ၼႂ်းသဵၼ်ႈမၢႆ ပပ်ႉၶၢမ်ႈမိူင်း(Passport) ဢၼ်မီးဢေႃးၸႃႇႁႅင်းယႂ်ႇလိူဝ်ပိူၼ်ႈ ၼႂ်းလုမ်ႈၾႃႉ ပီ 2026 ၼႆႉ ပပ်ႉၶၢမ်ႈမိူင်းၼႂ်းၵုၼ်ၶဵဝ်ဢေးသျႃး 3 မိူင်း သိုပ်ႇဢွၼ်ႁူဝ်ၼမ်းၼႃႈဝႆႉ ဝႃႈၼႆ။

လွင်ႈၼႆႉ ၸုမ်း Hanley ၵဵပ်းၶေႃႈမုလ်းသေ ပိုၼ်ၽၢဝ်ႇႁၢႆးငၢၼ်းဝႆႉ ၼႂ်းဝၼ်းတီႈ 13 လိူၼ်ၵျႅၼ်ႊၼိဝ်ႊရီႊ ၼႆႉ။

ပပ်ႉၶၢမ်ႈမိူင်း ၼႂ်းၵုၼ်ၶဵဝ်ဢေးသျႃး ၸိူဝ်းၶဝ်ႈပႃးတီႈၼႂ်းသဵၼ်ႈမၢႆဢွၼ်ႁူဝ်ၼမ်းၼႃႈဝႆႉၼၼ်ႉပဵၼ် မိူင်းသိင်ႊၵပူဝ်ႊ၊ မိူင်းၵျပၼ်ႊ လႄႈ မိူင်းၶူဝ်ႊရီႊယိူဝ်ႊၸၢၼ်း။

လွင်ႈၼႆႉ ဢိင်ၼိူဝ်လွင်ႈတၢင်း ဢၼ်ဝႃႈ ၵူၼ်းမိူင်းၸိူဝ်းယိပ်းဝႆႉပပ်ႉၶၢမ်ႈမိူင်း မိူင်းၼၼ်ႉ ဢမ်ႇလူဝ်ႇ ယွၼ်းဝီႊသႃႊ (Free visa) သေ ၵႂႃႇလႆႈလၢႆမိူင်း/လၢႆပိုၼ်ႉတီႈ ဢမ်ႇၼၼ် မီးသုၼ်ႇယွၼ်းလႆႈ arrival visa သေ ဢွၵ်ႇၶၢဝ်းတၢင်းၵႂႃႇလႆႈလၢႆၸိုင်ႈမိူင်း ၸဵမ်ၸိူဝ်းၼႆႉသေ မၵ်းမၼ်ႈဝႆႉ ၼႆယဝ်ႉ။

ၸွမ်းၼင်ႇသဵၼ်ႈမၢႆ ဢၼ်ၸုမ်း Hanley ၶဝ် ၵဵပ်းဝႆႉသေ ၼႂ်းပိုၼ်ႉတီႈၼႃႈလိၼ်လႄႈ ၸိုင်ႈမိူင်း ၼႂ်း လုမ်ႈၾႃႉ 227 တီႈၼၼ်ႉ ၵူၼ်းမိူင်းၸိူဝ်းယိပ်းဝႆႉပပ်ႉၶၢမ်ႈမိူင်း(passport) မိူင်းသိင်ႊၵပူဝ်ႊၶဝ် ၵႂႃႇမႃးလႆႈ 192 တီႈ လူၺ်ႈငၢႆႈလူမ် ဢမ်ႇမီးပၼ်ႁႃလွင်ႈဝီႊသႃႊ၊ ပပ်ႉၶၢမ်ႈမိူင်း မိူင်းၵျပၼ်ႊ တင်း ၶူဝ်ႊရီႊယိူဝ်ႊၸၢၼ်းသမ်ႉ ပဵၼ်ဝႆႉထီႉသွင် ၵႂႃႇမႃးလႆႈငၢႆႈလူမ် 188 မိူင်း/တီႈ။ 

ပပ်ႉၶၢမ်ႈမိူင်း ၸိူဝ်းၵႂႃႇမႃးလႆႈငၢႆႈလူမ်ထီႉသၢမ်သမ်ႉပဵၼ် ၸိုင်ႈမိူင်းၼႂ်းၵုၼ်ယူႊရူပ်ႇ မိူၼ်ၼင်ႇ မိူင်းတဵင်းမၢတ်ႉၶ်၊ လူႇၸိၼ်ႇပၢၵ်ႉၶ်၊ သပဵၼ်ႊ၊ သုၺ်ႊတိၼ်ႊ လႄႈ သုၺ်ႊၸႃႊလႅၼ်ႊ။ ၵူၼ်းမိူင်း ၸိူဝ်း ယိပ်းဝႆႉ ပပ်ႉၶၢမ်ႈမိူင်းၸိူဝ်းၼႆႉ ၵႂႃႇမႃးလႆႈတီႈ 186 မိူင်းလူၺ်ႈဢမ်ႇလူဝ်ႇဝီႊသႃႊ။

ၾၢႆႇလင်ၸိုင်ႈမိူင်းၸိူဝ်းၼၼ်ႉသမ်ႉ မီးဝႆႉမိူင်းဢေႃႊသတေႊလီႊယိူဝ်ႊ၊ ပႄႊလ်ၵျီႊယမ်ႊ၊ ၾိၼ်ႊလႅၼ်ႊ၊ ၾရင်ႇသဵတ်ႊ၊ ၵျႃႊမၼီႊ၊ ၵရိ၊ ဢၢႆႊယႃႊလႅၼ်ႊ၊ ဢီႇတလီႇ၊ ၼႄႊလ်ထလႅၼ်ႊ လႄႈ မိူင်းၼေႃႊဝုၺ်ႊၸိူဝ်းၼႆႉ ယူႇဝႆႉတီႈမၢႆသီႇ၊ ၵႂႃႇမႃးလႆႈတီႈ 185 မိူင်း လူၺ်ႈဢမ်ႇလူဝ်ႇဝီႊသႃႊ။

ၸုမ်း Hanley ၼႆႉ ပၵ်းလုမ်းဝႆႉတီႈမိူင်းပရဵင်ႊတဵင်ႊ။ ပိူင်လူင်မၼ်း ၸုမ်းၶဝ်ၵဵပ်းဢဝ်ၶေႃႈမုလ်းတီႈ ၾၢႆႇၵၢၼ်ၵပ်းသိုပ်ႇတေႃႇသူင်ႇ သဵၼ်ႈတၢင်းၵၢင်ႁၢဝ်ၵူႈမိူင်းမိူင်းသေ မၵ်းမၼ်ႈပိုၼ်ၽၢဝ်ႇဝႆႉ။

ပပ်ႉၶၢမ်ႈမိူင်း မိူင်းဢမေႊရိၵၼ်ႊ ဢၼ်ယၢမ်ႈႁႅင်းယႂ်ႇလိူဝ်ပိူၼ်ႈသုတ်း ၼႂ်းလုမ်ႈၾႃႉၼၼ်ႉတႄႉ ယၢမ်းလဵဝ်ယူႇဝႆႉတီႈမၢႆ 10 ၊ ဢမ်ႇလူဝ်ႇဝီႊသႃႊသေ ၵႂႃႇမႃးလႆႈတီႈ 179 မိူင်း။

ပပ်ႉၶၢမ်ႈမိူင်း ဢၼ်ဢမ်ႇမီးဢေႃးၸႃႇ ႁႅင်းလဵၵ်ႉလိူဝ်ပိူၼ်ႈသုတ်းသမ်ႉ ပဵၼ်မိူင်း ဢႃႇၾၵၼ်ႊၼိတ်ႉသတၼ်ႊ၊ ဢမ်ႇလူဝ်ႇဝီႊသႃႊသေ ၵႂႃႇမႃးလႆႈ 24 မိူင်းၵူၺ်း။

ပပ်ႉၶၢမ်ႈမိူင်း မိူင်းႁူမ်ႈတုမ်မၢၼ်ႈတႄႉ ယူႇဝႆႉတီႈ မၢႆ 89၊ ဢမ်ႇလူဝ်ႇဝီႊသႃႊသေ ၵႂႃႇလႆႈ 44 မိူင်း ၼႆယဝ်ႉ။