ၸဝ်ႈသူၼ်ၸဝ်ႈၼႃးၼႂ်းဝဵင်းပၢင်လွင်းၸိုင်ႈတႆးပွတ်းၸၢၼ်း ၽုၵ်ႇၶဝ်ႈၵၢပ်ႇ- ၽွင်းယိူဝ်ႈယႃႈဢွၵ်ႇမႃးၼႂ်းၵႄႈတူၼ်ႈၶဝ်ႈၵၢပ်ႇၼၼ်ႉ သမ်ႉသိုဝ်ႉယႃႈၶႃႈယိူဝ်ႈမႃးသိတ်း ထိုင်တီႈတူၼ်ႈ ၶဝ်ႈၵၢပ်ႇၵေႃႈၼဝ်ႈတၢႆၵႂႃႇ ၼပ်ႉႁူဝ်ႁဵင်ဢေႊၶိူဝ်ႊ။

ၸဝ်ႈသူၼ် ၵူၼ်းဝဵင်းပၢင်လွင်းၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ – “ပီၼႆႉ လႅၵ်ႈၸႂ်ႉယႃႈၶႃႈယိူဝ်ႈ မိၵ်ႈမႂ်ႇ ၸိုဝ်ႈမၼ်းႁွင်ႉဝႃႈ – ႁူင်းႁူင်းတွၵ်ႉ – ၼႆၼၼ်ႉ။ ဝၢႆးသိတ်းယႃႈယႃၼၼ်ႉ ယဝ်ႉ2-3 ဝၼ်းၵူၺ်း တူၼ်ႈၶဝ်ႈၵၢပ်ႇၵေႃႈ ႁဵဝ်ႇၼဝ်ႈလိူင်သေလူမ်ႉတၢႆတင်းသူၼ်တင်းသူၼ်။ ဝၢၼ်ႈႁဝ်းၶႃႈၼႆႉ ၺႃးတင်းဝၢၼ်ႈဢေႃႈၼႆႉ။ ၼပ်ႉႁူဝ်ႁဵင်ဢေႊၶိူဝ်ႊမၼ်းယဝ်ႉဢၼ် ၺႃးၼႆႉ”- ဝႃႈၼႆ။

ၵဵဝ်ႇၵပ်းလွင်ႈယႃႈၶႃႈယိူဝ်ႈမႂ်ႇၼႆႉသေထိုင်တီႈ ႁဵတ်းႁႂ်ႈၶဝ်ႈၵၢပ်ႇၵူၼ်းတင်းဝၢၼ်ႈ သမ်ႉပေႃးလႆႈတၢႆၸွမ်းၼႆႉ- ၵူၼ်းဝၢၼ်ႈတၢင်းဝဵင်းပၢင်လွင်းတုၵ်းယွၼ်းဝႃႈ ၶႂ်ႈႁႂ်ႈၶွမ်ႊပၼီႊယႃႈၶႃႈ ယိူဝ်ႈၼႆႉ ၸွႆႈႁပ်ႉပုၼ်ႈၽွၼ်းသၢႆႈတႅၼ်းပၼ်ၶိုၼ်းၽွင်ႈ ဝႃႈၼႆ။

ၸဝ်ႈသူၼ်ၶဝ်ႈၵၢပ်ႇဝဵင်းပၢင်လွင်းလၢတ်ႈဝႃႈ ဢိင်ၼိူဝ်ၵႃႈၶၼ်ၵုၼ်ႇသုင်သေ ၶဝ်ႈၵၢပ်ႇၼိုင်ႈသူၼ်ၼႆႉ လႆႈၸႂ်ႈငိုၼ်းတိုၼ်းလၢင်းဢမ်ႇယွမ်း 20 သႅၼ်ပျႃးဝႃႈၼႆ။

”ၵႃႈၸိူဝ်ႉၽၼ်းသမ်ႉၼိုင်ႈထူင် 4 သႅၼ်ပျႃး။ ၵႃႈၾုၼ်ႇထၢတ်ႈသမ်ႉ ၼိုင်ႈထူင်မွၵ်ႈ 2 သႅၼ်ပျႃး ။ ၵွပ်ႈၼႆ ပေႃးၽုၵ်ႇၶဝ်ႈၵၢပ်ႇ ၼိုင်ႈဢေႊၶိူဝ်ႊၼႆလူဝ်ႇၸႂ်ႉငိုၼ်းယူႇမွၵ်ႈ 20 သႅၼ်ပျႃး။ ႁဝ်းၶႃႈပီၼႆ ၼိုင်ႈၵေႃႉၼႆႉၽုၵ်ႇဢမ်ႇယွမ်း 5 ဢေႊၶိူဝ်ႊ။ ယၢမ်းလဵဝ်တႄႉလူႉမူတ်းယဝ်ႉ သင်ဝႃႈၸဝ်ႈၶွင်ၶွမ်ႊပၼီႊၼၼ်ႉဢမ်ႇၸွႆႈၶိုၼ်းသေဢိတ်းတႄႉ သုမ်းမူတ်းပိတ်းယဝ်ႉ ဢမ်ႇ ၵိုတ်းသင်ယဝ်ႉ” – ဝႃႈၼႆ။

ပီၼႆႉ ဢၼ်ၸႂ်ႉယႃႈၶႃႈယိူဝ်ႈသေ ဢဝ်တူၼ်ႈၶဝ်ႈၵၢပ်ႇလူႉပႃးၼႆႉဢမ်ႇၸႂ်ႈတီႈဝဵင်းပၢင်လွင်းၵူၺ်း။ ၼႂ်းၸႄႈဝဵင်းတူၼ်ႈတီး ဢုမ်ႇပဝ်း ပၢင်လႃႈ သီႇသႅင်ႇ ၸိူဝ်းၼႆႉၵေႃႈ ဢွၼ်ၵၼ်ၸႂ်ႉယႃႈၶႃႈယိူဝ်ႈ ႁူင်းႁူင်းတွၵ်ႉ ၼႆႉသေ ႁဵတ်းႁႂ်ႈတူၼ်ႈၶဝ်ႈၵၢပ်ႇတၢႆတင်းသူၼ် ၵေႃႈမီး။

ယႃႈၶႃႈယိူဝ်ႈယႃႈၼႆႉ ၸၢင်ႈႁဵတ်းႁႂ်ႈထၢတ်ႈလိၼ်သူၼ်ႁႅင်ႈ၊ ယႃႉၾုၼ်ႇလိၼ်ႁၢႆႉႁႅင်းလႄႈ ဢၼ်လီလိူဝ်ပိူၼ်ႈတႄႉ ယိူဝ်ႈယႃႈၼၼ်ႉ ၸဝ်ႈသူၼ်ၸဝ်ႈၼႃး ၸွၼ်ႉၽဵဝ်ႈဢဝ်လီသေပိူၼ်ႈ ဝႃႈၼႆ။

ၸဝ်ႈသူၼ်သိုပ်ႇလၢတ်ႈထႅင်ႈဝႃႈ ယႃႈၶႃႈယိူဝ်ႈဢၼ်ၼႆႉ ၵူႈပီႁဝ်းၶႃႈဢမ်ႇၸႂ်ႉ ၸင်ႇႁႃမႃးၸႂ်ႉတူၺ်းပီၼႆႉ။

ၵွပ်ႈၼႆ ၶႂ်ႈပၼ်ၾၢင်ႉၸဝ်ႈသူၼ်တၢင်ႇဝၢၼ်ႈတၢင်ႇဝဵင်းဝႃႈ ၶူဝ်းႁႆႈၶူဝ်းသူၼ်ႁဝ်းဢီႈသင်ၵေႃႈယဝ်ႉ သင်ဝႃႈပဵၼ်မဵဝ်းႁဝ်းဢမ်ႇယၢမ်ႈၸႂ်ႉၼႆ ၵွမ်ႉၵႃႈၶဝ်ပိုၼ်ၽၢဝ်ႇၶူတ်းသၽႃးၶၢႆၶႅမ်ႉ ၵွမ်ႉၵႃႈ ၵႃႈၶၼ်မၼ်းထုၵ်ႇၸိူဝ်းၼႆႉၵူၺ်းတႄႉယႃႇပေသိုဝ်ႉၸႂ်ႉလႃးလႃး ။ မၼ်းၸၢင်ႈမေႃၽိတ်းၸိူင်ႉႁဝ်းၼႆႉ – ဝႃႈၼႆ။

ဢမ်ႇၼၼ် သင်ဝႃႈဢမ်ႇၸႂ်ႉယႃႈၶႃႈယိူဝ်ႈဢမ်ႇလႆႈလႃးလႃးၸိုင် ၸဝ်ႈသူၼ်တၵ်းလႆႈလဵပ်ႈႁဵၼ်းလီလီဝႃႈ သူၼ်ၵႂၢင်ႈမွၵ်ႈလႂ်ၼႆႉ တေလႆႈၸႂ်ႉယႃႈၶႃႈယိူဝ်ႈၼမ်ၵႃႈႁိုဝ်ၼႆၸိူဝ်းၼႆႉ ၸင်ႇတေလွတ်ႈၽေး ၸဝ်ႈသူၼ်ဝဵင်းပၢင်လွင်းလၢတ်ႈၼင်ႇၼႆ။

ၼၢင်းၶမ်းၵူႇ(တႅမ်ႈဝႆႉၾၢႆႇမၢၼ်ႈ)