ၵူၼ်းမိူင်းဝဵင်းမိူင်းပၢႆး ၾၢႆၶုၼ် ဢၼ်ပၢႆႈၽေးသိုၵ်းမႃးယူႇဝႆႉၼႂ်း ၸႄႈဝဵင်းပၢင်လွင်းလႄႈ ၸွမ်းလႅၼ်လိၼ် တႆး- ယၢင်းလႅင်ၸိူဝ်းၼၼ်ႉ  တေႃႇထိုင်ယၢမ်းလဵဝ်ႁိုင်ၼၢၼ်းၶၢဝ်းတၢင်း 4-5 ပီယဝ်ႉ ပႆႇၸၢင်ႈပွၵ်ႈ ယူႇၶိုၼ်း ႁိူၼ်းယေး ၵေႃႈ တိုၵ်ႉမီးယူႇတင်းၼမ်။

 သိုၵ်းမၢၼ်ႈ ယိုတ်းဢဝ်ဢႃႇၼႃႇၸိုင်ႈမိူင်းယဝ်ႉဢမ်ႇႁိုင်ပၢင်တိုၵ်းပဵၼ်ႁႅင်း ၼႂ်းထုင်ႉၾၢႆၶုၼ်၊ မိူင်းပၢႆး  ဢိၵ်ႇၸွမ်းလႅၼ်လိၼ် တႆး- ယၢင်းလႅင် ၸိူဝ်းၼႆႉ  –  ၵူၼ်းမိူင်းပိုၼ်ႉတီႈ လႆႈငိူင်ႉပၢႆႈ ၼပ်ႉႁူဝ်မိုၼ်ႇ ႁူဝ်သႅၼ်  ။ ၽွင်းပၢင်တိုၵ်းၼၼ်ႉ ႁိူၼ်းယေးၵူၼ်းမိူင်း ၺႃးၸၢၵ်ႇမၢၵ်ႇလူႉၵွႆၵႂႃႇတၢင်းၼမ်။

ယၢမ်းလဵဝ် ၵူၼ်းပၢႆႈၽေးသိုၵ်းၵမ်ႈၽွင်ႈ ပွၵ်ႈမိူဝ်းယူႇႁိူၼ်းၶိုၼ်းႁိူၼ်းယေးယဝ်ႉသေတႃႉ ၵမ်ႈၽွင်ႈသမ်ႉ တိုၵ်ႉသေႃႉယူႇဝႆႉၼႂ်းၸႄႈဝဵင်းပၢင်လွင်း။

ၼၢင်းယိင်း ၵူၼ်းမိူင်းၾၢႆၶုၼ် ဢၼ်ပၢႆႈၽေးသိုၵ်းမႃးယူႇဝႆႉတီႈဝဵင်းပၢင်လွင်းလၢတ်ႈဝႃႈ –  ပၢႆႈၽေးသိုၵ်းမႃးၼႆႉ ႁိုင်ၶၢဝ်းတၢင်း 5 ပီပၢႆ မီးၼႂ်း 6 ပီယဝ်ႉ။ တီႈယူႇၵေႃႈ လႆႈၶၢႆႉ 3 – 4 ၵမ်း။ ၶၢဝ်းၾူၼ် ၶၢဝ်းၽုၵ်ႇသွမ်ႈၼင်ႇမိူဝ်ႈလဵဝ်ၼႆႉ ၶႂ်ႈမိူဝ်းႁိူၼ်းၶိုၼ်း။ ၵူၺ်းၵႃႈ ႁိူၼ်းယေး လူႉၵွႆၵႂႃႇၵႄႈပၢင်တိုၵ်းယဝ်ႉလႄႈ ဢမ်ႇမီးတီႈယူႇ။ သင်ဝႃႈမိူဝ်းၶိုၼ်းၵေႃႈ တေလႆႈမိူဝ်းမူၼ်ႉမႄးပူၵ်းပွင်ႁိူၼ်း၊ ပဵၼ်ဢၼ်ယၢပ်ႇၽိုတ်ႇတေႉတေႉ ဝႃႈၼႆ။

ၼႂ်းဝဵင်းမိူင်းပၢႆး ၾၢႆၶုၼ်ၼႆႉ ယၢမ်းလဵဝ် သဵင်ၵွင်ႈယဵၼ်ဝႆႉသေတႃႉ သိုၵ်းမၢၼ်ႈ တင်း ပျီႇတူႉၸိတ်ႉ ၵႆႉႁွၼ်ႈထဝ်ႇၵႂႃႇမႃး၊ တင်ႈၵဵတ်ႉလၢၼ်ႇသေ ပႂ်ႉၵူတ်ႇထတ်း။ ၵူၼ်းပိုၼ်ႉတီႈ တိုၵ်ႉလႆႈမႆႈၸႂ်လွင်ႈႁူမ်ႇလူမ်ႈဝႆႉ ဝႃႈၼႆ။

မိူၼ်ၼႆ ၵူၼ်းမိူင်းလွႆၶေႃ မိူင်းယၢင်းလႅင် ဢၼ်လႆႈပၢႆႈၽေးသိုၵ်း မႃးသေႃႉယူႇဝႆႉတီႈ ၼႂ်းၸႄႈဝဵင်းတူၼ်ႈတီးၵေႃႈ တိုၵ်ႉလႆႈမႆႈၸႂ် တႃႇတေပွၵ်ႈမိူဝ်းယူႇၶိုၼ်းႁိူၼ်းယေး၊ လႆႈမႆႈၸႂ်ပႃး ၽေးမၢၵ်ႇမႅင်းၾင်လိၼ် ဢၼ်တိုၵ်ႉၵိုတ်းၶမ်ဝႆႉ ၼႂ်းသူၼ်ၼႂ်းဝၢင်းႁိူၼ်းၸိူဝ်းၼၼ်ႉ ဝႃႈၼႆ။