ၸွမ်ၸိုင်ႈမိူင်းၶူဝ်ႊရီႊယိူဝ်ႊၸၢၼ်း တုၵ်းယွၼ်းႁႂ်ႈ ၸွမ်ၸိုင်ႈမိူင်းဢမေႊရိၵၼ်ႊ တေႃႊၼႄႊလ် ထရမ်ႉ ဢွၼ်ႁူဝ်ဢုပ်ႇဢူဝ်းငူပ်ႉငီႉပၼ် တႃႇလူတ်းယွၼ်ႇ လွင်ႈၶဵင်ႈၶႅင်ႇၵၼ်တင်း ၶူဝ်ႊရီႊယိူဝ်ႊႁွင်ႇ ဝႃႈၼႆ။
လွင်ႈၼႆႉ ၸွမ်ၸိုင်ႈမိူင်းၶူဝ်ႊရီႊယိူဝ်ႊၸၢၼ်း လႆႈဢုပ်ႇလၢတ်ႈၵႂႃႇ မိူဝ်ႈၽွင်းသွင်မိူင်း ႁူပ်ႉဢုပ်ႇၵၼ် ၵဵဝ်ႇလူၺ်ႈလွင်ႈမိူင်းၶူဝ်ႊရီႊယိူဝ်ႊႁွင်ႇ တီႈပၢင်ၵုမ်ၺီႇလႃႇၶၢမ်ႇ G7 ဢၼ်ၸတ်း ႁဵတ်း တီႈမိူင်းၾရင်ႇသဵတ်ႈ။
ၸွမ်ၸိုင်ႈမိူင်းၶူဝ်ႊရီႊယိူဝ်ႊၸၢၼ်း လၢတ်ႈဝႃႈ – ပၢင်တိုၵ်းတီႈတႃဝၼ်းဢွၵ်ႇၵၢင် ဢၼ်ဢမေႊရိၵၼ်ႊ ၶဝ်ႈပႃး တိုၵ်းတေႃးၼၼ်ႉ ယဝ်ႉတူဝ်ႈၵႂႃႇယဝ်ႉလႄႈ မုင်ႈမွင်းၶႂ်ႈႁႂ်ႈ ၸွမ်ၸိုင်ႈထရမ်ႉ တိူဝ်းသႂ်ႇၸႂ်ပၼ် ၼႂ်းလွင်ႈမိူင်းၶူဝ်ႊရီႊယိူဝ်ႊႁွင်ႇပႃး ဝႃႈၼႆ။
ၸွမ်ၸိုင်ႈ တေႃႊၼႄႊလ်ထရမ်ႉၵေႃႈ တွပ်ႇလၢတ်ႈပၼ်ၵႂၢမ်းမၼ်ႈဝႆႉဝႃႈ တေဢဝ်ၵႂႃႇဝူၼ်ႉသွၼ်ႇပၼ် ပႃးယူႇ ၼႆယဝ်ႉ။
မိူဝ်ႈၽွင်ႈ တေႃႊၼႄႊထရမ်ႉ ၶိုၼ်ႈႁပ်ႉတၼ်းႁဵင်းပဵၼ်ၸွမ်ၸိုင်ႈ မိူင်းဢမေႊရိၵၼ်ႊ ပွၵ်ႈၵမ်းၼိုင်ႈၼၼ်ႉ မၼ်းၸၢႆးယၢမ်ႈလႆႈႁူပ်ႉထူပ်းၵၼ်တၢင်း ၽူႈဢွၼ်ႁူဝ်မိူင်းၶူဝ်ႊရီႊယိူဝ်ႊ ႁွင်ႇ ၶိမ်ႊၵျူင်ႊဢၼ်ႊ 3 ပွၵ်ႈ။ ၼႂ်းၼၼ်ႉတႃႇ 2 ပွၵ်ႈ လႆႈဢုပ်ႇၵုမ်ၵၼ်ၵႂႃႇတီႈ မိူင်းသိင်ႊၵပူႊ ၵဵဝ်ႇလူၺ်ႈလွင်ႈ ၼိဝ်ႊၶလီႊ ယိူဝ်ႊ။ ထႅင်ႈပွၵ်ႈၼိုင်ႈသမ်ႉ ပဵၼ်ၽွင်းၸွမ်ၸိုင်ႈထရမ်ႉ ႁွတ်ႈၽႅဝ်ၼႂ်းပိုၼ်ႉတီႈ ႁၢမ်းပၢင်တိုၵ်း ၵႄႈ ၵၢင် မိူင်းၶူဝ်ႊရီႊယိူဝ်ႊ သွင်မိူင်း။
ၽွင်းပၢၼ် ၸွမ်ၸိုင်ႈမိူင်းၶူဝ်ႊရီႊယိူဝ်ႊၸၢၼ်းၵေႃႉၵဝ်ႇ Yoon Suk Yeol ၼၼ်ႉ လွင်ႈၵပ်းသိုပ်ႇၵႄႈ ၵၢင် ၶူဝ်ႊရီႊယိူဝ်ႊသွင်မိူင်း မီးလွင်ႈၶဵင်ႈၶႅင်ႁၢဝ်ႈႁႅင်း။ ထိုင်မႃးၼႂ်းပၢၼ်ၸွမ်ၸိုင်ႈ ၵေႃႉမႂ်ႇ Lee Jae-myung ၼႆႉ ၸင်ႇမီးလွင်ႈၶတ်းၸႂ် တႃႇတေလူတ်းယွၼ်ႇလွင်ႈၶဵင်ႈၶႅင် ၵႄႈၵၢင်သွင် ၸိုင်ႈမိူင်း။ ၵူၺ်းၵႃႈ ၾၢႆႇၶူဝ်ႊရီႊယိူဝ်ႊႁွင်ႇတႄႉ ယင်းတိုၵ်ႉမၵ်းမၼ်ႈ ၶူဝ်ႊရီႊ ယိူဝ်ႊၸၢၼ်းပဵၼ်ၽူႈၶဵၼ်ဝႆႉယူႇ ၼႆယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ