သဵင်ႈတၢင်းၼႂ်းဝဵင်းၾၢႆၶုၼ်- တီႈမူၵ်းသိူဝ်( ၻီးမေႃးသူဝ်ႇ) လႅၼ်လိၼ်တႆး- ယၢင်းလႅင် ၵႂႃႇမႃးယၢပ်ႇၽိုတ်ႇႁဵတ်းႁႂ်ႈ ၼမ်ႉမၼ်းၸိူဝ်ႉၾႆး( ၼမ်ႉမၼ်းၸၢၵ်ႈ ) ၶၢတ်ႇ ၵႃႈၶၼ်ပုင်ႈၶိုၼ်ႈဝႆႉ ၼႆယဝ်ႉ ။
တႄႇႁၢင်လိူၼ်ၵျႃၼ်ႊမႃး သိုၵ်းမၢၼ်ႈလႄႈ ၸုမ်းႁူမ်ႈႁွမ်းသိုၵ်းၼႂ်းပိုၼ်ႉတီႈ ၶဵင်ႈၶႅင် ၵၢၼ်သိုၵ်းတေႃႇၵၼ်ဝႆႉလႄႈ လႆႈႁႅတ်ႉႁၢမ်ႈ သဵၼ်ႈတၢင်းၵႂႃႇမႃး ဝဵင်းၾၢႆၶုၼ် – တီႈမူၵ်းသိူဝ် သေဢမ်ႇၵႃး ယွၼ်ႉၾူၼ်တူၵ်းထပ်းၵၼ်ႁၢဝ်ႈႁႅင်း သဵၼ်ႈတၢင်းလူႉၵွႆ ၵႂႃႇမႃးယၢပ်ႇၽိုတ်ႇဝႆႉ လႄႈ ၵူၼ်းမိူင်းႁႃသိုဝ်ႉ ၼမ်ႉမၼ်းၸိူဝ်ႉၾႆး (ၼမ်ႉမၼ်းၸၢၵ်ႈ ) ယၢပ်ႇၽိုတ်ႇဝႆႉ – ၼႆယဝ်ႉ ။
ယွၼ်ႉသဵၼ်ႈတၢင်းၵႂႃႇမႃးယၢပ်ႇၽိုတ်ႇလႄႈ ယၢမ်းလဵဝ် ႁၢၼ်ႉၼမ်ႉမၼ်း ၼႂ်းပိုၼ်ႉတီႈ မၢင်ၸိူဝ်း လႆႈဢိုတ်းဝႆႉၸူဝ်ႈၶၢဝ်းသေ ၼမ်ႉမၼ်းၸိူဝ်ႉၾႆး ( ၼမ်ႉမၼ်းၸၢၵ်ႈ ) ၼိုင်ႈလိတ်ႉ ( လီႇတႃႇ ) ၶိုၼ်ႈထိုင် 8500 ပျႃး ယင်းပၢႆႁႃသိုဝ်ႉယၢပ်ႇၽိုတ်ႇႁႅင်း ။
ၵူၼ်းၸၢႆးဝဵင်းၾၢႆၶုၼ်လၢတ်ႈၽူႈတွႆႇႁွၵ်ႈဝႃႈ -“ ယွၼ်ႉသဵၼ်ႈတၢင်းၵႂႃႇမႃးယၢပ်ႇၽိုတ်ႇလႄႈၶၼ် ၼမ်ႉမၼ်းၶိုၼ်ႈ ။ ဢွၼ်တၢင်းၼမ်ႉမၼ်းၸၢၵ်ႈၼိုင်ႈလိတ်ႉၼႆႉ 3000 ပၢႆ ၊ ၵမ်းၼႆႉ ၶိုၼ်ႈထိုင် 8500 ပျႃး ပေႃးၵိုင်ႉၵၢင်ႉလူဝ်ႇၵႂႃႇမႃးတႄႉတေ ယၢပ်ႇၽိုတ်ႇဝႆႉဢေႃႈ”- ဝႃႈၼႆ ။
ဝဵင်းၾၢႆၶုၼ် – တီႈမူၵ်းသိူဝ်ၼႆႉ ပဵၼ်ၵူၼ်းပၢႆႈၽေးသိုၵ်း ယူႇၵမ်ႈၼမ် ၊ ၵူၼ်းပၢႆႈၽေးသိုၵ်း ဢၼ်ပၢႆႈယူႇဢွင်ႈတီႈ ပၢင်သဝ်းၵူၼ်းပၢႆႈၽေးသိုၵ်းမီး ႁဵင်ပၢႆ ။ ယွၼ်ႉၶၼ်ၼမ်ႉမၼ်းၸိူဝ်ႉၾႆး ( ၼမ်ႉမၼ်းၸၢၵ်ႈ ) ၶိုၼ်ႈႁႅင်းလႄႈ ႁဵတ်းႁႂ်ႈ ၵူၼ်းပၢႆႈၽေးသိုၵ်း ၵႂႃႇမႃးယၢပ်ႇၽိုတ်ႇၵိၼ်းၸႂ် ။
ၼၢင်းယိင်းပိုၼ်ႉတီႈလၢတ်ႈၽူႈတွႆႇႁွၵ်ႈဝႃႈ -“ၵႃႈၼမ်ႉမၼ်းၵေႃႈၶိုၼ်ႈ ၊ လူဝ်ႇၵႃႈႁိုဝ်ၵေႃႈ သိုဝ်ႉဢမ်ႇလႆႈ ၊ ပေႃးလူဝ်ႇပၢႆႈၽေးသိုၵ်းတႄႉ လူဝ်ႇပႆပၢႆႈၵူၺ်းယဝ်ႉ”- ဝႃႈၼႆ ။
ယၢမ်းလဵဝ် ၵူၼ်းပၢႆႈၽေးသိုၵ်းၸိူဝ်းပွၵ်ႈယူႇၶိုၼ်းႁိူၼ်းၼၼ်ႉ လႆႈၵႂႃႇယူႇၸွမ်းၵျွင်းမုၼ်ၸဝ်ႈ ဢမ်ႇၼၼ် ၼႂ်းထိူၼ်ႇ ၊ လႆႈႁဵတ်းၵၢၼ် ႁႃၸဝ်ႉၵိၼ်ၶမ်ႈ ထိုင်ဝၼ်းမိူဝ်ႈၼႆႉ တိုၵ်ႉလႆႈမႆႈၸႂ်လွင်ႈႁူမ်ႇလူမ်ႈ ပႆႇၸၢင်ႈပွၵ်ႈႁိူၼ်းၶိုၼ်း ။
မိူဝ်ႈလိူၼ်ၵျုၼ်ႊဝၼ်းတီႈ 28 ၼၼ်ႉ ၸုမ်းလုၵ်ႉၽိုၼ်ႉၸုမ်းၼိုင်ႈ ၶဝ်ႈတိုၵ်းၼႂ်းတပ်ႉပၢင်သဝ်းသိုၵ်းမၢၼ်ႈ ဢၼ်မီးႁိမ်းဝဵင်းမိူင်းပၢႆး ။ ၽွင်းၼၼ်ႉ ၵူၼ်းသိုၵ်းမၢၼ်ႈၼိုင်ႈၵေႃႉလူႉတၢႆ လႄႈ တီႉၺွပ်းလႆႈ သိုၵ်းမၢၼ်ႈ(2) ၵေႃႉ ဢိၵ်ႇတင်း ၶိူင်ႈၵွင်ႈၵၢင်ႇတင်းၼမ်ၼႆယဝ်ႉ ။
ဝၢႆးသိုၵ်းမၢၼ်ႈယိုတ်းမိူင်းမႃး ၸႄႈဝဵင်းမိူင်းပၢႆး၊ၾၢႆၶုၼ်လႄႈၸွမ်းလႅၼ်လိၼ်တႆး-ယၢင်းလႅင် ၼႂ်းၸႄႈဝဵင်းလွႆၶေႃၸိူဝ်းၼႆႉ သိုၵ်းမၢၼ်ႈယိုတ်းမိူင်းတင်း သိုၵ်းPDF ပဵၼ်ပၢင်တိုၵ်းၵၼ် ႁၢဝ်ႈႁႅင်း ။ ၸုမ်းသိုၵ်းမၢၼ်ႈ ၵႆႉယိုဝ်းမၢၵ်ႇလူင် တူၵ်းသႂ်ႇၼႂ်းဝၢၼ်ႈ။ ယွၼ်ႉပၢင်တိုၵ်းၼႆႉသေ ၵူၼ်းမိူင်းထူပ်းၽေးပၢႆႈၽေးပဵၼ်ႁူဝ်ႁဵင် တေႃႇထိုင်ဝၼ်းမိူဝ်ႈၼႆႉ ဝႃႈၼႆ ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ