ဝၼ်းတီႈ 15/01/2025 ၵူႈႁၵ်ႉ LGBTQ+ မိူင်းထႆး မွၵ်ႈ 50 ၵူႈ လူင်းလၢႆးမိုဝ်းၵူပ်ႉၵူႈၵၼ်ပဵၼ်တၢင်းၵၢၼ် တီႈဝဵင်းလူင်ၵုင်းထဵပ်ႈ (မိူင်းၵွၵ်ႇ) ၸိုင်ႈထႆး ၼႂ်းၼၼ်ႉ ပႃးၸဝ်ႈပၢႆးမွၼ်း၊ ၽူႈၸိုဝ်ႈသဵင်လိုဝ်းလင် လၢႆလၢႆၵူႈ။
ယၢမ်းဝၢႆးဝၼ်းမွၵ်ႈ 5 မူင်း ၸွမ်ၽွင်းလူင်ၸိုင်ႈထႆး ၼၢင်းသၢဝ်ၽႄႊထွင်ႊထၢၼ်ႊ သျိၼ်ႊၼဝတ်း တင်ႈၸႂ် မႃးတူင်ႉတၵ်ႉထၢႆႇႁၢင်ႈၵိုၵ်းၸိူဝ်းၶဝ် တီႈႁွင်ႈၵၢၼ် ထႆးၵူႈၾႃႉ (ไทยคู้ฟ้า)။
ၼႂ်းဢၼ်လူင်းလၢႆးမိုဝ်းၵူပ်ႉၵူႈၵၼ် ဝၼ်းတီႈ 15 တႃႇ 50 ၵူႈၼၼ်ႉ ၵမ်ႈၽွင်ႈပဵၼ် ၸၢႆးႁၵ်ႉၸၢႆး ၊ ၵမ်ႈၽွင်ႈပဵၼ်ယိင်းႁၵ်ႉယိင်း၊ ၵမ်ႈၽွင်ႈ ပဵၼ်ၵူၼ်းၽႃႇတတ်းလႅၵ်ႈငႅင်ႈဝႆႉ။
ၸွမ်းၼင်ႇ သၽႃးၸိုင်ႈထႆး လႆႈဢုပ်ႇၵုမ်တူၵ်းလူင်းလႆႈၸႂ် တႅပ်းတတ်းမိူဝ်ႈ ပီ 2024 ဝႃႈ မိူင်းထႆး ထုၵ်ႇ မီးမၢႆမီႈ သုၼ်ႇလႆႈၵူပ်ႉၵူႈၽဵင်ႇပဵင်းၵၼ်ၼႆသေ ၸင်ႇတၢင်ႇထိုင်ၸဝ်ႈမုၼ်ယႂ်ႇၶုၼ်ႁေႃၶမ်းထႆး – လႆႈလူင်းလၢႆးမိုဝ်းမၵ်းမၼ်ႈ ပၼ်မိူဝ်ႈၵၢင်လိူၼ်ဢွၵ်ႊထူဝ်ႊပိူဝ်ႊ 2024 ပူၼ်ႉမႃး။
မၢႆမီႈၼႆႉ တေၸႂ်ႉလႆႈပဵၼ်တၢင်းၵၢၼ် ၼႂ်းဝၼ်းတီႈ 23/01/2025 ၼႆႉ။
ၸွမ်ၽွင်းလူင်ၸိုင်ႈထႆး ၼၢင်းသၢဝ်ၽႄႊထွင်ႊထၢၼ်ႊ သျိၼ်ႊၼဝတ်ႊ မွၵ်ႇလၢတ်ႈၶေႃႈၵႂၢမ်းႁူမ်ၸူမ်း တီႈပၢင်ထၢႆႇ ႁၢင်ႈၵူႈႁၵ်ႉ LGBTQ+ 50 ၵူႈ ၼၼ်ႉဝႃႈ – ယိၼ်းလီႁူမ်ၸူမ်းၸွမ်း ၵူႈႁၵ်ႉ 50 ၵူႈ ၼႂ်းဝၼ်းမိူဝ်ႈၼႆႉ။ ဢဝ်ၵုင်ႇမုၼ် လွင်ႈမိူင်းထႆး ပဵၼ်ၸိုင်ႈမိူင်း ဢၼ်ၶိုၼ်ႈယႂ်ႇၶိုတ်းၵၢပ်ႈပၢၼ်ပဵင်း လုမ်ႈၾႃႉ။ တီႈမီးမၢႆမီႈ သုၼ်ႇလႆႈၵူပ်ႉၵူႈၽဵင်ႇပဵင်း၊ မိူင်းထႆး ပဵၼ်မိူင်းဢွၼ်တၢင်းသုတ်း ၼႂ်းဢႃႊသီႊယၼ်ႊလႄႈ ပဵၼ်မိူင်းထီႉသၢမ် ၼႂ်းၵုၼ်ၶဵဝ်ဢေႊသျႃႊ တီႈဢၼ်မီးမၢႆမီႈႁူမ်ႇငမ်းတူၺ်းလူ ၵႅတ်ႇၵင်ႈပၼ်တွၼ်ႈတႃႇ LGBTQ+ ၶဝ်တေၵူပ်ႉၵူႈၵိၼ်ၶႅၵ်ႇ – ဝႃႈၼႆ။
သိုပ်ႇလၢတ်ႈဝႃႈ – တႃႇတေမီးမၢႆမီႈ ပၵ်းပိူင်ပၼ်သုၼ်ႇလႆႈ LGBTQ+ ၵူပ်ႉၵူႈၵၼ် ပဵၼ်တၢင်းၵၢၼ်ၼႆႉ မိူင်းထႆး လႆႈပႂ်ႉမႃး ၶၢဝ်းတၢင်း 20 ပီ၊ ၸင်ႇမႃးဢွင်ႇမၢၼ်ယၢမ်းလဵဝ်။ ၵမ်းၼႆႉတႄႉ ၽႂ်ၵိူတ်ႇမႃးပဵၼ်သင် ၵေႃႈယဝ်ႉ ၶႂ်ႈႁၵ်ႉယိင်းႁိုဝ်ၸၢႆးၵေႃႈ ႁၵ်ႉလႆႈ၊ ဢမ်ႇမီးၶေႃႈႁၢမ်ႈလႄႈ ၸႅၵ်ႇယႅၵ်ႈယိင်းၸၢႆး၊ သုၼ်ႇလႆႈမီး ၽဵင်ႇပဵင်းၵၼ်ၵူႈၵေႃႉ ၵူပ်ႉၵူႈလႆႈလွတ်ႈလွတ်ႈလႅဝ်းလႅဝ်း – ဝႃႈၼႆ။
ၼႂ်းဝၼ်းတီႈ 23/01/2025 ၼႆႉ ၵူႈႁၵ်ႉ LGBTQ+ ၶဝ်တေၸတ်းပၢင်ၵူပ်ႉၵူႈသွၼ်ႉမိင်ႈၵိၼ်ၶႅၵ်ႇၵၼ် ၽႃႊရႃႊ ၵွၼ်ႊႁေႃႊလ် ၼၼ်ႉၵေႃႈ ႁႂ်ႈၵူၼ်းမိူင်း ပိုတ်ႇၸႂ်ဝႆႉၼၵ်း မၵ်းမၼ်ႈ ၵမ်ႉယၼ်ပၼ်ႁႅင်းၶဝ်ႈႁူမ်ႈသေၵမ်း- မၼ်းၼၢင်းလၢတ်ႈၵႂႃႇပႃးထႅင်ႈၼင်ႇၼႆ။
တီႈပၢင်ထၢႆႇႁၢင်ႈ ႁူမ်ႈၵၼ် တီႈတိုၵ်းထႆႊၵူႈၾႃႉ ဝၼ်းတီႈ 15/01/2025 ၼၼ်ႉ ၸုမ်းၽွင်းလူင် မိူၼ်ၼင်ႇ ၽွင်းလူင်ႁွင်ႈၵၢၼ် သုၼ်ႇလႆႈၵူၼ်း၊ ၽွင်းလူင်ႁွင်ႈၵၢၼ် ၾၢႆႇႁုၼ်ႈမုၼ်း တူင်ႇဝူင်းၵူၼ်းလႄႈ ၵၢၼ်တူၺ်းလူၵူၼ်း၊ ႁွင်ႈၵၢၼ် ၽွင်းလူင်ၾၢႆႇၼႂ်းမိူင်း၊ ၽူႈၵွၼ်းၸႄႈတွၼ်ႈ ၵုင်းထဵပ်ႈ၊ ၽူႈၵွၼ်းႁွင်ႈၵၢၼ် ၾၢႆႇဢႅဝ်ႇယဵမ်ႈတွင်ႈတဵဝ်းမိူင်းထႆး ၸိူဝ်းၼႆႉ ၵေႃႈမႃးၸွမ်း ၸွမ်ၽွင်းလူင်ၸိုင်ႈထႆး။
ၼွၵ်ႈလိူဝ်ၼၼ်ႉ ၽွင်းတၢင်လူင်မိူင်းဢိင်းၵလဵတ်ႈ၊ ၾရင်ႇသဵတ်ႈ၊ ဢမေႊရိၵၼ်ႊ ၵဵဝ်ႇလူၺ်ႈမိူင်းထႆး ဢိၵ်ႇပႃးတင်း ၽူႈႁပ်ႉပုၼ်ႈၽွၼ်း ၵပ်းသိုပ်ႇၵပ်းသၢၼ် ႁူမ်ႈၵၢၼ်မိူင်းထႆးလႄႈ ၸၢတ်ႈၸိုင်ႈလုမ်ႈၾႃႉ ၶဝ်ၵေႃႈ မႃးၶဝ်ႈႁူမ်ႈယိၼ်းလီဢဝ်ၵုင်ႇမုၼ် မိူင်းထႆးပိုတ်ႇၵႂၢင်ႈ – သေလႄႈ ထၢႆႇႁၢင်ႈၵိုၵ်းၸွမ်း ၸွမ်ၽွင်းလူင်ထႆးလႄႈ ၵူႈႁၵ်ႉ LGBTQ+ ။
ဢၢင်ႈဢိင် – Khaosod, Mathichon, ไทยคู้ฟ้า
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ