မီးၵူၼ်းၸုမ်းၼိုင်ႈ တင်ႈၸိုဝ်ႈပဵၼ်ၸုမ်းႁႃၵၢၼ် တေၸွႆႈႁႃၵၢၼ်ပၼ်တီႈမိူင်းၵျပၼ်ႊၼႆသေ လွၵ်ႇလႅၼ်ၵိၼ်ငိုၼ်းတီႈၵူၼ်း ၸိူဝ်းၶႂ်ႈၵႂႃႇႁဵတ်းၵၢၼ် ႁိမ်းၸမ် 800 ၵေႃႉ၊ 1 ၵေႃႉလႂ် 100 သႅၼ်ပျႃး ထိုင် 200 သႅၼ်ပျႃး ဝႃႈၼႆ။

ၸိုဝ်ႈၸုမ်းႁႃၵၢၼ်ပၼ်ၼၼ်ႉပဵၼ် Su Latt Myint Mo Agency လႄႈ Nay Won Gabar Agency။ ၸုမ်းၶဝ်လၢတ်ႈဝႃႈ တေႁႃၵၢၼ်ပၼ် ၼႂ်းႁူင်းၵၢၼ်ႁဵတ်းဢွၵ်ႇၶူဝ်းၵုၼ်ႇ တီႈမိူင်း ၵျပၼ်ႊ၊ တေလုၵ်ႉတီႈ ဝဵင်းတႃႈၶီႈလဵၵ်း ႁပ်ႉသူင်ႇပၼ်ထိုင် မိူင်းၵျပၼ်ႊၼႆသေ လႅၼ်ဢဝ်ငိုၼ်းၵႂႃႇ။

ၼႂ်းဝၼ်းတီႈ 11/12/2025 ၼႆႉ ၵူၼ်းႁဵတ်းၵၢၼ်ႁိမ်းၸမ် 100 ၵေႃႉ ၸိူဝ်းၺႃးလႅၼ်ငိုၼ်းၼၼ်ႉ ဢွၼ်ၵၼ်ၵႂႃႇတိူင်ႇလၢတ်ႈတီႈ ၸုမ်းႁႃၵၢၼ်ပၼ်ၼွၵ်ႈမိူင်း မိူင်းမၢၼ်ႈ (MOEAA)။ ၵူၼ်းၸိူဝ်းၺႃးလႅၼ်ငိုၼ်းသေ ၶမ်ဝႆႉၼႂ်းမိူင်းထႆးၵေႃႈ မီးထႅင်ႈႁိမ်းၸမ် 700 ၵေႃႉ ဝႃႈၼႆ။

ၵူၼ်းဢၼ်ၺႃးလႅၼ်ၵေႃႉၼိုင်ႈလၢတ်ႈဝႃႈ – ၸုမ်းႁႃပၼ်ၵၢၼ်ၼႆႉ ႁွင်ႉဢဝ် ၵူၼ်းၸိူဝ်းတေၵႂႃႇႁဵတ်းၵၢၼ် ၵႂႃႇယူႇသဝ်းဝႆႉတီႈႁွင်ႈၶၢတ်ႈ ၼႂ်းမိူင်းထႆး။ ၸုမ်းၶဝ်လၢတ်ႈဝႃႈ တေလႆႈယူႇပႂ်ႉတီႈႁွင်ႈၶၢတ်ႈၼၼ်ႉၵမ်းၼိုင်ႈၼႆသေ ႁၢႆလၢႆၵႂႃႇပႅတ်ႈ၊ ၵပ်းသိုပ်ႇႁႃၵေႃႈဢမ်ႇလႆႈ။ မၢင်ၸိူဝ်း လႆႈသဵင်ႈၵႃႈယူႇၵႃႈၵိၼ်ႁင်းၵူၺ်း ဢမ်ႇၸၢင်ႈပွၵ်ႈမိူင်းၶိုၼ်းၵေႃႈမီး ဝႃႈၼႆ။

ၵဵဝ်ႇလူၺ်ႈလွင်ႈၼႆႉ ၵူၼ်းၸိူဝ်းၺႃးလွၵ်ႇလႅၼ်ၶဝ် ဢွၼ်ၵၼ်ၵႂႃႇတိူင်ႇလၢတ်ႈတီႈ ႁွင်ႈၵၢၼ်ၽွင်းလူင် ၾၢႆႇၵူၼ်းႁဵတ်းၵၢၼ် တႂ်ႈသိုၵ်းမၢၼ်ႈယူႇသေတႃႉ ဢမ်ႇမီးလွင်ႈလၢၵ်ႇလၢႆးသင် မႃး။

ၸုမ်းႁႃၵၢၼ် Su Latt Myint Mo Agency ၼႆႉ ပဵၼ်ၸုမ်း ဢၼ်တၢင်ႇမၢႆၾၢင်ဝႆႉတီႈ ႁွင်ႈၵၢၼ်ၽွင်းလူင်ၾၢႆႇၵူၼ်းႁဵတ်းၵၢၼ် တႂ်ႈသိုၵ်းမၢၼ်ႈသေ ၺႃးပိၵ်ႉဢိုတ်းပႅတ်ႈ ၼႂ်းပီၼႆႉ။
ၵူၺ်းၵႃႈ ယူႇတီႈၸုမ်း Su Latt Myint Mo Agency ဢမ်ႇၵိုတ်းၵၢၼ်ငၢၼ်းသေ သိုပ်ႇႁႃၵၢၼ်ပၼ်၊ လိူဝ်ၼၼ်ႉ လွၵ်ႇလႅၼ်ၵိၼ်ငိုၼ်းၵူၼ်းႁဵတ်းၵၢၼ်ဝႆႉ တေႃႇထိုင် လိူၼ်ပူၼ်ႉမႃး ၼႆႉ ဝႃႈၼႆ။