ငဝ်းလၢႆး ပၢင်တိုၵ်းၵႄႈၵၢင် ဢမေႊရိၵၼ်ႊ တင်း ဢီႊရၼ်ႊ ယၢမ်းလဵဝ်ၶဵင်ႈၶႅင်ဝႆႉသေ ၼႂ်းဝၼ်းတီႈ 20 လိူၼ်ၵျူႊလၢႆႊၼႆႉ ဢမေႊရိၵၼ်ႊ သိုပ်ႇတိုၵ်းတေႃးသႂ်ႇ ဢီႊရၼ်ႊ တၢင်းၵၢင် ႁၢဝ်ထႅင်ႈ။

မိူၼ်ၼႆ ၾၢႆႇဢီႊရၼ်ႊၵေႃႈ တင်ႈပဝ်ႉမၢႆသေ တုမ်ႉတွပ်ႇသႂ်ႇၶိုၼ်း တပ်ႉပၢင်သဝ်းသိုၵ်းဢမေႊရိၵၼ်ႊ ၸိူဝ်းမီးဝႆႉ တီႈၼႂ်းမိူင်းသီးရီးယႃး၊ ၵျေႃႊတၼ်ႊ လႄႈ ၵူႊဝိတ်ႉ ၸိူဝ်းၼႆႉ။

ၸုမ်းယိပ်းၵွင်ႈလုၵ်ႉၽိုၼ်ႉ မိူင်းဢီႊရၼ်ႊ (အီရန် တော်လှန်ရေးအစောင့်တပ်) လၢတ်ႈဝႃႈ – သင် ဢမေႊရိၵၼ်ႊ သိုပ်ႇပူၼ်ႉပႅၼ်ၶဝ်ႈတိုၵ်းယူႇၸိုင် တိုၼ်းတေဢမ်ႇပၼ် ၼမ်ႉမၼ်းမဵၼ် လတ်းသဵၼ်ႈတၢင်းၼမ်ႉ ႁေႃႊမူၵ်ႊသ် သေယွတ်ႇ ဝႃႈၼႆ။

ဢီႊရၼ်ႊ လၢတ်ႈဝႃႈ – မိူဝ်ႈပူၼ်ႉမႃး ပႆႇႁိုင်သင်ၼႆႉ ႁိူဝ်းတၢင်ႇၼမ်ႉမၼ်းမဵၼ် သွင်လမ်း ဢၼ်ၶတ်း ၸႂ် ဢၢၼ်းလတ်းၶၢမ်ႈၵႂႃႇ ၼႂ်းသဵၼ်ႈတၢင်းၼမ်ႉ ႁေႃႊမူၵ်ႊသ်ၼၼ်ႉ ၺႃးပွႆႇမၢၵ်ႇယႃႉလူႉၵွႆ ဝႃႈၼႆ။

ၾၢႆႇၼိုင်ႈၵေႃႈ တီႈပၢင်တိုၵ်း ၼႂ်းမိူင်းဢီႊရတ်ႉပွတ်းႁွင်ႇၼၼ်ႉ ၵူၼ်းသိုၵ်းဢမေႊရိၵၼ်ႊ လူႉတၢႆၵႂႃႇ ထႅင်ႈၵေႃႉၼိုင်ႈ၊ တႄႇၸဵမ်မိူဝ်ႈပဵၼ်ပၢင်တိုၵ်းၵၼ်မႃး ၵူၼ်းသိုၵ်းဢမေႊရိၵၼ်ႊ လူႉတၢႆၵႂႃႇတၢင်းသဵင်ႈ 17 ၵေႃႉယဝ်ႉ။

ၵဵဝ်ႇလူၺ်ႈလွင်ႈၼႆႉသေ ၸွမ်ၸိုင်ႈထရမ်ႉ လၢတ်ႈဝႃႈ – လွင်ႈဢၼ်လႆႈတိုၵ်းတေႃး ဢီႊရၼ်ႊ ႁၢဝ်ႈႁႅင်း ၼႆႉ ပဵၼ်တွၼ်ႈတႃႇ ယုၵ်ႉယွင်ႈဢဝ်ၵုင်ႇမုၼ် ၽူႈႁတ်းႁၢၼ် ၸိူဝ်းႁၵ်ႉၸိူဝ်ႉ ၸၢတ်ႈဝၢၼ်ႈမိူင်း ဝႃႈၼႆ။

ၽွင်းလူင်ၾၢႆႇၵၢၼ်ၵႅတ်ႇၶႄ ႁႄႉၵင်ႈ မိူင်းဢိတ်ႉသရေႊၵေႃႈ လၢတ်ႈဝႃႈ – သင်ဢီႊရၼ်ႊ ဢဝ်မၢၵ်ႇၼူ ၾႆး ပိုတ်းယိုဝ်းတိုၵ်းတေႃးသႂ်ႇ ဢိတ်ႉသရေႊၸိုင် တေတိုၵ်းတေႃး တုမ်ႉတွပ်ႇ ၵႂႃႇၶိုၼ်းႁၢဝ်ႈႁႅင်း ဝႃႈၼႆ။

ယွၼ်ႉပၼ်ႁႃ ပၢင်တိုၵ်း ၼႂ်းပိုၼ်ႉတီႈ မိူင်းဝၼ်းဢွၵ်ႇၵၢင် ႁၢဝ်ႈႁႅင်းၶိုၼ်ႈမႃးလႄႈ ၼႂ်းဝၼ်းတီႈ 20 လိူၼ်ၵျူႊလၢႆႊၼႆႉ ၵႃႈၶၼ်ၼမ်ႉမၼ်းမဵၼ်လုမ်ႈၾႃႉ (brent) ပုင်ႈၶိုၼ်ႈထိုင် 90 တေႃႇလႃႇပၢႆ ၼႆယဝ်ႉ။