လိူၼ်ႁႃႈမႂ်ႇမႃးၼႆႉ တၢင်ႉႁႅင်းလူမ်းမႆႈသုင် ႁဵတ်းႁႂ်ႈၼမ်ႉၼွင်ႁၢႆးယႃႈႁႅင်ႈ ထိုင်တီႈလိၼ်တႅၵ်ႇၶၢပ်ႇ ၸဝ်ႈသူၼ်ၼႂ်းၼွင်ယၢပ်ႇၽိုတ်ႇတႃႇၽုၵ်ႇသွမ်ႈ။

ထုင်ႉၼွင်ႁၢႆးယႃႈ ၸႄႈဝဵင်းယွင်ႁူၺ်ႈ ၸိုင်ႈတႆးပွတ်းၸၢၼ်းၼႆႉ ပဵၼ်ပိုၼ်ႉတီႈဢၼ်ႁၢင်ႈလီလႄႈ ပိုၼ်ႉတီႈဢၼ်မီးငိုၼ်းၶဝ်ႈၸိုင်ႈမိူင်းၼမ်သုတ်းထိၼိုင်ႈၼႂ်းၸိုင်ႈမိူင်းႁူမ်ႈတုမ်။ ၵူၺ်းၵႃႈဝၢႆးလင် တၢင်းပဵၼ်ၶူဝ်ႊဝိတ်ႉၶဝ်ႈမႃးၼႆႉသိုၵ်းမၢၼ်ႈၵေႃႈဢမ်ႇသႂ်ႇၸႂ်လုမ်းလႃးပူၵ်းပွင်လႄႈ  ထုင်ႉၼွင်ႁၢႆးယႃႈ ထူပ်းၽေးသၽႃႇဝ မႃးၵူႈပီ။  

 ပီ 2024 – 25 ၼၼ်ႉ ထုင်ႉၼွင်ႁၢႆးယႃႈ လႆႈႁူပ်ႉၽေးၼမ်ႉၼွင်းထူမ်ႈႁၢဝ်ႈႁႅင်း လႄႈ ၽေးဢိင်ႇ သၼ်ႇ ၽႅၼ်ႇလိၼ်ဝႆ၊ လွၵ်းၼႃးၽုၵ်ႇသွမ်ႈ လူႉသုမ်း ၼပ်ႉႁူဝ်ပၢၵ်ႇဢေႊၶိူဝ်ႊ။  

ပီၼႆႉၵေႃႈၶဝ်ႈမႃးၼႂ်းလိူၼ်ႁႃႈမႂ်ႇၼႆႉ ၼွင်ႁၢႆးယႃႈ ႁႅင်ႈထိုင်တီႈပိုၼ်ႉၼွင်ၼၼ်ႉလိၼ်တႅၵ်ႇၶၢပ်ႇ ၵူၼ်းပိုၼ်ႉတီႈဢမ်ႇၸၢင်ႈႁဵတ်းၵၢၼ်ၽုၵ်ႇသွမ်ႈ။

ၼၢင်းယိင်း ၸဝ်ႈသူၼ်ၼႂ်းထုင်ႉၼွင်ႁၢႆးယႃႈ လၢတ်ႈၽူႈတွႆႇႁွၵ်ႈဝႃႈ – “ မိူဝ်ႈဢွၼ်တၢင်းၼႆႉ တႃႇၽုၵ်ႇသွမ်ႈၼႆႉ ပေႃးလူင်းတိုၼ်းလၢၼ်း 10 သႅၼ်ၼႆႉပေႃးၵိၼ်ပေႃးၸႂ်ႉယူႇ ၊ ၵမ်းၼႆႉ ထိုင်ၶၢဝ်းၽုၵ်ႇသွမ်ႈသေတႃႉ ၵႃႈၸၢင်ႈၵူၼ်း ၊ ၵႃႈၸိူဝ်ႉၽၼ်းၸိူင်ႉၼၼ်ႉၵူၺ်းၵေႃႈ ၼမ်ၼႃႇ ယဝ်ႉ ယွၼ်ႉၼၼ် တလဵဝ်ၼႆႉ ၽႂ်ဢမ်ႇၽုၵ်ႇသွမ်ႈယဝ်ႉၶႃႈ ၊ ပွႆႇသူၼ် ႁၢမ်းလၢႆလၢႆၵူၺ်း ယဝ်ႉဢေႃႈ ၊ ၵူၼ်းၽုၵ်ႇသွမ်ႈၵေႃႈ ဢမ်ႇမီးတိုၼ်းလၢင်းတႃႇၽုၵ်ႇသွမ်ႈယဝ်ႉၶႃႈ “- ဝႃႈၼႆ ။ 

ၵူၼ်းမိူင်း ၼႂ်းထုင်ႉၼွင်ႁၢႆးယႃႈၼႆႉ ၵမ်ႈၼမ် ႁဵတ်းၵိၼ်ၵၢၼ်ၽုၵ်ႇသွမ်ႈသူၼ်ႁႆႈၼႃႈၵူၺ်း။ ဝၢႆးလင် တပ်ႉသိုၵ်းမၢၼ်ႈယိုတ်းဢဝ်ဢႃႇၼႃႇၸိုင်ႈမိူင်း ၵူၼ်းမိူင်းၼွင်ႁၢႆးယႃႈ လႆႈႁူပ်ႉပႃးၽွၼ်းတုမ်ႉယွၼ်ႈ ၶၼ်ၶူဝ်းၵုၼ်ႇပုင်ႈၶိုၼ်ႈႁႅင်း။

ပေႃးထိုင်မႃးၼႂ်းလိူၼ် ဢေႊပရိူဝ်ႊလ် ၼႆၸိုင် ၸဝ်ႈသူၼ်မၢၵ်ႇၶိူဝ်သူမ်ႈၼႂ်းထုင်ႉၼွင်ႁၢႆးယႃႈ ပဵၼ်ၽွင်းတႄႇၽုၵ်ႇမၢၵ်ႇၶိူဝ်သူမ်ႈ ၊ ယၢမ်းလဵဝ် ယွၼ်ႉၼမ်ႉၼႂ်းၼွင်ႁၢႆးယႃႈ ႁႅင်ႈလႄႈ ၸဝ်ႈသူၼ်မၢၵ်ႇၶိူဝ်သူမ်ႈ လႆႈၵိုတ်းလိုဝ်ႈဝႆႉဝႃႈၼႆ ။

ၸဝ်ႈသူၼ်မၢၵ်ႇၶိူဝ်သူမ်ႈလၢတ်ႈၽူႈတွႆႇႁွၵ်ႈဝႃႈ -“ပေႃးၶၢဝ်းၾူၼ်ၼႆႉ ၼမ်ႉထူမ်ႈလႄႈ   မၢၵ်ႇၶိူဝ်သူမ်ႈၸိူဝ်းၼႆႉသုမ်း ၊ပေႃးၶၢဝ်းႁိုဝ်ႉၼႆႉသမ်ႉ ၼမ်ႉႁႅင်ႈ ဢဝ်  ထိုင်တီႈဢမ်ႇၸၢင်ႈၽုၵ်ႇၸၢင်ႈသွမ်ႈသင်။   ၾိင်ႈၾႃႉရႃႇသီႇ လႅၵ်ႈလၢႆႈၸိူင်ႉၼႆႉ တွၼ်ႈတႃႇၵူၼ်းၽုၵ်ႇသွမ်ႈတႄႉၵိၼ်းတႄႉၶႃႈဢေႃႈ ၊ တလဵဝ် ၶဝ်ႈၼႆႉ ၽႂ်ၵေႃႈဢမ်ႇၽုၵ်ႇၼမ်ယဝ်ႉ ၊ ၽုၵ်ႇတႃႇၵိၼ် ဢိတ်းဢွတ်း မွၵ်ႇ 3 ဢေႊၶိူဝ်ႊၸိူဝ်းၼႆႉၵူၺ်းယဝ်ႉ ၊ ပီၵၢႆသုမ်းၼမ်ႁႅင်းၼႃႇ”- ဝႃႈၼႆ ။  

ယၢမ်းလဵဝ်ၵူၼ်းမိူင်းထုင်ႉၼွင်ႁၢႆးယႃႈ  လႆႈႁူပ်ႉထႅင်ႈပၼ်ႁႃ တႃႇႁႃသိုဝ်ႉၼမ်ႉမၼ်းၸၢၵ်ႈ ယၢပ်ႇၽိုတ်ႇ၊ ထိုင်တီႈၸဝ်ႈသူၼ်မၢင်ၵေႃႉ လႆႈဢဝ်ၸၢၵ်ႈထႆၸၢၵ်ႈလူင် ၵႂႃႇၶဝ်ႈထႅဝ်သိုဝ်ႉၼမ်ႉမၼ်းၸၢၵ်ႈ၊ ႁဵတ်းႁႂ်ႈၸဝ်ႈသူၼ်ၽုၵ်ႇသွမ်ႈ ဢိၵ်ႇပႃး ၵူၼ်းမိူင်းၵူႈၸၼ်ႉထၢၼ်ႈ ယၢပ်ႇၽိုတ်ႇတႃႇႁႃၵိၼ်လဵင်ႉတွင်ႉ။