ၼႂ်းၶၢဝ်းတၢင်းဝူင်ႈၼႆႉ ၶၼ်ၼမ်ႉမၼ်းၸၢၵ်ႈ ထၢတ်ႈသီႇ၊ ၻီႊသႄႊလ် သိုပ်ႇပုင်ႈၶိုၼ်ႈမႃးထႅင်ႈ ၼိုင်ႈလီႇတႃႇလႂ် ပုင်ႈၶိုၼ်ႈၵႂႃႇ 840 ပျႃး ထိုင် 1,260 ပျႃး ႁဵတ်းႁႂ်ႈ ၸဝ်ႈႁိူဝ်း ၼႂ်းၼွင်ႁၢႆးယႃႈ ၸိုင်ႈတႆးပွတ်းၸၢၼ်း ယၢပ်ႇၵိၼ်းဝႃႈၼႆ ။

ယၢမ်းလဵဝ် ၼႂ်းၼွင်ႁၢႆးယႃႈ ၻီႊသႄႊလ် ၼိုင်ႈၵႃႊလၼ်ႊ 45000 ပျႃး ။ ယွၼ်ႉၼမ်ႉမၼ်း ၸၢၵ်ႈႁႃသိုဝ်ႉယၢပ်ႇ ၵႃႈၶၼ်သုင်လႄႈ  ၵႃႈၶၢတ်ႈႁိူဝ်းၸၢၵ်ႈၼႂ်းၼွင်ႁၢႆးယႃႈၵေႃႈၶိုၼ်ႈသုင်ၸွမ်း ။ တႃႇတေဢႅဝ်ႇလႄႇ ၼႂ်းၼွင်ႁၢႆးယႃႈၼႆႉ ဢွၼ်တၢင်း ၵႃႈႁိူၼ်းၸၢၵ်ႈၼိုင်ႈလမ်း 7 မိုၼ်ႇပျႃးၵူၺ်းသေတႃႉ ယၢမ်းလဵဝ်ပုင်ႈၶိုၼ်ႈ 2 ပုၼ်ႈ လႆႈပၼ် 140,000    ဝႃႈၼႆ ။

ၸဝ်ႈႁိူဝ်းၼႂ်းၼွင်ႁၢႆးယႃႈလၢတ်ႈၽူႈတွႆႇႁွၵ်ႈဝႃႈ -“ဢွၼ်တၢင်းၻီႊသႄႊလ် ၼိုင်ႈၵႃႊလၼ်ႊ ၼိုင်ႈမိုၼ်ႇပျႃးၵူၺ်း ၊ ၵမ်းၼႆႉ  450000 ပျႃး ၊ ႁႃသိုဝ်ႉယၢပ်ႇၼႃႇ ယွၼ်ႉၼၼ်ပေႃးဢမ်ႇၶိုၼ်ႈၵႃႈၶၢတ်ႈႁိူဝ်း ၵေႃႈဢမ်ႇလႆႈ”- ဝႃႈၼႆ ။

တွၼ်ႈတႃႇတေလႆႈၼမ်ႉမၼ်းၸၢၵ်ႈၼၼ်ႉ ၸဝ်ႈႁိူဝ်းၼႂ်းၼွင်ႁၢႆးယႃႈ လႆႈႁႃသိုဝ်ႉတီႈဝဵင်း ယွင်ႁူၺ်ႈလႄႈ တွင်ႇလေးလူင်း ။ လႆႈၵႂႃႇၶဝ်ႈထႅဝ်ၵၼ် ၸဵမ်မိူဝ်ႈၵၢင်ၼႂ်ၸဝ်ႉ 5 မူင်းပုၼ်ႉၵေႃႈ ၶႂ်ႈလႆႈၸင်ႇလႆႈ။  လႆႈၼိုင်ႈပွၵ်ႈ ၼိုင်ႈၵႃႊလၼ်ႊၸိူဝ်းၼႆႉၵူၺ်းၵေႃႈမီး- ၸဝ်ႈႁိူဝ်းလၢတ်ႈ။

ၸဝ်ႈႁိူဝ်းသိုပ်ႇလၢတ်ႈထႅင်ႈဝႃႈ -“ ၼိုင်ႈဝၼ်းၼႆႉ ၼမ်ႉမၼ်းသဵင်ႈမွၵ်ႈ 3 ၵႃႊလၼ်ႊဢေႃႈ ၊ တလဵဝ် ၼမ်ႉမၼ်းဢမ်ႇမီး ႁႃသိုဝ်ႉယၢပ်ႇလႄႈ မီးၵူၼ်းၶႂ်ႈၸၢင်ႈႁိူဝ်းယူႇသေတႃႉ ဢမ်ႇၸၢင်ႈၵႂႃႇသူင်ႇ ၊ ၼမ်ႉမၼ်းဢမ်ႇမီးၼႆႉ ၸဝ်ႈႁိူဝ်းၵေႃႈယၢပ်ႇတုမ်ႉတိူဝ်ႉ ၵၢၼ်ႁႃၵိၼ်လဵင်ႉတွင်ႉဢေႃႈ”- ဝႃႈၼႆ ။

ၼႂ်းဝူင်ႈႁၢင်လိူၼ်မၢတ်ႉၶျ်မႃးၼႆႉတႄႉ ၵႃႈၶၼ်ၼမ်ႉမၼ်းၸၢၵ်ႈ ၵိုင်ႈၵၢင်ႉပုင်ႈၶိုၼ်ႈ ထၢတ်ႈသီႇ သႅၼ်း 92 ၼိုင်ႈလီႇတႃႇ ပဵၼ်ၵႂႃႇ 4,450 ပျႃး၊ သႅၼ်း 95 ၼိုင်ႈလီႇတႃႇ 4,975 ပျႃး၊ ၻီႊသႄႊလ်ၼိုင်ႈလီႇတႃႇ 5,450 ပျႃး လႄႈ  ပရီႊမီႊယမ်ႊ ၻီႊသႄႊလ် ၼိုင်ႈလီႇတႃႇလႂ် 6085 ပျႃး ဝႃႈၼႆ။

ယွၼ်ႉၼမ်ႉမၼ်း ႁႃသိုဝ်ႉယၢပ်ႇ ၵႃႈၶၼ်ပုင်ႈၶိုၼ်ႈသုင်ႁႅင်းလႄႈ တီႈဝဵင်းတူၼ်ႈတီး ၸိုင်ႈတႆးပွတ်းၸၢၼ်း ႁၢၼ်ႉၶၢႆၵုၼ်ႇ ၊ ၶၢႆတၢင်းၵိၼ် လႆႈပိၵ်ႉဢိုတ်းဝႆႉ ။

ၸဝ်ႈႁၢၼ်ႉၶၢႆၶဝ်ႈသွႆးဝဵင်းတူၼ်ႈတီးလၢတ်ႈၽူႈတွႆႇႁွၵ်ႈဝႃႈ -“ဢမ်ႇမီးၼမ်ႉမၼ်းလႄႈ ႁၢၼ်ႉၵေႃႈလႆႈပိၵ်ႉဝႆႉ ၊ ၵူၼ်းသိုဝ်ႉၵိၼ်ၵေႃႈဢမ်ႇမီး ၊ ပေႃးဢမ်ႇလွင်ႈယႂ်ႇၼႆႉ ၽႂ်ၵေႃႈ ဢမ်ႇဢွၵ်ႇႁိူၼ်းယဝ်ႉ”– ဝႃႈၼႆ ။

ယွၼ်ႉၼမ်ႉမၼ်းၸိူဝ်ႉၾႆး ႁႃသိုဝ်ႉယၢပ်ႇ ၵႃႈၶၼ်ပုင်ႈၶိုၼ်ႈသုင်ႁႅင်း  မိူၼ်ၼင်ႇ ၶၼ်ၵုၼ်ႇၼႂ်းမိူင်းတႆးပွတ်းၸၢၼ်းလၢႆလၢႆဝဵင်းပုင်ႈၶိုၼ်ႈၸွမ်း။

ယၢမ်းလဵဝ် ၶၼ်ၵုၼ်ႇတီႈဝဵင်းတူၼ်ႈတီး ၶႆႇၼိုင်ႈလုၵ်ႈ 650 ပျႃး ၊ ၶဝ်ႈသၢၼ်ၼိုင်ႈပႄႇ 5600 ပျႃး ၊ ၼမ်ႉမၼ်းၵိၼ် တဝ်ႈသၢဝ်းၵျၢပ်ႈ 8000 ပျႃး ၊ ၽၵ်းၵမ်ႇၸွမ်း ၼိုင်ႈမတ်ႉ 1000 ပျႃး – လႆႈႁူႉၼင်ႇၼႆ ။

တင်ႈတႄႇၵၢင်လိူၼ်မၢတ်ႉၶျ်ၼႆႉမႃး တႃႇလူတ်းယွၼ်ႇၵၢၼ်ၸႂ်ႉၼမ်ႉမၼ်းၸၢၵ်ႈၼႆသေ သိုၵ်းမၢၼ်ႈယိုတ်းမိူင်း ဢွၵ်ႇမၢႆမီႈမႂ်ႇ  ႁႂ်ႈတူၺ်းၸွမ်းဝႂ်လၢႆႊသိၼ်ႊရူတ်ႉၵိၵ်ႈ/ၵူႈသေ ၸင်ႇဢွၵ်ႇႁိူၼ်းၸွမ်းဝၼ်းၵိၵ်ႈဝၼ်းၵူႈ ၊ ပလိၵ်ႈမၢၼ်ႈပႂ်ႉၵူတ်ႇထတ်းရူတ်ႉၵႃးၸိူဝ်းဢမ်ႇၸွမ်းမၢႆမီႈ – ယိုတ်းပႃးလၢႆႊသိၼ်ႊရူတ်ႉ ၸွမ်းပၢမ်ႉၼမ်ႉမၼ်း ၼႆယဝ်ႉ ။