ၸွမ်ၸိုင်ႈမိူင်းဢမေႊရိၵၼ်ႊ ထရမ်ႉ ပိုၼ်ၽၢဝ်ႇဢွၵ်ႇၼႂ်းသိုဝ်ႇၼႅင်ႈသၢၼ် Truth Social ဝႆႉဝႃႈ “ပိုၼ်ႉတီႈၼမ်ႉ ႁေႃႊမူတ်ႉသ်ၼႆႉ ပဵၼ်ၼႃႈတီႈမႂ်ႇၶွင် မိူင်းဢမေႊရိၵၼ်ႊယဝ်ႉ” လႄႈ တႃႇတေႁူပ်ႉ ထူပ်း ဢုပ်ႇဢူဝ်းၸွမ်း မိူင်းဢီႊရၼ်ႊၼႆႉ ဢမ်ႇမီးၽႅၼ်ၵၢၼ်ယဝ်ႉ ဝႃႈၼႆ။

ထရမ်ႉယင်းတူၵ်ႇတၵ်ႉလၢတ်ႈပႃးဝႃႈ ယၢမ်းလဵဝ်ၾၢႆႇတပ်ႉသိုၵ်းမိူင်းဢမေႊရိၵၼ်ႊ ၵုမ်းထိင်းဝႆႉတႃႈႁိူဝ်းသေ ပိုတ်ႇပၼ်သဵၼ်ႈတၢင်းၼမ်ႉ ႁေႃႊမူတ်ႉသ်ဝႆႉယူႇ။ မၢၵ်ႇၸိူဝ်းဢၼ်ၾင်ဝႆႉၼႂ်းၼမ်ႉၼၼ်ႉၵေႃႈ တပ်ႉသိုၵ်းမိူင်းဢမေႊရိၵၼ်ႊ ၽဵဝ်ႈပႅတ်ႈတင်းသဵင်ႈယဝ်ႉတူဝ်ႈလီငၢမ်း- ၼႆယဝ်ႉ။

ၵူၺ်းၵႃႈ ၾၢႆႇမိူင်းဢီႊရၼ်ႊတႄႉယင်းတိုၵ်ႉယိုၼ်ယၼ်ဝႃႈ သဵၼ်ႈတၢင်းၼမ်ႉ ႁေႃႊမူတ်ႉသ်ၼႆႉ တိုၵ်ႉသိုၵ်ႇဢိုတ်းဝႆႉယူႇလႄႈ ဢမ်ႇပႆႇပၼ်ႁိူဝ်းသၢင်းၽေႃး ၸိူဝ်းတေႃႉတၢင်ႇၵုၼ်ႇ လတ်းၽၢၼ်ႇၵႂႃႇမႃးၵူႈလမ်း ဝႃႈၼႆ။

မိူဝ်ႈပူၼ်ႉမႃး ဝၼ်းတီႈ 17 ၼႂ်းလိူၼ်ဢေႃးၵၢတ်ႉသ်ၼႆႉတႄႉ တူဝ်တႅၼ်းၶိုၵ်ႉတွၼ်းၾၢႆႇမိူင်းဢမေႊ ရိၵၼ်ႊၵေႃႈၸႂ်ႈ လုၵ်ႈၶူၺ်ထရမ်ႉၵေႃႈပဵၼ်ၼၼ်ႉ တူၵ်ႇတၵ်ႉလၢတ်ႈဝႆႉဝႃႈ “ၵဵဝ်ႇ ၵပ်းလွင်ႈပၼ်ႁႃ ဢမေႊရိၵၼ်ႊ တင်း ဢီႊရၼ်ႊၼႆႉ တိုၵ်ႉပဵၼ်ၽွင်းဢုပ်ႇဢူဝ်းၵၼ်ယူႇလႄႈ ၵၢၼ်ဢုပ်ႇဢူဝ်းၵေႃႈ ငဝ်းလၢႆးလီဝႆႉယူႇ” ဝႃႈၼႆ။

ယွၼ်ႉဢမေႊရိၵၼ်ႊ တင်း ဢိတ်ႊသရေႊၶဝ် ပဵၼ်ပၢင်တိုၵ်းၵၼ်ႁၢဝ်ႈႁႅင်း မိူဝ်ႈလိူၼ်ၾႅပ်ႉပိဝ်ႊရီႊ 28 ဝၼ်းၼၼ်ႉသေ ၾၢႆႇမိူင်းဢီႊရၼ်ႊ လႆႈဢိုတ်းႁပ်းဝႆႉ သဵၼ်ႈတၢင်းၼမ်ႉႁေႃႊမူတ်ႉသ် ႁိုင်မွၵ်ႈ 6 လိူၼ်ယဝ်ႉ။

သဵၼ်ႈတၢင်းၼမ်ႉ ႁေႃႊမူတ်ႉသ်ၼႆႉ လမ်ႇလွင်ႈတႃႇၵၢၼ်တေႃႉသူင်ႇ ၼမ်ႉမၼ်းမဵၼ် (ႁိုဝ်) ၼမ်ႉမၼ်းၸိူဝ်ႉၾႆး တင်းလုမ်ႈၾႃႉ။ ၾၢႆႇမိူင်းဢီႊရၼ်ႊတႄႉ ပိုၼ်ၽၢဝ်ႇလၢတ်ႈဝႆႉဝႃႈ – သင်ဢမ်ႇလႆႈၶိုၼ်းၵႃႈသၢႆႈတႅၼ်း ပၢင်တိုၵ်း လႄႈ ဢမ်ႇပိုတ်ႇပၼ်တႃႈႁိူဝ်းၸိုင် တႃႇတေပိုတ်ႇပၼ်ၶိုၼ်း သဵၼ်ႈတၢင်းၼမ်ႉ ႁေႃႊမူတ်ႉသ်ၵေႃႈ ဢမ်ႇငၢႆႈ -ဝႃႈၼႆ။

ၸိုင်ႈမိူင်းၵႃႊတႃႊ ဢၼ်ၶဝ်ႈယူႇၵၢင်သေ ၸွႆႈတူင်ႉၼိုင်ႁဵတ်းသၢင်ႈပၼ်လွင်ႈဢုပ်ႇဢူဝ်း ဢီႊရၼ်ႊ တင်း ဢူဝ်ႊမၼ်ႊၶဝ်ၼၼ်ႉတႄႉ လၢတ်ႈဝႆႉထႅင်ႈဝႃႈ သင်ဢီႊရၼ်ႊတင်း ဢူဝ်ႊမၼ်ႊၶဝ် တူၵ်းလူင်းလႆႈၸႂ်ၵၼ်ယဝ်ႉၸိုင် ဢမေႊရိၵၼ်ႊ တင်း ဢီႊရၼ်ႊၵေႃႈ ၸၢင်ႈႁူပ်ႉထူပ်းဢုပ်ႇဢူဝ်းၵၼ်ထႅင်ႈယူႇ – ၼႆယဝ်ႉ။