ၼႂ်းၶၢဝ်းတၢင်း သိုၵ်းမၢၼ်ႈယိုတ်းဢႃႇၼႃႇၸိုင်ႈမိူင်းမႃး 5 ပီၼႆႉ ၵူၼ်းမိူင်းၸိူဝ်းၺႃးသိုၵ်းမၢၼ်ႈ တီႉၺွပ်းၵုမ်းၶင်ဝႆႉၸိူဝ်းၼၼ်ႉ ဢမ်ႇလႆႈတၢင်းယူတ်းယႃတူၺ်းလူလွင်ႈပၢႆးယူႇလီတဵမ်ထူၼ်ႈလႄႈ ၵူၼ်းတူၵ်းၶွၵ်ႈ ၵၢၼ်မိူင်းလႆႈလူႉတၢႆၵႂႃႇ 150 ပၢႆယဝ်ႉ ဝႃႈၼႆ။
ၸုမ်းၼႅင်ႈသၢၼ် ၵူၼ်းတူၵ်းၶွၵ်ႈ ၵၢၼ်မိူင်း မိူင်းမၢၼ်ႈ (PPNM) ပိုၼ်ၽၢဝ်ႇၵႂႃႇ ၼႂ်းဝၼ်းတီႈ 20 လိူၼ် ၵျူႊလၢႆႊၼႆႉဝႃႈ – တႄႇၸဵမ်မိူဝ်ႈ သိုၵ်းမၢၼ်ႈယိုတ်းဢဝ်ဢႃႇၼႃႇၸိုင်ႈမိူင်းမႃး ၼႂ်းဝၼ်းတီႈ 1 လိူၼ် ၾႅပ်ႊပိဝ်ႊရီႊ 2021 ၼၼ်ႉ ၵူၼ်းတူၵ်းၶွၵ်ႈ ၺႃးပူၼ်ႉ ပႅၼ် သုၼ်ႇလႆႈသုၼ်ႇပဵၼ်ၵူၼ်းႁၢဝ်ႈႁႅင်း။
ၸွမ်းၼင်ႇ ၶေႃႈမုလ်းၸုမ်း PPNM ၶဝ်ၵဵပ်းဝႆႉသေ တႄႇဢဝ်လိူၼ်ၵျူႊလၢႆႊ ပီ 2021 တေႃႇထိုင် လိူၼ် မေႊ ပီ 2026 ၼႆႉ ၵူၼ်းတူၵ်းၶွၵ်ႈၵၢၼ်မိူင်း ၼႂ်းၶွၵ်ႈၶင် 32 တီႈ ဢမ်ႇလႆႈႁပ်ႉလွင်ႈတူၺ်းထိုင် လုမ်းလႃး ပၢႆးယူႇလီတဵမ်ထူၼ်ႈသေ လူႉတၢႆၵႂႃႇ မိူဝ်ႈၽွင်းၺႃးတီႉၺွပ်းၵုမ်းၶင်ၼၼ်ႉ တၢင်းသဵင်ႈမီး 148 ၵေႃႉ ဝႃႈ ၼႆ။
လိူဝ်ၼၼ်ႉ ၵူၼ်းတူၵ်းၶွၵ်းၵၢၼ်မိူင်း ၸိူဝ်းလူႉတၢႆၵႂႃႇ တီႈၼႂ်းလိူၼ်ၵျုၼ်ႊ လႄႈ ၵျူႊလၢႆႊၼႆႉၵေႃႈ မီးထႅင်ႈ။ ၶေႃႈမုလ်းဢၼ်ပိုၼ်ၽၢဝ်ႇဢွၵ်ႇဝႆႉၼႆႉ ပဵၼ်ၸိူဝ်းဢၼ် PPNM လႆႈဝႆႉၵူၺ်းလႄႈ ႁူဝ်ၼပ်ႉ ၵူၼ်းလူႉတၢႆ တီႈၼႂ်းၶွၵ်းၶင် တေၸၢင်ႈတိူဝ်းၼမ်လိူဝ်ၼႆႉ ၼႆယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ