မိူဝ်ႈၼႆႉ ဝၼ်းတီႈ 19/01/2026 ယၢမ်းၵၢင်ၼႂ် 9 မူင်း ဢူးၶိၼ်ႇမွင်ႇဢူး ႁွင်ႈၵၢၼ်ၾၢႆႇၽွင်းငမ်း မိူင်းတႆး တႂ်ၵၢၼ်ၽွင်းငမ်းသိုၵ်းမၢၼ်ႈ ႁူပ်ႉထူပ်းၵၼ်တင်း ပႃႇတီႇၵၢၼ်မိူင်း ၊ ၵၢင်ႉၵႄႇၼႂ်းပွၵ်ႉၼႂ်းဝၢၼ်ႈ၊ ႁွင်ႈၵၢၼ်ၾၢႆႇၽွင်းငမ်းၵူႈလွင်ႈလွင်ႈ လႄႈ ၸုမ်းၵေႃႇမသျိၼ်ႊပၢင်လိူၵ်ႈတင်ႈ ၼႂ်းထုင်ႉၼွင်ႁၢႆးယႃႈ ၸႄႈဝဵင်းယွင်ႁူၺ်ႈ ၸိုင်ႈတႆးပွတ်းၸၢၼ်း။
ဝၢႆးၼၼ်ႉ လူင်းပိုၼ်ႉတီႈၵူတ်ႇထတ်း ၶိူင်ႈၸၢၵ်ႈတွတ်ႈၶႅပ်းၵၢင်ၸႂ် (MEVM) Installation သေ ပၼ်ပိုၼ်ႉႁူႉၵဵဝ်ႇၵပ်းလွင်ႈပၢင်လိူၵ်ႈတင်ႈၵူၺ်းဢမ်ႇၵႃး သေႃႇသူၼ်းပႃး ႁႂ်ႈၵူၼ်းမိူင်း ၵႂႃႇသႂ်ႇၶႅပ်း ၵၢင်ၸႂ်သေတႃႉ ၵူၼ်းမိူင်းၼႂ်းထုင်ႉၼွင်ႁၢႆးယႃႈ ဢမ်ႇသူၼ်ၸႂ်ၵူၺ်းဢမ်ႇၵႃး ယင်းဢမ်ႇႁၼ်လီၼိူဝ်ပၢင်လိူၵ်ႈတင်ႈထႅင်ႈၵွၼ်ႇၼႆ ၵူၼ်းမိူင်း ၼႂ်းပိုၼ်ႉတီႈထုင်ႉၼွင်ႁၢႆးယႃႈ လၢတ်ႈၼင်ႇၼႆ။
ၵူၼ်းၸၢႆး ဢႃႇယု 30 ပီပၢႆ ၵေႃႉယူႇဝႆႉၼႂ်းထုင်ႉၼႂ်းၼွင်ႁၢႆးယႃႈ လၢတ်ႈၼႄတီႈၽူႈတွႆႇႁွၵ်ႈဝႃႈ –“ ၶဝ်တႄႇႁဵတ်းၵၢၼ်လူင်းသူၼ်းတုမ်ဝႆႉယဝ်ႉဢေႃႈ။ ၸွမ်းတၢင်းၵေႃႈ ပႃႇတီႇသၢင်ႇသီႈၶဝ် မႃးတင်ႈပၢႆႉဝႆႉယဝ်ႉ။ ၶဝ်လူင်းပၼ်ပိုၼ်ႉႁူႉလၢႆးတွတ်ႈၶႅပ်းၵၢင်ၸႂ်ၸိူဝ်းၼႆႉပႃး။ ၶဝ်မႃး လၢတ်ႈသင်လၢႆလၢႆၵေႃႈဢမ်ႇႁူႉ ၊ ၽႂ်ၵေႃႈဢမ်ႇသူၼ်ၸႂ် ၊ၽႂ်ၵေႃႈဢမ်ႇၶႂ်ႈၵႂႃႇတွတ်ႈၶႅပ်း ၵၢင်ၸႂ်၊ သဵၼ်ႈမၢႆ ဢၼ်ၶဝ်ပႃႉဝႆႉၸိူဝ်းၼၼ်ႉၵေႃႈ ၽႂ်ဢမ်ႇၵႂႃႇတူၺ်း ၊ ပၢင်လိူၵ်ႈတင်ႈၼႆႉ တွၼ်ႈတႃႇ ၵူၼ်းမိူင်းၵေႃႈ တေဢမ်ႇမီးၽွၼ်းလီသင်မႃး ၊ ပၢႆႉပႃႇတီႇၶဝ်ၸိူဝ်းၼၼ်ႉၵေႃႈ မီးၵူၼ်းၵႂႃႇယႃႉၵွၼ်ႇ”- ဝႃႈၼႆ ။
ပူၼ်ႉမႃးမိူဝ်ႈဝၼ်းတီႈ 27/12/2025 မီးၵူၼ်းၵႂႃႇယႃႉၽိုၼ်ၸေႈသဵၼ်ႈမၢႆၸိုဝ်ႈ ၵူၼ်းၸိူဝ်းတေလႆႈၵႂႃႇပၼ်သဵင်ၵၢင်ၸႂ် ဢၼ်ပႃႉဝႆႉတီႈႁူင်းႁဵၼ်း ဝၢၼ်ႈလႄႇပိၼ်ႇ (လယ်ပြင်) သေ ဢဝ်ၼမ်ႉယႃႈလႅင်ၵႂႃႇတႃး၊ ၵႂႃႇယႃႉပၢႆႉပႃႇတီႇသၢင်ႇသီႈ (USDP) ၶဝ် လူင်းသူၼ်းတုမ်ႁႃသဵင်ဝႆႉၼၼ်ႉ ၼႆယဝ်ႉ ။
ၵူၼ်းၸၢႆးၵေႃႉယူႇၼႂ်းပိုၼ်ႉတီႈလၢတ်ႈတီႈၽူႈတွႆႇႁွၵ်ႈဝႃႈ -“ ႁၼ်တေႃႇၼႃႈတေႃႇတႃယဝ်ႉၶႃႈ။ လုၵ်ႈဢွၼ်ႇၼုမ်ႇၶဝ်ၸိူဝ်းၼၼ်ႉ ဢဝ်ၼမ်ႉယႃလႅင်သေ ၵႂႃႇယႃႉပၢႆႉသူၼ်းတုမ် ဢၼ်ပႃႇတီႇသၢင်ႇသီႈၶဝ်မႃးပူၵ်းဝႆႉၼၼ်ႉ ၊ ယွၼ်ႉဢမ်ႇလႆႈၸႂ်ၶႃႈလႄႈယူဝ်ႉ။ ၶဝ် ဢဝ်မၢၵ်ႇႁိၼ် ထိုမ်ႈသႂ်ႇၸိူဝ်းၼႆႉၵေႃႈႁဵတ်းဢေႃႈ ၊ သဵၼ်ႈမၢႆ ၸိုဝ်ႈၵူၼ်းၸိူဝ်းတေလႆႈၵႂႃႇပၼ် သဵင် ဢၼ်ၶဝ်ဢဝ်မႃးတိတ်းပႃႉဝႆႉ တီႈႁူင်းႁဵၼ်းၸိူဝ်းၼၼ်ႉၵေႃႈ ယႃႉပႃးဢေႃႈ”- ၼႆယဝ်ႉ ။
ပေႃးထိုင်မႃး ဝၼ်းတီႈ 25/01/2026 ၼႆႉ တေပဵၼ်ဝၼ်းပၢင်လိူၵ်ႈတင်ႈ ပွၵ်ႈၵမ်း 3 ။ ၵူၼ်းမိူင်းၸိူဝ်းယူႇၼႂ်းထုင်ႉၼွင်ႁၢႆးယႃႈၵေႃႈ တေလႆႈၵႂႃႇပၼ်ၶႅပ်းၵၢင်ၸႂ်သေ ပႃႇတီႇၵၢၼ်မိူင်း ၸိူဝ်းၶဝ်ႈလိူၵ်ႈတင်ႈ ၼႂ်းၸႄႈဝဵင်းယွင်ႁူၺ်ႈၼႆႉ မီးပႃႇတီႇၸိူဝ်ႉၸၢတ်ႈဢၢင်းသႃး (အင်းအမျိုးသားအဖွဲ့ချုပ်ပါတီ INLP) ၊ ပႃႇတီႇၸၢဝ်းၶိူဝ်းၽွမ်ႉႁူမ်ႈ (တစည)၊ ပႃႇတီႇၼမ်းၼႃႈ ၵူၼ်းမိူင်း (PPP) ၊ ပႃႇတီႇသၢင်ႇသီႈ(USDP) ၸဵမ်ၸိူဝ်းၼႆႉ ဝႃႈၼႆ ။
ပၢင်လိူၵ်ႈတင်ႈ ပွၵ်ႈၵမ်း 3 ၼႆႉ မိူင်းႁူမ်ႈတုမ်ပတ်းပိုၼ်ႉ တေၸတ်းႁဵတ်း 63 ၸႄႈဝဵင်း ၼႂ်းမိူင်းတႆး ပႃး 9 ၸႄႈဝဵင်း ပဵၼ် ၸႄႈဝဵင်းမၢၵ်ႇမၢင်၊ ၸႄႈဝဵင်းပၢင်လွင်း၊ ၸႄႈဝဵင်းယွင် ႁူၺ်ႈ၊ ၸႄႈဝဵင်းၾၢႆၶုၼ်၊ ၸႄႈဝဵင်းမိူင်းၼၢႆး၊ ၸႄႈဝဵင်းၵေးသီး၊ ၸႄႈဝဵင်းမိူင်းသူႈ၊ ၸႄႈဝဵင်းသီႇပေႃႉ လႄႈ ၸႄႈဝဵင်းၵျွၵ်ႉမႄး ။
သိုၵ်းမၢၼ်ႈၼႆႉ ၸတ်းႁဵတ်းပၢင်လိူၵ်ႈတင်ႈၸုမ်ႇၵူႈ ၼႂ်းမိူင်းႁူမ်ႈတုမ်ပတ်းပိုၼ်ႉၵႂႃႇ သၢမ်ပွၵ်ႈ။ ပွၵ်ႈၵမ်းၼိုင်ႈ ၸတ်းႁဵတ်း ဝၼ်းတီႈ 28 လိူၼ်တီႊသႅမ်ႊပိူဝ်ႊ ပီ 2025၊ ပွၵ်ႈၵမ်းသွင် ၸတ်းယဝ်ႉၵႂႃႇ မိူဝ်ႈဝၼ်းတီႈ 11 လိူၼ်ၵျႅၼ်ႊၼိဝ်ႊရီႊ ပီ 2026 ၊ ပွၵ်ႈၵမ်းသၢမ်တႄႉ တေႁဵတ်းၵႂႃႇ ၼႂ်းဝၼ်းတီႈ 25 လိူၼ်ၵျႅၼ်ႊၼိဝ်ႊရီႊ ပီ 2026 ၼႆယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ