ပလိၵ်ႈမၢၼ်ႈ သိုၵ်းမၢၼ်ႈတီႉၺွပ်း ၵူၼ်းဝၢၼ်ႈဢၼ်ၵႂႃႇ ၶူႈလိၼ်တီႈၵုၼ်ၽူး (ကျွန်းမျော) တႃႇၽုၵ်ႇသွမ်ႈၼႂ်းၼွင်ႁၢႆးယႃႈ ၸႄႈဝဵင်းယွင်ႁူၺ်ႈ ၸိုင်ႈတႆးပွတ်းၸၢၼ်းၼၼ်ႉသေ သူင်ႇၵႂႃႇၾိုၵ်းၵၢၼ်သိုၵ်း – ၼႄးဝႃႈ ပဵၼ်ၵူၼ်းလၵ်ႉ။
တီႈၼွင်ႁၢႆးယႃႈၼႆႉ ပဵၼ်ပိုၼ်ႉတီႈ ၵူၼ်းမိူင်းၽုၵ်ႇမၢၵ်ႇၶဝ်ႈတဝ်ႈၼမ်ႉၼိူဝ်ၵုၼ်ၽူး (ကျွန်းမျော) သေ ႁႃၵိၼ်လဵင်ႉတွင်ႉၵမ်ႈၼမ် ။တင်ႇတႄႇ ၼႂ်းလိူၼ်မေႇ ပီ 2025 ၼၼ်ႉမႃး သိုၵ်းမၢၵ်ႈႁတ်ႉႁၢမ်ႈ လွင်ႈဢဝ်ၵုၼ်ၽူး (ကျွန်းမျော) လႄႈႁဵတ်းႁႂ်ႈ ၸဝ်ႈသူၼ်ၼႃး ၸိူဝ်းၽုၵ်ႇသွမ်ႈႁႃၵိၼ်လဵင်ႉတွင်ႉယၢပ်ႇၽိုတ်ႇၵိၼ်းၸႂ်ဝႆႉၼႆယဝ်ႉ ။
ၼႂ်းလိူၼ်မေႊပူၼ်ႉမႃးၼႆႉ ၵူၼ်းဝၢၼ်ႈဢၼ်မီးၾၢႆႇၸၢၼ်းၼွင် (အင်းတောင်ပိုင်း) 3 ၵေႃႉ ထုၵ်ႇပလိၵ်ႈသိုၵ်းမၢၼ်ႈ မၢပ်ႇၼႄးဝႃႈ ဢဝ်ၵုၼ်ၽူး (ကျွန်းမျော) ၼႆႉသေ တီႉၺွပ်းသူင်ႇၾိုၵ်းၵၢၼ်သိုၵ်း ထိုင်ဝၼ်းမိူဝ်ႈၼႆႉဢမ်ႇလႆႈတင်းၵပ်းသိုပ်ႇၵၼ်တင်းၵူၼ်းတီႈႁိူၼ်းၼႆယဝ်ႉ ။
ၵူၼ်းၸၢႆးပိုၼ်ႉတီႈလၢတ်ႈၽူႈတွႆႇႁွၵ်ႈဝႃႈ -“ၵုၼ်ၽူး(ကျွန်းမျော) ၼႆႉပေႃးဢမ်ႇၸႂ်ႈၶွင်ၸဝ်ႈၵဝ်ႇ ဢဝ်ဢမ်ႇလႆႈၶႃႈ ၊ ပလိၵ်ႈသိုၵ်းမၢၼ်ႈမႃးတီႉၵႂႃႇၵူၼ်းၸၢႆးတင်းမူတ်း 3 ၵေႃႉ ။ တႃႇ 2 ၵေႃႉတႄႉ ၺႃးၼႄးဝႃႈ ၶဝ်လၵ်ႉၵုၼ်ၽူး ၼႆသေၺႃးတီႉ။ ထႅင်ႈၵေႃႉၼိုင်ႈတႄႉ ၺႃးၼႄးဝႃႈ ၵႂႃႇဢဝ်မွၵ်ႇမူဝ်လႄႈတူၼ်ႈၽၵ်းၽၵ်းယိူဝ်ႈယိူဝ်ႈၼိူဝ်ၵုၼ်ၽူးၼၼ်ႉလႄႈၼႆသေ ၺႃးတီႉ။”- ဝႃႈၼႆ။
ယၢမ်းလဵဝ် ၵူၼ်းၸၢႆး 3 ၵေႃႉ ဢၼ်ထုၵ်ႇပလိၵ်ႈသိုၵ်းမၢၼ်ႈတီႉၺွပ်းၵႂႃႇၼၼ်ႉ ထုၵ်ႇသူင်ႇၵႂႃႇၾိုၵ်းၵၢၼ်သိုၵ်း သေ ထိုင်ဝၼ်းမိူဝ်ႈၼႆႉ ဢမ်ႇလႆႈတင်းၵပ်းသိုပ်ႇၵၼ်တင်းၵူၼ်းတီႈႁိူၼ်း ဝႃႈၼႆ ။
တႄႇၼႂ်းႁူဝ်လိူၼ်ၵျႃၼ်ႊမႃး ၾူၼ်တူၵ်းထပ်းၵၼ် ႁဵတ်းႁႂ်ႈၼမ်ႉၶိုၼ်ႈထူမ်ႈ မၢၵ်ႇၶဝ်ႈတဝ်ႈၼမ်ႉ ဢၼ်ၽုၵ်ႇဝႆႉၼိူဝ်ၵုၼ်ၽူး (ကျွန်းမျော) ၊ သင်ဝႃႈၼမ်ႉၼမ်လိူဝ်ႁႅင်းမႃးၸိုင် ယင်းၸၢင်ႈ ႁဵတ်းႁႂ်ႈ ၵုၼ်ၽူးၸိူဝ်းၽုၵ်ႇဝႆႉမၢၵ်ႇၶဝ်ႈတဝ်ႈၼမ်ႉၸိူဝ်းၼၼ်ႉလွင်ႈလႆၸွမ်းပႃးထႅင်ႈလူးၵွၼ်ႇ ။ ၵွပ်ႈပိူဝ်ႈၸိူင်ႉၼႆ ႁဵတ်းႁႂ်ႈၸဝ်ႈသူၼ်ဢွၼ်ၵၼ်မႆႈၸႂ်။
ၼၢင်းယိင်းၵူၼ်းၼႂ်းပိုၼ်ႉတီႈလၢတ်ႈၽူႈတွႆႇႁွၵ်ႈဝႃႈ -“လႆႈပိုင်ႈဢိင် ၵၢၼ် ၽုၵ်ႇသွမ်ႈ ၼိူဝ်ၵုၼ်ၽူး တႃႇႁႃၵိၼ်လဵင်ႉတွင်ႉၵူၺ်းလႄႈ ပေႃးၾူၼ်တူၵ်း ၼမ်ႉထူမ်ႈၵုၼ်ၽူးၵေႃႈ ၸဝ်ႈသူၼ်သုမ်းဢေႃႈ ။ ၵမ်းၼႆႉၶဝ် (သိုၵ်းမၢၼ်ႈ ) သမ်ႉႁႃတီႉၸိူင်ႉၼႆ ၵူၼ်းပိုၼ်ႉတီႈယၢပ်ႇၸႂ်ဢေႃႈ “- ဝႃႈၼႆ ။
ယၢမ်းလဵဝ် ၵၢၼ်ၽုၵ်ႇသွမ်ႈႁႃၵိၼ်လဵင်ႉတွင်ႉၼႂ်းၼွင်ႁၢႆးယႃႈယၢပ်ႇၵိၼ်းမႃးၵူႈမိုဝ်ႈၵူႈဝၼ်းလႄႈ ၵူၼ်းၸိူဝ်းၵႂႃႇပိတ်းၽၵ်းၵမ်ႇၸွၼ်းမႃးၶၢႆၵိၼ်ၵေႃႈလိူင်ႇၼမ်မႃး။ ၵမ်ႈၽွင်ႈၵႂႃႇၵိၼ်ၸၢင်ႈၵဵၼ်လႅၼ်းယႃႈ။ ပေႃးပဵၼ်ၵူၼ်းၸၢႆးသမ်ႉ ၵႂႃႇႁဵတ်းၵၢၼ်ၵေႃႇသၢင်ႈ ၊ ၵႂႃႇႁႃပႃမႃးၶၢႆ ၸိူင်ႉၼၼ်သေလႄႈႁႃၵိၼ်ဝၼ်းလႂ်ဝၼ်းၼၼ်ႉၵူၺ်း။ ၼိုင်ႈဝၼ်းလႂ် လႆႈၵႃႈၸၢင်ႈ 1 မိုၼ်ႇ ထိုင် 3 မိုၼ်ႇပျႃး ဝႃႈၼႆ။
တင်ႈတႄႇသိုၵ်းမၢၼ်ႈယိုတ်းဢႃႇၼႃႇၸိုင်ႈမိူင်းမႃးၵူၼ်းမိူင်းၼွင်ႁၢႆးယႃႈ လႆႈၵႂႃႇၵူႈငိုၼ်းတီႈ ႁၢၼ်ႉၶၢႆၶူဝ်းၽုၵ်ႇသွမ်ႈ၊ ၶွမ်ႊပၼီႊသေမႃးႁဵတ်းၵၢၼ်ၽုၵ်ႇသွမ်ႈၼႂ်းၼွင်။ ၶူဝ်းၸႂ်ႉသွႆၼႂ်းၵၢၼ်ၽုၵ်ႈသွမ်ႈသမ်ႉၵႃႈယႂ်ႇၶၼ်လူင်ၵူႈဢၼ်၊ လႆႈၸႂ်ႉတိုၼ်းလၢင်းယႂ်ႇ။ ပေႃးမီးၶူဝ်းသူၼ်ဢွၵ်ႇမႃး လႆႈၶၢႆၵႃႈထုၵ်ႇၵႃႈပေႃး ဢမ်ႇမီးၽႂ်သိုဝ်ႉထိုင်တီႈလႆႈထွၵ်ႇပႅတ်ႈၵေႃႈမီး။ ႁဵတ်းႁႂ်ႈၸဝ်ႈသူၼ်ဢမ်ႇမီးငိုၼ်းတိုၼ်းလၢင်းလႄႈလႆႈၵႂႃႇၵူႈ ၵႂႃႇယိုမ်ႈငိုၼ်းသေမႃးၸႂ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ