ၽူႈတွႆႇမူၺ်း မိူင်းၵျပၼ်ႊ 2 ၵေႃႉ ဝၢႆးၶႅင်ႇတွႆႇမူၺ်း တီႈမိူင်းတူဝ်ႇၵဵဝ်ႇယဝ်ႉ ဢမ်ႇပေႃးႁိုင် ယွၼ်ႉႁွႆးမၢတ်ႇၸဵပ်းႁႅင်းသေ လႆႈလူႉတၢႆၵႂႃႇတင်းသွင် ဝႃႈၼႆ။

ၽူႈတွႆႇမူၺ်း 2 ၵေႃႉၼၼ်ႉ ပဵၼ်သျီႉၵေႇတူဝ်ႇသျီႇ ၵူဝ်ႇတႃႇရီႇ (Shigetoshi Kotari) ပဵၼ်ၽူႈတွႆႇမူၺ်း တီႈသူႇပႃႇ ၾႄႇတႃႇဝိတ်ႉလႄႈ ႁီႇရူဝ်ႊမႃႇသႃႇ ဢူႇရႃႇၵႃႇဝႃႇ (Hiromasa Urakawa) တင်းသွင်ၵေႃႉ တိုၵ်ႉမီးဢႃယု 28 ပီ ၶဝ်ႈၶႅင်ႇတွႆႇမူၺ်းတီႈ Korakuen Hall ဝဵင်းတူဝ်ႇၵဵဝ်ႇ မိူင်းၵျပၼ်ႊ မိူဝ်ႈဝၼ်းတီႈ 02/08/2025 ပူၼ်ႉမႃးၼႆႉ။  

ၽူႈတွႆႇမူၺ်း ၵူဝ်ႇတႃႇရီႇၼႆႉ လႆႈၶႅင်ႇတွႆႇမူၺ်းၸွမ်း ယႃႇမႃႇတူဝ်ႇ ႁႃႇတႃႇ ထိုင်လွပ်ႈ 12 ၊ ဝၢႆးၶၢဝ်း ယၢမ်းတဵမ်ယဝ်ႉဢမ်ႇႁိုင် မၼ်းၸၢႆးလိုမ်းတူဝ်ၵႂႃႇလႄႈ ၽူႈမီးပုၼ်ႈၽွၼ်းၶဝ် ၼႅတ်ႈဢဝ်သူင်ႇၵႂႃႇ ႁူင်းယႃ။ ၵူၺ်းၵႃႈ မၼ်းၸၢႆး လူႉသဵင်ႈၵႂႃႇတီႈႁူင်းယႃ ၼႂ်းဝၼ်းတီႈ 8 ပူၼ်ႉမႃးၼႆႉ။

မိူၼ်ၼႆ ဢူႇရႃႇၵႃႇဝႃႇသမ်ႉ လႆႈၶႅင်ႇတွႆႇမူၺ်းၸွမ်း ယူဝ်ႇၵျီႇ သႃႇဢီႇတူဝ်ႇသေ ထိုင်လွပ်ႈ 8 ၊ မၼ်းၸၢႆးၸဵပ်းႁႅင်းသေ ထိုင်တီႈလႆႈသုမ်းၵၢၼ်ႉၼႂ်းပၢင်ၶႅင်ႇတွႆႇမူၺ်း။ လိူဝ်ၼၼ်ႉ ၽွင်းသူင်ႇယူတ်းယႃတူဝ် တီႈႁူင်းယႃသေ လႆႈလူႉတၢႆၵႂႃႇ ၼႂ်းဝၼ်းတီႈ 9 ၼႆႉ။

တင်းသွင်ၵေႃႉၼႆႉ လႆႈမၢတ်ႇၸဵပ်းတီႈ ဢွၵ်းဢေႃႁၢဝ်ႈႁႅင်းသေ ထိုင်တီႈလူႉတၢႆၵႂႃႇ။ လွင်ႈၽူႈၶႅင်ႇတွႆႇမူၺ်း မၢတ်ႇၸဵပ်းတီႈဢွၵ်းဢေႃ လႆႈၶၢမ်ႇယူတ်းယႃတူဝ်ယဝ်ႉ လူႉတၢႆၵႂႃႇၼႆႉ တီႈမိူင်းၵျပၼ်ႊ ပွၵ်ႈၼႆႉ ပဵၼ်ၵမ်းႁႅၵ်ႈ။ ဢိင်ၼိူဝ်လွင်ႈၼႆႉသေ ၸုမ်းတွႆႇမူၺ်းလုမ်ႈၾႃႉ WBO ၵေႃႈ ပိုၼ်ၽၢဝ်ႇဢွၵ်ႇလွင်ႈမွင်ၸႂ်ၸွမ်း ၽူႈတွႆႇမူၺ်း ၵူၼ်းမိူင်းၵျပၼ်ႊၼႆႉယူႇ – သိုဝ်ႇၶၢဝ်ႇ Mizzima ဢွၵ်ႇဝႆႉၼင်ႇၼႆ။