ၸုမ်းၽွင်းလူင်မိူင်းထႆး ဢုပ်ႇၵုမ်ၵၼ် တႃႇမၵ်းမၼ်ႈပၵ်းပိူင် လိုပ်ႈႁႅင်းၵၢၼ်ၸိူဝ်းႁဵတ်းၽိတ်းမၢႆမီႈ ဢွၵ်ႇၼွၵ်ႈမိူင်းၸိုင်ႈထႆး။
ဝၼ်းတီႈ 14/07/2026 ၸုမ်းၽွင်းလူင် လူင်ပွင်ၸိုင်ႈထႆးတႅပ်းတတ်း ယွမ်းႁပ်ႉႁၼ်လီၸွမ်း မၢႆမီႈယုၵ်းယၢင်ႇ ဢၼ်ၸုမ်း ၽွင်းလူင် တႅမ်ႈဢွၵ်ႇ ၵဵဝ်ႇလူၺ်ႈၵၢၼ်လိုပ်ႈႁႅင်းၵၢၼ်ယၢၼ်မိူင်းဢွၵ်ႇၼွၵ်ႈမိူင်း ။ ယိူင်းဢၢၼ်း တႃႇၶိုၼ်းမႄး ပၵ်းပိူင် ႁႅင်းၵၢၼ် တႃႇၵုမ်းႁႅင်းၵၢၼ်/ၵူၼ်းၼွၵ်ႈမိူင်း ႁႂ်ႈၶိုဝ်းယမ် ဝႃႈၼႆ။
ပၵ်းပိူင်ၼႆႉ ပဵၼ်တႃႇတေသူင်ႇတူဝ်ႁႅင်းၵၢၼ်ယၢၼ်မိူင်း ၸိူဝ်းႁဵတ်းၽိတ်းပၵ်းပိူင်ၸိုင်ႈမိူင်း ဢမ်ႇၼၼ် ၸိူဝ်းလၵ်ႉၶဝ်ႈ မိူင်းမႃး လူၺ်ႈဢမ်ႇမႅၼ်ႈၸွမ်းပိူင်ၼၼ်ႉသေ လူင်ပွင်ၸိုင်ႈမိူင်းထႆးၶဝ် တေၸႂ်ႉတိုဝ်းပဵၼ်တၢင်းၵၢၼ်ၵႂႃႇ ပွၵ်ႈၵမ်းႁႅၵ်ႈ ။
ယိူင်းဢၢၼ်းတႃႇႁၵ်ႉသႃလွင်ႈၵတ်းယဵၼ်ၼိမ်သဝ်းၸိုင်ႈမိူင်း လႄႈ ႁႂ်ႈၵူၼ်းမိူင်းလႆႈယူႇသဝ်းလူၺ်ႈမီးသိလ်မီးထမ်းၼႆသေ ၵႅမ်ၸွမ်ၽွင်းလူင်မိူင်းထႆးၶဝ် ၸင်ႇပၼ်တၢင်းၶႆႈၸႂ် ယိုၼ်ႈတၢင်ႇဝႆႉ ၼႆယဝ်ႉ။
လႆႈႁူႉဝႃႈ ၵူၼ်းၸိူဝ်းတေထုၵ်ႇလိုပ်ႈဢွၵ်ႇၸိုင်ႈမိူင်းထႆးၼၼ်ႉ မၵ်းမၼ်ႈဝႆႉပဵၼ် 6 သႅၼ်း။ ပဵၼ်ၵူၼ်းၸိူဝ်းဢမ်ႇတေႃႇဢႃယု ဝီႊသႃႊသေလၵ်ႉယူႇဝႆႉ၊ ၵူၼ်းၸိူဝ်းႁဵတ်းၽိတ်း ပၵ်းပိူင်မၢႆမီႈႁႅင်းၵၢၼ်ယၢၼ်မိူင်း၊ ၵူၼ်းၸိူဝ်းဢမ်ႇႁဵတ်းၸွမ်း ပၵ်းပိူင်ၵၢၼ်ပၢႆးမၢၵ်ႈမီး ၸွမ်းၼင်ႇတမ်းဝၢင်းဝႆႉသေ လၵ်ႉလွမ်ႁဵတ်းၵၢၼ်ပၢႆးမၢၵ်ႈမီး ၼႂ်းမိူင်းထႆး၊ ၵူၼ်းၸိူဝ်းယိပ်းဝတ်းဝႂ်ပွမ်၊ ၵူၼ်းၸိူဝ်းႁဵတ်းၽိတ်းပၵ်းပိူင်မၢႆမီႈ ဢၼ်မီးတူတ်ႈတၢမ်ႇၶွၵ်ႈ ၼမ်လိူဝ် 3 ပီ ၸဵမ်ၸိူဝ်းၼႆႉ။
သင်ဝႃႈႁႅင်းၵၢၼ်ယၢၼ်မိူင်း ဢမ်ႇၼၼ်ၵူၼ်းၸိူဝ်းမီးသုၼ်ႇယူႇၼိူဝ်ၽႅၼ်ႇလိၼ်ၸိုင်ႈထႆး ႁဵတ်းၽိတ်း ဢၼ်လၢတ်ႈမႃး 6 ၶေႃႈပႃႈၼိူဝ်ႈၼႆႉ ဢမ်ႇၼၼ် ၵူၼ်းၸိူဝ်းၶဝ်ႈပႃးၼႂ်းၶၵ်ႉၵၢၼ်ႁဵတ်းၽိတ်း လႄႈ ပဵၼ်ငဝ်ႈငႃႇသူၼ်းသေႃႇပၼ်ႁႅင်း ႁႂ်ႈမီးလွင်ႈႁဵတ်းၽိတ်း ၸိူဝ်းၼႆႉၵေႃႈ – ၼပ်ႉသွၼ်ႇဝႃႈ မီးတၢင်းၽိတ်းယႂ်ႇ ထိုင်တီႈၸၢင်ႈဢဝ်လိူင်ႈပၼ်တူတ်ႈတၢမ်ႇ လိုပ်ႈဢွၵ်ႇမိူင်းၸိုင်ႈထႆး ၵမ်းသိုဝ်ႈ – ၼႆၽူႈၶၢၼ်ပၢၵ်ႇ လုမ်းၽွင်းလူင်ၸိုင်ႈထႆးလၢတ်ႈ။
ၵူၼ်းၸိူဝ်းႁဵတ်းၽိတ်းပၵ်းပိူင်သေၺႃးလိုပ်ႈဢွၵ်ႇမိူင်းယဝ်ႉၼၼ်ႉ သင်မီးဝၢၼ်ႈမိူင်းတၢင်ႇမိူင်း (ဢၼ်ဢမ်ႇၸႂ်ႈ ဝၢၼ်ႈၵိူတ်ႇမိူင်းၼွၼ်းၸဝ်ႈၵဝ်ႇၼၼ်ႉ) မႃးယွၼ်းႁပ်ႉႁွင်းဢဝ်ၸိုင် လူင်ပွင်ၸိုင်ႈထႆး တေယွမ်းမွပ်ႈပၼ်ၵႂႃႇယူႇသေတႃႉ ၵူၼ်းၵေႃႉတေမႃးႁပ်ႉၼၼ်ႉ ပဵၼ်ၽူႈႁဵတ်းၽိတ်းဝႆႉၸိုင် တၵ်းတေလႆႈႁပ်ႉပုၼ်ႈၽွၼ်းပႃး ၵႃႈလဵင်ႉလူတူၺ်းထိုင် လႄႈ ၵႃႈၸႂ်ႉၸၢႆႇတင်းသဵင်ႈ ပႃးၸဵမ်ငိုၼ်းတူတ်ႈတၢမ်ႇ ဢၼ်ၵေႃႉႁဵတ်းၽိတ်းတေလႆႈသၢႆႈတႅၼ်းပၼ်ၸိုင်ႈမိူင်းထႆး (ၸွမ်းၼင်ႇမၢႆမီႈၸိုင်ႈမိူင်းမီးဝႆႉ) ၼၼ်ႉတင်းသဵင်ႈ ၼႆယဝ်ႉ။
ၼွၵ်ႈလိူဝ်ၼၼ်ႉ တူဝ်ႁႅင်းၵၢၼ်/ ၵေႃႉဢၼ်ထုၵ်ႇပၼ်တူတ်ႈတၢမ်ႇလိုပ်ႈဢွၵ်ႇၼွၵ်ႈမိူင်းၼၼ်ႉၵေႃႈ တၵ်းလႆႈလူင်းလၢႆးမိုဝ်းၼိူဝ်ၽိုၼ်လိၵ်ႈၽိုၼ်လၢႆး ယွမ်းႁပ်ႉတၢင်းၽိတ်းလႄႈတူတ်ႈတၢမ်ႇ ဢၼ်ၸိုင်ႈမိူင်းပၼ် လူၺ်ႈလိုပ်ႈဢွၵ်ႇၼွၵ်ႈမိူင်းၼၼ်ႉပႃး- ၼႂ်းပၵ်းပိူင်ယုၵ်းယၢင်ႇၼၼ်ႉပႃးဝႆႉၼင်ႇၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ