ၵူၼ်းၸၢႆး 2 ၵေႃႉ ယူႇဝဵင်းတူၼ်ႈတီး ၸိုင်ႈတႆးပွတ်းၸၢၼ်းထဵင်မေႃးၽိတ်းၵၼ်သေ ဢဝ်မိတ်ႈတႅင်း ၵူၼ်းၸၢႆးၵေႃႉၼိုင်ႈ လူႉတၢႆထင်ႇတီႈ ၼႆယဝ်ႉ ။
ဝၼ်းတီႈ 9/7/2026 ၵူၼ်းၸၢႆးသွင်ၵေႃႉ ယူႇပွၵ်ႉၸိင်ႇပၢၼ်း ၸိုဝ်ႈ – ၵူဝ်ႇထုၼ်းထုၼ်းၼၢႆႇ (ကိုထွန်းထွန်းနိုင်) လႄႈ ၵူဝ်ႇထႅၵ်ႉပၢႆႇမူး (ကိုထက်ပိုင်မှူး) ၵိၼ်လဝ်ႈယူႇ တီႈ ႁၢၼ်ႉလဝ်ႈ ၼိၼ်းသီႇ (နှင်းဆီ) ဢၼ်မီးတီႈႁူဝ်တၢင်းၼၼ်ႉ ၽိတ်းမေႃးထဵင်ၵၼ် ထိုင်တီႈဢဝ်မိတ်ႈတႅင်းၵၼ် ၵူဝ်ႇထႅၵ်ႉပၢႆႇမူး တၢႆထင်ႇတီႈ ၼႆယဝ်ႉ ။
ၵူၼ်းၸၢႆးဝဵင်းတူၼ်ႈတီးၵေႃႉၼိုင်ႈလၢတ်ႈၽူႈတွႆႇႁွၵ်ႈဝႃႈ -“ၶဝ်သွင်ၵေႃႉၼၼ်ႉ ပဵၼ်ၵူၼ်းမိုတ်ႈၵၼ်ယူႇ ၵူၺ်းဢမ်ႇပေႃးမႅၼ်ႈၵၼ် ၊ မိူဝ်ႈဝႃးၼႆႉ ပဵၼ်ႁိုဝ်ၵႂႃႇၵေႃႈဢမ်ႇႁူႉ ထဵင်မေႃးၵၼ်သေ ၽိတ်းၵၼ်ၼႆ ၵူဝ်ႇထႅၵ်ႉပၢႆႇမူး ၺႃးတႅင်း 8 ၵမ်းတၢႆထင်တီႈ”- ဝႃႈၼႆ ။
ဝၢႆးၼၼ်ႉ ပလိၵ်ႈသိုၵ်းမၢၼ်ႈတီႉၺွပ်း ၵူဝ်ႇထုၼ်းထုၼ်းၼၢႆႇၵေႃႉပူၼ်ႉပႅၼ်ၼၼ်ႉသေ ဢဝ်လိူင်ႈလူၺ်ႈတၢင်းၽိတ်းမတ်ႉတႃ 302 – တင်ႈၸႂ်ၶႃႈႁႅမ်ၵူၼ်းတၢႆ ၼၼ်ႉသေ ၵုမ်းၶင်တူဝ်ဝႆႉတီႈႁူင်းပလိၵ်ႈဝဵင်းတူၼ်ႈတီး ။
လိူဝ်ၼၼ်ႉ တီႈဝဵင်းတူၼ်ႈတီးၼႆႉ ရူတ်ႉၶိူင်ႈ၊ ၵႃး လႄႈ ၶူဝ်းၶွင်ႁိူၼ်းယေး ၵူၼ်းမိူင်း ၵမ်းၵမ်းႁၢႆၽူႈလၵ်ႉၸၵ်ႉၶုတ်ႈၼမ် ၵႆႉႁႃလၵ်ႉၶၢဝ်းၵၢင်ၶမ်ႈ ၵၢင်ၶိုၼ်း ၼႃႈမိူင်းၸမ်လႅင်းၸိူဝ်းၼႆႉ သေဢမ်ႇၵႃး ၵၢင်ဝၼ်းလႅတ်ႇမႆႈတႅင်ႈတႅင်ႈၵေႃႈ ၽူႈလၵ်ႉၵႆႉလၵ်ႉသွၵ်ႈတဝ်ႁိူၼ်းယေးလႄႈ ႁဵတ်းႁႂ်ႈၵူၼ်းမိူင်းဢမ်ႇမီးလွင်ႈႁူမ်ႇလူမ်ႈဝႆႉၼႆယဝ်ႉ ။
ၵူၼ်းၸၢႆးဝဵင်းတူၼ်ႈတီးသိုပ်ႇလၢတ်ႈထႅင်ႈဝႃႈ -“ တီႈဝဵင်းတူၼ်ႈတီးၼႆႉ ဢမ်ႇၵတ်းယဵၼ်မိူၼ်မိူဝ်ႈဢွၼ်တၢင်းယဝ်ႉ ၊ ၵႆႉလႆႈငိၼ်းၶႃႈႁႅမ်ၵၼ် ၊ လၵ်ႉၸူၼ်ၵၼ်ၼႃႇ ၊ ပေႃးၵၢင်ၶမ်ႈၵၢင်ၶိုၼ်းၵေႃႈဢမ်ႇႁတ်းဢွၵ်ႇတင်းၼွၵ်ႈ ၊ ဢမ်ႇမီးလွင်ႈႁူမ်ႇလူမ်ႈသင်”- ဝႃႈၼႆ ။
မိူၼ်ၼင်ႇၼႆ ၽွင်းလိူၼ်တီႊသႅမ်ႊပိူဝ်ႊ ပီ 2025 ၼၼ်ႉၵေႃႈ လုၵ်ႈဢွၼ်ႇၸၢႆး Grade – 10 ယူႇပွၵ်ႉ ၽြႃးၽိူၵ်ႇႁၢႆၵႂႃႇႁိုင် 6 ဝၼ်းၸင်ႇထူပ်းႁၼ်တူဝ်တၢႆ ။ ပဵၼ်ၼမ်ႉမိုဝ်းၽႂ် ယွၼ်ႉသင်ၼႆၽႂ်ဢမ်ႇလႆႈႁူႉ ပၵ်းပိူင်မၢႆမီႈၸိုင်ႈမိူင်းဢမ်ႇႁူမ်ႇငမ်းၼိူဝ်ၵူၼ်းမိူင်းသေဢိတ်းယဝ်ႉ ဝႃႈၼႆ။
ယၢမ်းလဵဝ် တီႈဝဵင်းတူၼ်ႈတီး ပလိၵ်ႈသိုၵ်းမၢၼ်ႈ ဢိၵ်ႇပႃး ၸုမ်းပိဝ်ႇသေႃးထီး တႂ်ႈသိုၵ်းမၢၼ်ႈယိုတ်းမိူင်း ပႂ်ႉၵူတ်ႇထတ်း ရူတ်ႉၵႃး ဢၼ်ဢမ်ႇမီးဝႂ်လၢႆႊသိၼ်ႊ၊ ဢၼ်ဢမ်ႇၸွမ်း မၢႆမီႈတၢင်း တီႈၵၢင်ဝဵင်းတူၼ်ႈတီး လၢႆလၢႆတီႈ။ ပွတ်းၵၢင်ၼႂ်ၵူၺ်း တီႉၺွပ်းလႆႈ ရူတ်ႉၶိူင်ႈလၢႆလၢႆလမ်းၼႆ ၵူၼ်းပိုၼ်ႉတီႈတူၼ်ႈတီး လၢတ်ႈၼင်ႇၼႆ။
ႁၢင်ႈ – ၵူဝ်ႇထုၼ်းထုၼ်းၼၢႆႇၵေႃႉတႅင်းဢူၺ်းၵေႃႉမၼ်းတၢႆလႄႈ ထုၵ်ႇပလိၵ်ႈသိုၵ်းမၢၼ်ႈတီႉၺွပ်းဝႆႉ ( crd to owner )
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ