ၸွမ်ၸိုင်ႈမိူင်းဢမေႊရိၵၼ်ႊ ၻေႃႊၼႄႊလ်ထရမ်ႉ တင်း လူင်ပွင်ၸိုင်ႈ ဢီႊရၼ်ႊ သွင်မိူင်း ဢွၵ်ႇမႃးပိုၼ်ၽၢဝ်ႇလၢတ်ႈဝႃႈ တေၵိုတ်းတိုၵ်းၵၼ် ၸူဝ်ႈၶၢဝ်း တႃႇၶၢဝ်းတၢင်း သွင် ဝူင်ႈ။

ၼႂ်းၶၢဝ်းတၢင်းၵိုတ်းတိုၵ်းၵၼ် ႁိုင်သွင်ဝူင်ႈၼႆႉ ၾၢႆႇမိူင်းဢီႊရၼ်ႊ တေလႆႈႁၢင်ႈႁႅၼ်းပိုတ်ႇပၼ်ၶိုၼ်း သဵၼ်ႈတၢင်းၼမ်ႉႁေႃႊမုတ်ႉသ် ပၼ်ႁိူဝ်းသၢင်းၽေႃးတေႃႉၼမ်ႉမၼ်းမဵၼ် လတ်းၽၢၼ်ႇၵႂႃႇလႆႈ လွတ်ႈလႅဝ်း ယႃႇႁႂ်ႈမီးၽေးၶဵၼ်သင်ၼႆ ၸွမ်ၸိုင်ႈမိူင်းဢမေႊရိၵၼ်ႊ တေႃႊၼႄႊထရမ်ႉ လၢတ်ႈၼင်ႇၼႆ။

တႃႇၶေႃႈတူၵ်းလူင်းၵိုတ်းတိုၵ်းၵၼ်ၼၼ်ႉ ၾၢႆႇမိူင်းဢမေႊရိၵၼ်ႊ လႆႈႁပ်ႉၶေႃႈတုၵ်းယွၼ်းတၢင်ႇလၢတ်ႈ တီႈမိူင်းဢီႊရၼ်ႊဝႆႉ 10 ၶေႃႈ။

တင်းမူတ်း ပဵၼ်ၶေႃႈဢၼ်ၶိုၵ်ႉၶႅမ်ႉ ႁၼ်လီၸွမ်းတင်းသဵင်ႈယူႇၼႆ ထရမ်ႉ တႅမ်ႈတၢင်ႇဝႆႉၼိူဝ်သိုဝ်ႇတူင်ႇဝူင်းၵူၼ်းသုၼ်ႇတူဝ်မၼ်းဝႆႉၼင်ႇၼႆ။

“ၶေႃႈဢၼ်ဢမေႊရိၵၼ်ႊ လႄႈ ဢီႊရၼ်ႊ လႆႈတုမ်ႉတွပ်ႇထဵင်တေႃႇၵၼ်မႃးတင်းၼမ်ၼၼ်ႉ ယၢမ်းလဵဝ် လႆႈၶေႃႈတူၵ်းလူင်းၵၼ်ယဝ်ႉလႄႈ တေသိုပ်ႇႁဵတ်းသၢင်ႈမၵ်းမၼ်ႈပဵၼ်တၢင်းၵၢၼ်ၵႂႃႇ ႁႂ်ႈယဝ်ႉတူဝ်ႈ ၼႂ်းၶၢဝ်းတၢင်းသွင်ဝူင်ႈယူႇ” ၼႆယဝ်ႉ။

တင်ႈတႄႇ မိူင်းဢမေႊရိၵၼ်ႊ တင်း မိူင်းဢီႊရၼ်ႊ ပဵၼ်ပၼ်ႁႃ ယိုဝ်းတိုၵ်းၵၼ်မႃး ၶၼ်ၼမ်ႉမၼ်းမဵၼ်ၼႆႉ ၵိုင်ႉၵၢင်ႉပုင်ႈၶိုၼ်ႈ ထိုင်ၵႂႃႇမွၵ်ႈ 50% ပၢႆသေတႃႉ ဝၢႆးလင် လႆႈၶေႃႈတူၵ်းလူင်းၵၼ်တင်းသွင်မိူင်းယဝ်ႉ ၼႂ်းၶၢဝ်းတၢင်းၸူဝ်ႈမူင်းၵူၺ်း ၶၼ်ၼမ်ႉမၼ်းမဵၼ်ၵေႃႈ ၵိုင်ႉၵၢင်ႉ လူတ်းလူင်းၵႂႃႇၶိုၼ်း 20% ပၢႆ ၼႆယဝ်ႉ။