ၽႅၼ်ႇလိၼ်ဝႆ (ဢိင်ႇသၼ်ႇ) ၵႂႃႇတီႈမိူင်းၵူဝ်ႊလမ်ႊပီႊယိူဝ်ႊ မိူဝ်ႈဝၼ်းၸၼ်ဝူင်ႈပူၼ်ႉမႃးၼႆႉ တၢင်ႉႁႅင်းမီး 7.4 မၵ်ႊၵၼီႊၵျုတ်ႊလႄႈ ၵူၼ်းမိူင်းၸိူဝ်းယူႇသဝ်းၼႂ်းပိုၼ်ႉတီႈ လူႉတၢႆၵႂႃႇ 294 ၵေႃႉ မၢတ်ႇၸဵပ်းၵႂႃႇ 3935 ၵေႃႉၼႆ ႁွင်ႈၵၢၼ်ၸတ်းၽႅၼ်ႁေႉႁၢမ်ႈၽေးသၽႃႇဝ ၸၼ်ႉၸိူဝ်ႉၸၢတ်ႈ (UNGRD) ႁၢၼ်းငၢၼ်းဢွၵ်ႇဝႆႉၼင်ႇၼႆ။

မိူဝ်ႈဝၼ်းတီႈ 15 လိူၼ်ဢေႃးၵၢတ်ႉသ် ယၢမ်းၵၢင်ၼႂ် 6 မူင်းၶိုင်ႈ ဢိင်ႇသၼ်ႇလႄႈ ၵူၼ်းမိူင်းၸိူဝ်းႁႃတူဝ်ပႆႇႁၼ်ၼၼ်ႉ တင်းသဵင်ႈမီး 320 ၵေႃႉ၊ ၾၢႆႇၸုမ်းၸွႆႈထႅမ်ၵၢၼ်တူင်ႇဝူင်းၵူၼ်း ၶဝ် ၸွႆႈလႆႈသၢႆၸႂ်ၵူၼ်း မီး 353 ၵေႃႉ။

ယွၼ်ႉၽႅၼ်ႇလိၼ်ဝႆႁႅင်းသေ ၸႄႈဝဵင်းၼႂ်းမိူင်းၵူဝ်ႊလမ်ႊပီႊယိူဝ်ႊ တုမ်ႉတိူဝ်ႉၵႂႃႇႁၢဝ်ႈႁႅင်းတႃႇ 32 ၸႄႈဝဵင်း။ ႁိူၼ်းတိုၵ်းသုင်ဢၼ်လူႉၵွႆလႅဝ်ၽႅဝ်ႉၵႂႃႇ မီး 66 လုၵ်ႈ လႄႈ ႁိူၼ်းယေး ၵူၼ်းမိူင်းတႃႇ 14493 လင်လႅဝ်ၽႅဝ်ႉၵႂႃႇ ထိုင်တီႈဢမ်ႇဢဝ်သင်ၶိုၼ်းလႆႈ။ လိူဝ်ၼၼ်ႉ ၵူၼ်းမိူင်းတႃႇမုင်ႉႁေႃႁိူၼ်း 54008 လင် ႁူဝ်ၼပ်ႉၵူၼ်း 115461 ၵေႃႉ လႆႈမၢတ်ႇၸဵပ်းတုမ်ႉ တိူဝ်ႉၵႂႃႇ ၼႆယဝ်ႉ။

လႆႈႁူႉဝႃႈ ယၢမ်းလဵဝ် ၾၢႆႇၸုမ်းၸွႆႈထႅမ်ၸၢတ်ႈၸိုင်ႈလုမ်ႈၾႃႉ တင်း လူင်ပွင်ၸိုင်ႈမိူင်းဢမေႊရိၵၼ်ႊ၊ ဢီႊၵူၺ်ႊတေႃႊ လႄႈ မိူင်းဢိတ်ႊသရေႊၶဝ်ၵေႃႈ သူင်ႇၸုမ်းၶူၼ်ႉသွၵ်ႈႁႃၸွႆႈထႅမ်ၵူၼ်းၶဝ် ၵႂႃႇတီႈမိူင်းၵူဝ်ႊလမ်ႊပီႊယိူဝ်ႊဝႆႉ ဝႃႈၼႆ။

မိူဝ်ႈဝၼ်းတီႈ 15 လိူၼ်ဢေႃးၵၢတ်ႉသ်ပူၼ်ႉမႃးၼႆႉၵေႃႈ ၽႅၼ်ႇလိၼ်ဝႆ (ဢိင်ႇသၼ်ႇ) ၵႂႃႇတီႈၵုၼ်ၾလေႃႊရိတ်ႉသ် မိူင်းဢိၼ်ႊတူဝ်ႊၼီႊသျႃႊ တၢင်ႉႁႅင်းယႂ်ႇသုတ်းမီး 7.7သေ ဢိင်ႇသၼ်ႇလဵၵ်ႉလဵၵ်ႉဢွၼ်ႇဝႆၵႂႃႇၸွမ်းတၢင်းလင် တႃႇ 341 ၵမ်းလႄႈ ႁိူၼ်းယေးၵူၼ်းမိူင်းလူႉၵွႆၵႂႃႇ 914လင် ၵူၼ်းမိူင်းလူႉတၢႆၵႂႃႇ 53 ၵေႃႉ မၢတ်ႇၸဵပ်းၵႂႃႇ 113 ၵေႃႉ။ ၵူၼ်းမိူင်းတႃႇ 5 ႁဵင် ၵေႃႉ လႆႈၶၢႆႉဢွၵ်ႇပၢႆႈၵႂႃႇယူႇသဝ်းဝႆႉတီႈ ဢွင်ႈလွတ်ႈၽေး ဝႃႈၼႆ။

ၾၢႆႇလူင်ပွင်ၸိုင်ႈမိူင်းၼူႊသႃႊတၼ်ႊၵႃႊရႃႊပွတ်းဢွၵ်ႇတႄႉ ပိုၼ်ၽၢဝ်ႇဢွၵ်ႇဝႆႉဝႃႈ ၼႂ်းၶၢဝ်းတၢင်း ဝၼ်းတီႈ 15 ထိုင် ဝၼ်းတီႈ 28 ၼႆႉ မၵ်းမၼ်ႈပဵၼ်ဝႆႉ ငဝ်းလၢႆးၶိုၵ်ႉၶၵ်ႉတႃႇၸွႆႈ ထႅမ်ၵူၼ်း ႁိုင်ၶၢဝ်းတၢင်း 14 ဝၼ်း ဝႃႈၼႆ။

ႁိူၼ်းယေးၸိူဝ်းလူႉၵွႆၵႂႃႇ တႃႇ 914 လင်ၼၼ်ႉ တႃႇ 126 လင်တႄႉ လူႉၵွႆၵႂႃႇတၢၼ်ႇတၢၼ်ႇမၼ်းသေ တႃႇ 317 လင်တႄႉ လူႉၵွႆၵႂႃႇဢိတ်းဢီႈ။ ၼႂ်းၼၼ်ႉ ပႃးႁူင်းႁဵၼ်း လႄႈ ႁိူၼ်း တိုၵ်းၵဵဝ်ႇၶွင်ႈပၢႆးပၺ်ႇၺႃႇ တႃႇ 93 လင်၊ ႁူင်းၵေႃႇၵၢႆႇၾၢႆႇပၢႆးယူႇလီ တႃႇ 36 လင် လႄႈ ႁူင်းၵေႃႇၵၢႆႇႁွင်ႈၵၢၼ်လူင်ပွင်ၸိုင်ႈ 38 လင် ဝႃႈၼႆ။

ၼႂ်းၸိုင်ႈမိူင်းဢိၼ်ႊတူဝ်ႊၼီႊသျႃႊ ဢၼ်မီးႁူဝ်ၼပ်ႉၵူၼ်း 290 လၢၼ်ႉၵေႃႉယူႇသဝ်းဝႆႉၼၼ်ႉ ပဵၼ်ပိုၼ်ႉတီႈဢၼ်မီးၶႅပ်းႁိၼ်လူင်လုမ်ႈၾႃႉမႃးသွၼ်ႉမႅၼ်ႈၵၼ်သေ ယူႇဝႆႉၼိူဝ် “ဝူင်းၾႆးပၸိၾဵၵ်ႉ” လႄႈ ပေႃးဢိင်ႇသၼ်ႇမိူဝ်ႈလႂ်ၵေႃႈ လွႆၾႆးၵမ်းၵမ်းတႅၵ်ႇ ဝႃႈၼႆ။