ၼႂ်းဝၼ်းတီႈ 24 – 25 မိူဝ်ႈဝႃးၵၢင်ၶမ်ႈ လႄႈ မိူဝ်ႈၼႆႉၵၢင်ၼႂ်ၸဝ်ႉ ၽႅၼ်လိၼ်ဝႆ ႁႅင်းယႂ်ႇ သၼ်ႇဝႆၵႂႃႇတီႈမိူင်း ဝႅၼ်ႊၼီႊၸွႆႊလႃႊ လႄႈ မိူင်းၵျပၼ်ႊ၊ မီးၵူၼ်းမၢတ်ႇၸဵပ်းလူႉတၢႆၼမ်၊ ႁိူၼ်းတိုၵ်းယႂ်ႇ ၵူၼ်ႇပင်းလူႉၵွႆ၊ ၽူႈမီးပုၼ်ႈၽွၼ်းၶဝ် တိုၵ်ႉႁိပ်ႈၼႅတ်ႈၸွႆႈထႅမ် ၵူၼ်းထူပ်းၽေးၽႅၼ်ႇလိၼ်ဝႆ ၼႂ်းပိုၼ်ႉတီႈၽႂ်မၼ်း။

ဝၼ်းတီႈ 24 လိူၼ်ၵျုၼ်ႊ (မိူဝ်ႈဝႃး) ယၢမ်းႁူဝ်ၶမ်ႈ 6 မူင်းပၢႆ (မႅၼ်ႈၶၢဝ်းယၢမ်းၵၢင်ၼႂ်ၸဝ်ႉ မိူင်းတႆး မိူဝ်ႈၼႆႉ)ၼၼ်ႉ ၽႅၼ်ႇလိၼ်ဝႆ ႁႅင်းယႂ်ႇ သၼ်ႇဝႆၶွၼ်းၵႂႃႇ 2 ၵမ်းထပ်းၵၼ် ၼႂ်းဝဵင်းလူင် ၵရႃႊၵႅတ်ႉ (Caracas) မိူင်းဝႅၼ်ႊၼီႊၸွႆႊလႃႊ (Venezuela)၊ ႁူင်းၵေႃႇၵၢႆႇ ႁိူၼ်းတိုၵ်းယႂ်ႇလူင် ၵူၼ်ႇပင်းလူႉၵွႆၵႂႃႇတင်းၼမ်။

ၾၢႆႇတႅၵ်ႈထတ်း ၽေးၽႅၼ်ႇလိၼ်ဝႆ မိူင်းဢမေႊရိၵၼ်ႊ (USGS) လၢတ်ႈဝႃႈ – ၽႅၼ်ႇလိၼ်ဝႆ ၵမ်းဢွၼ်တၢင်းသုတ်းၼၼ်ႉ ႁႅင်းသၼ်ႇဝႆ မီး 7.2 မႅၵ်ႊၼီႊၵျုတ်ႉ ယၢၼ်ၵႆၾၢႆႇတူၵ်း ဝဵင်းလူင် ၵရႃႊၵႅတ်ႉ 100 လၵ်း၊ သုၼ်ၵၢင်ၽႅၼ်ႇလိၼ်ဝႆ လိုၵ်ႉလူင်းတႂ်ႈလိၼ် 22 ၵီႊလူဝ်ႊမီႊတႃႊ။

ဝၢႆးလင်ၼၼ်ႉဢမ်ႇႁိုင် ၶႅၼ်ႈၵၼ်လၢႆ ၸႅၵ်ႉၵၢၼ်ႉၵူၺ်း ၽႅၼ်ႇလိၼ်ဝႆထႅင်ႈၵမ်းထီႉသွင် လူၺ်ႈတၢင်းႁႅင်း 7.5 မႅၵ်ႊၼီႊၵျုတ်ႉ၊ တၢင်းလိုၵ်ႉတႂ်ႈလိၼ် 10 ၵီႊလူဝ်ႊမီႊတႃႊ ဝႃႈၼႆ။

ၸုမ်း USGS လၢတ်ႈဝႃႈ ၽႅၼ်ႇလိၼ်ဝႆပွၵ်ႈၼႆႉ ပဵၼ်ဢၼ်ႁႅင်းယႂ်ႇလိူဝ်ပိူၼ်ႈသုတ်း ၼႂ်းၶၢဝ်းတၢင်း 100 ပီပၢႆ၊ ၶၢတ်ႈလၢမ်းဝႆႉဝႃႈ ၸၢင်ႈမီးၵူၼ်းလူႉတၢႆ ၼႂ်းၵႄႈ 1 မိုၼ်ႇထိုင် 1 သႅၼ် ၵေႃႉ။

ယွၼ်ႉၽႅၼ်ႇလိၼ်ဝႆ ႁႅင်းယႂ်ႇ သၼ်ႇဝႆၶွၼ်းၵႂႃႇ သွင်ၵမ်းထပ်းၵၼ်လႄႈ ၼႂ်းပွၵ်ႉၼႂ်းယွမ်ႇ ဢွင်ႈတီႈၵူၼ်းယူႇသဝ်းၵိုၼ်းၶွၼ်ႈၸိူဝ်းၼၼ်ႉ ႁိူၼ်းတိုၵ်း၊ ႁူဝ်ႉဢုတ်ႇ ၵူၼ်ႇပင်းလူႉၵွႆၵႂႃႇတၢင်းၼမ်၊ ၵူၼ်းမိူင်း တိုၼ်ႇသၢၼ်ႈတူၵ်းၸႂ် ဢွၼ်ၵၼ်လႅၼ်ႈဢွၵ်ႇၼွၵ်ႈႁိူၼ်း ၵႂႃႇယူႇသဝ်းၸွမ်းၵၢင်ပၢင်ႇ ၼိူဝ်သဵၼ်ႈတၢင်း ၸဵမ်ၸိူဝ်းၼႆႉ။

ယၢမ်းလဵဝ် ၽူႈႁၢပ်ႇၵၢၼ်ၾၢႆႇၸွႆႈထႅမ်ၼႂ်းပိုၼ်ႉတီႈၶဝ် တိုၵ်ႉဢွၼ်ၵၼ် ၼႅတ်ႈသွၵ်ႈႁႃ ၵူၼ်းၸိူဝ်းၶမ်ဝႆႉတႂ်ႈႁိူၼ်းတိုၵ်းၵူၼ်ႇပင်း ၸိူဝ်းၼၼ်ႉယူႇ။

ၸွမ်ၸိုင်ႈၸူဝ်ႈၶၢဝ်း မိူင်းဝႅၼ်ႊၼီႊသွႆႊလႃႊတႄႉ ပိုၼ်ၽၢဝ်ႇလၢတ်ႈၵႂႃႇ မိူဝ်ႈၼႆႉၵၢင်ၼႂ်ဝႃႈ – မီးၵူၼ်းလူႉတၢႆ 32 ၵေႃႉ၊ မၢတ်ႇၸဵပ်းႁိမ်းၸမ် 700 ၵေႃႉ ဝႃႈၼႆ။

မိူၼ်ၼႆ မိူဝ်ႈၼႆႉၵၢင်ၼႂ် 7 မူင်းၶိုင်ႈ ၸွမ်းၼင်ႇၶၢဝ်းယၢမ်းမိူင်းၵျပၼ်ႊၼၼ်ႉ ၽႅၼ်ႇလိၼ်ဝႆ ႁႅင်း 6.9 မႅၵ်ႊၼီႊၵျုတ်ႉ သၼ်ႇဝႆၵႂႃႇ ၼႂ်းၼမ်ႉပၢင်ႇလၢႆႇ ဢၼ်တေႃႇၼႃႈၵၼ်တင်း တႃႈၼမ်ႉ ဢီႊဝႃႊတႄး မိူင်းၵျပၼ်ႊ၊ ယွၼ်ႉၽႅၼ်ႇလိၼ်ဝႆသေ ၼႃႈၼမ်ႉပၢင်ႇလၢႆႇ ၸၢင်ႈမီးလွင်ႈလႅၵ်ႈလၢႆႈၵႂႃႇယူႇသေတႃႉ တေဢမ်ႇမီးလွင်ႈတုမ်ႉယွၼ်ႈလူႉယႂ်ႇသင်ၼႆ ၽူႈမီးပုၼ်ႈ ၽွၼ်းမိူင်းၵျပၼ်ႊတႄႉ ယိုၼ်ယၼ်လၢတ်ႈဝႆႉၼင်ႇၼႆ။

မိူၼ်ၼႆ မိူဝ်ႈၼႆႉၵၢင်ၼႂ်ၵူၺ်းၼင်ႇၵဝ်ႇ ၽႅၼ်ႇလိၼ်ဝႆ ႁႅင်း 5.6 မႅၵ်ႊၼီႊၵျုတ်ႉ သၼ်ႇဝႆၵႂႃႇ ၼႂ်းပိုၼ်ႉတီႈ ပွတ်းႁွင်ႇ ၵႄႊလီႊၾူဝ်ႊၼီႊၼီႊယိူဝ်ႊ မိူင်းဢမေႊရိၵၼ်ႊ၊ ႁိူၼ်းတိုၵ်းယႂ်ႇ ၵူၼ်ႇပင်းၵႂႃႇၵမ်ႈၽွင်ႈၼႆ သိုဝ်ႇၶၢဝ်ႇၼွၵ်းမိူင်းလၢႆလၢႆတီႈ ႁၢႆးငၢၼ်းဝႆႉ ၼင်ႇၼႆ။