ၸွမ်ၽွင်းလူင် မိူင်းၵျပၼ်ႊလၢတ်ႈဝႃႈ ၼႂ်းႁၢင်လိူၼ်မၢတ်ႉၶျ်ၼႆႉ တေတႄႇဢဝ် ၼမ်ႉမၼ်းမဵၼ် ဢၼ် လႆႈႁူမ်ႈၵၼ်တင်း မိူင်းႁဵတ်းဢွၵ်ႇၼမ်ႉမၼ်းမဵၼ်သေ ၵဵပ်းသိမ်းဝႆႉၸိူဝ်းၼၼ်ႉ ဢဝ်ဢွၵ်ႇမႃးပိုၼ်ၽႄႈပၼ် ဝႃႈၼႆ။

လွင်ႈၼႆႉ ပဵၼ်တွၼ်ႈတႃႇတေၵႄႈလိတ်ႈ ပၼ်ႁႃလွင်ႈၵပ်ႉၵိၼ်း ၼမ်ႉမၼ်းၸၢၵ်ႈ တီႈၼႂ်းမိူင်း ၼႆယဝ်ႉ။ ၵျပၼ်ႊၼႆႉ ပဵၼ်မိူင်းဢၼ်လႆႈပိုင်ႈဢိင် ႁပ်ႉသိုဝ်ႉၼမ်ႉမၼ်းမဵၼ်တီႈၼွၵ်ႈမိူင်းဝႆႉ တၢင်းၼမ်တၢင်းလၢႆ။

ယွၼ်ႉပၢင်တိုၵ်း ၼႂ်းပိုၼ်ႉတီႈတႃဝၼ်းဢွၵ်ႇၵၢင် ဢၼ်ဢမေႊရိၵၼ်ႊ တင်း ဢိတ်ႉသ်ရေႊ ႁူမ်ႈၵၼ် တိုၵ်းတေႃး ဢီႊရၼ်ႊၼၼ်ႉသေ ႁဵတ်းႁႂ်ႈၵၢၼ်တေႃႉသူင်ႇၵႃႉၶၢႆၼမ်ႉမၼ်းမဵၼ် ယၢပ်ႇၽိုတ်ႇ၊ ၵႃႈၶၼ် ပုင်ႈၶိုၼ်ႈသုင် လႄႈ ႁႃသိုဝ်ႉယၢပ်ႇမႃး။

ၼႂ်းဝၼ်းတီႈ 16 လိူၼ်မၢတ်ႉၶျ်ၼႆႉ ၵျပၼ်ႊ လႆႈဢဝ်ၼမ်ႉမၼ်းမဵၼ် လႄႈ ၼမ်ႉမၼ်းၸၢၵ်ႈ ဢၼ်ၵဵပ်းသိမ်းဝႆႉ တီႈႁူင်းၵၢၼ်သုၼ်ႇလဵဝ် ၵုမ်ႇတႃႇ 15 ဝၼ်းၼၼ်ႉ မႃးၸႅၵ်ႇၽႄၶၢႆပၼ် တီႈၼႂ်းလွၵ်းၵၢတ်ႇ ယဝ်ႉ ၵမ်းၼိုင်ႈ။ ပေႃးထိုင်မႃးၼႂ်းဝၼ်းတီႈ 26 လိူၼ်မၢတ်ႉၶျ်ၼႆႉသမ်ႉ တေဢဝ်ၼမ်ႉမၼ်းၸၢၵ်ႈ ဢၼ်လူင်ပွင်ၸိုင်ႈၵဵပ်းသိမ်းဝႆႉၼၼ်ႉ ဢွၵ်ႇမႃးၸႂ်ႉတိုဝ်း။ ၼႂ်းႁၢင်လိူၼ်မၢတ်ႉၶျ် ဢမ်ႇၼၼ် ႁူဝ်လိူၼ် ဢေႊပရိူဝ်ႊသမ်ႉ တေဢဝ်ၼမ်ႉမၼ်းၸၢၵ်ႈ ဢၼ်မိူင်းၵျပၼ်ႊ လႄႈ မိူင်းႁဵတ်းဢွၵ်ႇၼမ်ႉမၼ်းမဵၼ်ၶဝ် ႁူမ်ႈၵၼ်ၵဵပ်းသိမ်းဝႆႉၼၼ်ႉ ဢွၵ်ႇမႃးၸႂ်ႉတိုဝ်းၵႂႃႇ ဝႃႈၼႆ။

မိူင်းၵျပၼ်ႊၼႆႉ ႁူမ်ႈၵၼ်တင်း မိူင်းသေႃႊတီႊဢႃႊရေးပျႃႉ၊ UAE လႄႈ မိူင်းၵူႊဝိတ်ႉၸိူဝ်းၼႆႉသေ ၵဵပ်းသိမ်း ၼမ်ႉမၼ်းမဵၼ် လႄႈ ၼမ်ႉမၼ်းၸၢၵ်ႈဝႆႉ တီႈၼႂ်းမိူင်း။

ၸုမ်းႁႅင်းထၢတ်ႈၵူႈမိူင်းမိူင်း (IEA) လၢတ်ႈဝႃႈ – ၸွမ်းၼင်ႇလၢႆၸိုင်ႈမိူင်း ၼႂ်းလုမ်ႈၾႃႉ ဢွၼ်ၵၼ်တုၵ်းယွၼ်း ႁႂ်ႈဢဝ်ၼမ်ႉမၼ်းၸၢၵ်ႈ ဢၼ်ၵဵပ်းသိမ်းဝႆႉလႄႈ ၼမ်ႉမၼ်းမဵၼ် ဢွၵ်ႇမႃးၸႂ်ႉတိုဝ်းၼႆႉသေ ၵျပၼ်ႊလႆႈဢဝ်ဢွၵ်ႇဝႆႉပၼ် ႁိမ်းၸမ် 80 လၢၼ်ႉပုင်းယဝ်ႉ ဝႃႈၼႆ။ ၵူၺ်းၵႃႈ ၼႂ်းၼၼ်ႉ ၵမ်ႈၼမ်ပဵၼ် ၼမ်ႉမၼ်းလိပ်း ၼႆယဝ်ႉ။