မိူဝ်ႈၼႆႉ ဝၼ်းတီႈ 2/4/2026 ယၢမ်းၵၢင်ၼႂ် ဢိင်ႇသၼ်ႇ(ၽႅၼ်ႇလိၼ်ဝႆ) ႁႅင်း 7.4 မႅၵ်ႇၼီႇၵျူႉ တူင်ႉၼိုင်ၵႂႃႇတီႈမိူင်း ဢိၼ်ႇတူဝ်ႇၼီးသျႃး (Indonesia)၊ ၸဝ်ႈၼႃႈတီႈ ပိုၼ်ၽၢဝ်ႇ ဢွၵ်ႇၽေးၼမ်ႉ သူႇၼႃႇမီႇသေတႃႉ ႁိုင်ၶၢဝ်းတၢင်း 2 ၸူဝ်ႈမူင်း ယုၵ်ႉလိူၵ်ႈၶိုၼ်းၶေႃႈပိုၼ်ၽၢဝ်ႇဝႆႉၼၼ်ႉ ဝႃႈၼႆ။
ဢိင်ႇသၼ်ႇ ပၵ်းသုၼ်တႂ်ႈၼမ်ႉပၢင်ႇလၢႆႇ မေႃႇလူႇၵႃႇ (Molucca) ယၢၼ်ၵႆၵုၼ် တႃႊၼတေႊ ဢၼ်မီးႁူဝ်ၵူၼ်းသွင်သႅၼ်ပၢႆၼၼ်ႉ မွၵ်ႈ 75 လၵ်းသေ တူင်ႉၼိုင်ၵႂႃႇႁၢဝ်ႈႁႅင်း။
ႁိူၼ်းယေးတီႈယူႇလႄႈ ႁိူၼ်းတိုၵ်းသုင် ၵူၼ်ႇပင်းလူႉၵွႆၵႂႃႇတင်းၼမ်၊ လိူဝ်ၼၼ်ႉ မီးၵူၼ်းမၢတ်ႇၸဵပ်းလူႉတၢႆၸွမ်းသေတႃႉ ႁူဝ်ၼပ်ႉတႅတ်ႈတေႃးတႄႉ ပႆႇႁၼ်ပိုၼ်ၽၢဝ်ႇ။
ယူႇတီႈႁွင်ႈၵၢၼ်ၾၢႆႇပႂ်ႉတူၺ်းဢိင်ႇသၼ်ႇ မိူင်းဢမေႊရိၵၼ်ႊ USGS ႁၢႆးငၢၼ်းဝႆႉဝႃႈ ႁႅင်းဢိင်ႇသၼ်ႇ မီး 7.8 မႅၵ်ႇၼီႇၵျူႉ။ ဝၢႆးလင်ၼၼ်ႉ ဢိင်ႇသၼ်ႇႁႅင်းယႂ်ႇ သိုပ်ႇတူင်ႉၼိုင်ၵႂႃႇထႅင်ႈ 2 ၵမ်း ဝႃႈၼႆ။
မိူင်းဢိၼ်ႇတူဝ်ႇၼီးသျႃးၼႆႉ ပဵၼ်မိူင်း ၵႆႉႁူပ်ႉၽေးဢိင်ႇသၼ်ႇ။ မိူဝ်ႈပီ 2022 ပူၼ်ႉမႃးၼၼ်ႉ ယွၼ်ႉဢိင်ႇသၼ်ႇသေ ယၢမ်ႈမီးၵူၼ်းလူႉတၢႆ 600 ပၢႆ။ လိူဝ်ၼၼ်ႉ မိူဝ်ႈပီ 2018 သမ်ႉ ယွၼ်ႉၽေးဢိင်ႇသၼ်ႇ လႄႈတင်း ၽေးသူႇၼႃႇမီႇသေ မီးၵူၼ်းလူႉတၢႆထိုင် 4300 ပၢႆ၊ ႁိူၼ်းယေးတီႈယူႇၵေႃႈ လူႉၵွႆၵႂႃႇတင်းၼမ် ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ