶဝ်ၸိူဝ်းၼႆႉႁႄဢေႃႈ” ဝႃႈၼႆ။
ၵူၼ်းၼုမ်ႇၼႂ်းဝဵင်းမိူင်းသူႈ ၸိူဝ်းၺႃးသိုၵ်းမၢၼ်ႈ တီႉၺွပ်းဢဝ်ၵႂႃႇယဝ်ႉၼၼ်ႉ ဢမ်ႇႁူႉလႆႈႁူဝ်ၼပ်ႉတႅတ်ႈ တေႃးသေတႃႉ ၸွမ်းၼင်ႇသဵၼ်ႈမၢႆ ဢၼ်ၵူၼ်းမိူင်းပိုၼ်ႉတီႈ ႁၼ်တႂ်ႈၼႃႈတႂ်ႈတႃတႄႉ ယၢမ်းလဵဝ်ၵူၼ်းၼုမ်ႇ ပႃးၵႂႃႇ 4 ၵေႃႉယဝ်ႉသေ ဢမ်ႇႁူႉဝႃႈ ႁွင်ႉၵႂႃႇဝႆႉတီႈလႂ်။ ၵူၼ်းၸိူဝ်းၺႃး ၺွပ်းၵႂႃႇၼၼ်ႉၵေႃႈ ဢမ်ႇႁၼ်လႆႈ ဢွၵ်ႇမႃးၶိုၼ်းသေၵေႃႉ။ ယွၼ်ႉသင်လႄႈ တီႉၺွပ်းဢဝ်ၶဝ်ၵႂႃႇၼႆၵေႃႈ ဢမ်ႇလႆႈႁူႉလွင်ႈတၢင်းတႅတ်ႈ တေႃး ၼႆ ၵူၼ်းမိူင်းပိုၼ်ႉတီႈလၢတ်ႈၼင်ႇၼႆ။
သိုၵ်းမၢၼ်ႈၼႆႉ ၸွမ်းတီႉၺွပ်းဢဝ် ၵူၼ်းၼုမ်ႇၼႂ်းဝဵင်းမိူင်းသူႈ ၶဝ်ႈႁၢပ်ႇၵၢၼ်သိုၵ်းၼႆႉ တႄႇပဵၼ်မိူဝ်ႈပူၼ်ႉ မႃး သွင်လိူၼ် ႁၢၼ်ႉတေႃႇထိုင်ယၢမ်းလဵဝ်ၵေႃႈ ပႆႇၵိုတ်းလွင်ႈၵၢၼ်တီႉ ၺွပ်းၵူၼ်းၼုမ်ႇလႄႈ ႁဵတ်းႁႂ်ႈၵူၼ်း မိူင်းၸိူဝ်းယူႇၼႂ်းပိုၼ်ႉတီႈ ဢွၼ်ၵၼ်မႆႈၸႂ်လွင်ႈႁူမ်ႈလူမ်ႈ ၵၢၼ်ၵႂႃႇမႃးၵူဝ် ၺႃးသိုၵ်းမၢၼ်ႈႁေႉၵူတ်ႇထတ်း သေ ႁွင်ႉၵႂႃႇ – ၼႆယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ