ၵျေႃႉသျူႊဝႃႊ ဝၼ်ႊ (Joshua Van) ၸၢဝ်းၶိူဝ်းၶျၢင်း ဢၼ်ပဵၼ်မႃး ၽူႈလႆႈႁပ်ႉသူး သၢႆႁတ်ႉၶျႅၼ်ႊပီႊယၼ်ႊ တီႈ UFC ၵေႃႉဢွၼ်တၢင်းသုတ်း ၼႂ်းၵူၼ်းမိူင်းႁူမ်ႈတုမ်မၢၼ်ႈ ၼၼ်ႉ တေထုပ်ႉၶႅင်ႇတွႆႇမူၺ်းၸွမ်း ၵူၼ်းမိူင်းၵျပၼ်ႊ ၼႂ်းလိူၼ်ထူၼ်ႈသီႇ (April) ပီၼႆႉ ဝႃႈၼႆ။

တေပဵၼ်မႃးပၢင်ၶႅင်ႇတွႆႇမူၺ်း ၵႅတ်ႇၶႄသူး သၢႆႁတ်ႉၶျႅၼ်ႊပီႊယၼ်ႊမၼ်းၸၢႆး ၵမ်းဢွၼ်တၢင်းသုတ်း။ UFC ၵေႃႈ ပိုၼ်ၽၢဝ်ႇပဵၼ်တၢင်းၵၢၼ်ဝႆႉဝႃႈ ပၢင်ၶႅင်ႇတွႆႇမူၺ်း UFC 327 ၼႆႉ တေၸတ်းႁဵတ်း ၼႂ်းဝၼ်းတီႈ 11 လိူၼ်ထူၼ်ႈသီႇ တီႈဝဵင်း မၢႆႇယႃႇမီႇ မိူင်းဢမေႊရိၵၼ်ႊ။ တီႈပၢင်ၼၼ်ႉ ၵျေႃႉသျူႊဝႃႊ ဝၼ်ႊ (Joshua Van) တေလႆႈထုပ်ႉၶႅင်ႇၵၼ်တင်း တႅတ်ႇသူႇရူဝ် တၢႆႊရႃႊ (Tatsuro Taira) ၵူၼ်းမိူင်းၵျပၼ်ႊ ဝႃႈၼႆ။

ၽူႈတွႆႇမူၺ်း ၵျေႃႉသျူႊဝႃႊ ဝၼ်ႊ ၼႆႉ ထုပ်ႉပေႉ ပၼ်ႊတူဝ်ႊၵျႃႊ ၵူၼ်းမိူင်း ပရႃႊသီႊ သေ ပဵၼ်မႃး ၶျႅၼ်ႊပီႊယၼ်ႊ တီႈ UFC။ ၽူႈတွႆႇမူၺ်း တႅတ်ႇသူႇရူဝ် တၢႆႊရႃႊ ၵူၼ်းမိူင်း ၵျပၼ်ႊသမ်ႉ ထုပ်ႉပေႉ ပရၼ်ႊတၼ်ႊ သေ လႆႈတိုဝ်ႉတၢင်းထုပ်ႉၶႅင်ႇၵၼ်တင်း ၵျေႃႉသျူႊဝႃႊ ဝၼ်ႊ ၽူႈလႆႈဝႆႉသၢႆႁတ်ႉ ၶျႅၼ်ႊပီႊယၼ်ႊ။

ၽူႈတွႆႇမူၺ်း တၢႆႊရႃႊ ၼႆႉ တီႈပၢင်ၶႅင်ႇတွႆႇမူၺ်း ယၢမ်ႈပေႉ 18 ပၢင်သေ သုမ်းၼိုင်ႈပၢင်ၵူၺ်း။ သင်ဝႃႈ မၼ်းၸၢႆး ထုပ်ႉပေႉ ၵျေႃႉသျူႊဝႃႊ ဝၼ်ႊၼႆ တေပဵၼ်မႃး ၶျႅၼ်ႊပီႊယႅၼ်ႊ ၵေႃႉဢွၼ်တၢင်းသုတ်း ၼႂ်းၵူၼ်းမိူင်း ၵျပၼ်ႊ။

ၵျေႃႉသျူႊဝႃႊ ဝၼ်ႊၼႆႉ ပဵၼ်ၸၢဝ်းၶိူဝ်းၶျၢင်း ၵိူတ်ႇၼႂ်းမိူင်းႁူမ်ႈတုမ်မၢၼ်ႈ၊ မိူဝ်ႈလႆႈဢႃယု 8ၶူပ်ႇၼၼ်ႉ လႆႈဢွၵ်ႈၼွၵ်ႈမိူင်း ၵႂႃႇယူႇတီႈမိူင်းမလေးသျႃးၸူဝ်ႈၶၢဝ်း၊ ဝၢႆးၼၼ်ႉ သိုပ်ႇ ၶၢႆႉၵႂႃႇတီႈ မိူင်းဢမေႊရိၵၼ်ႊသေ ၶဝ်ႈၼႂ်းတူင်ႇဝူင်းတွႆႇမူၺ်း၊ ၼႂ်းၵႄႈတၢင်းယၢပ်ႇၽိုတ်ႇလၢႆလွင်ႈၼၼ်ႉ ပဵၼ်မႃး ၽူႈတွႆႇမူၺ်း လႆႈႁတ်ႉသၢႆၶျႅၼ်ႊပီႊယၼ်ႊ UFC ၵေႃႉဢွၼ် တၢင်းသုတ်း ၼႂ်းၵူၼ်းမိူင်းႁူမ်ႈတုမ်မၢၼ်ႈ ၼႆယဝ်ႉ။