ၸွမ်ၸိုင်ႈထရမ်ႉ မိူင်းဢမေႊရိၵၼ်ႊ တွပ်ႇလၢတ်ႈတီႈသိုဝ်ႇၶၢဝ်ႇ Fox News ဝႃႈ ယွၼ်ႉပိူဝ်ႈဢီႊရၼ်ႊ ဢမ်ႇတူၵ်းလူင်းဢၼ်ဢမေႊရိၵၼ်ႊၶႂ်ႈလႆႈလႄႈ တေပိၵ်ႉသဵၼ်ႈတၢင်းၼမ်ႉ ႁေႃႊမူတ်ႉသ်ႁႂ်ႈလႆႈ ဝႃႈၼႆ။
ထရမ်ႉ လၢတ်ႈမိူဝ်ႈဝၼ်းတီႈ 12/04/2026 ဝႃႈ ဢုပ်ႇၵုမ်လွင်ႈၵိုတ်းတိုၵ်းၵၼ်တင်း ဢီႊရၼ်ႊ ဢမ်ႇလႆႈလႄႈ တေပိၵ်ႉသဵၼ်ႈတၢင်းၼမ်ႉႁေႃႊမူတ်ႉသ်။ ၵမ်းၼႆႉတႄႉတေပိၵ်ႉႁိုင်လႄႈ တေႁၼ်ၽွၼ်းယွၼ်ႈမၼ်းယူႇ။ ဢီႊရၼ်ႊ တေၶိုၼ်းမႃးတူၵ်းလူင်းပၼ်ႁဝ်း ဢၼ်ႁဝ်းၶႆႈလႆႈၼၼ်ႉယူႇ။ ”- ဝႃႈၼႆ။
ဝူင်ႈပူၼ်ႉမႃးၼႆႉ ဢီႊရၼ်ႊလႄႈဢမေႊရိၵၼ်ႊ ဢုပ်ႇၵုမ်ၵၼ်လွင်ႈတႃႇၵိုတ်းတိုၵ်းၵၼ်သေ တႃႇပိုတ်ႇပၼ်ၶိုၼ်းသဵၼ်ႈတၢင်းၼမ်ႉႁေႃႊမူတ်ႉသ်။
ဢီႊရၼ်ႊတုၵ်းယွၼ်းၵႂႃႇ 10 ၶေႃႈ။ မိူၼ်ၼင်ႇ- ႁႂ်ႈဢမေႊရိၵၼ်ႊၵိုတ်းလွင်ႈႁဵတ်းသိုၵ်းတေႃႇဢီႊရၼ်ႊ ၵူၺ်းဢၼ်ႇၵႃး ႁႂ်ႈၵိုတ်းတိုၵ်းတေႃႇ ဢီႊရၵ်ႉ၊ လႅပ်ႊပၼုၼ်ႊ၊ ယီႊမိၼ်ႊ ၸိူဝ်းၼႆႉပႃး။ ပေႃးၵိုတ်းတိုၵ်းၸိုင် တေပိုတ်ႇပၼ်သဵၼ်ႈတၢင်းႁေႃႊမူတ်ႉသ်ၶိုၼ်း။ တေပၼ်ႁိူဝ်းတၢင်ႇၼမ်ႉမၼ်းၵႂႃႇမႃးလွတ်ႈလႅဝ်းလႄႈလွတ်ႈၽေး။တေတႅမ်ႈပၵ်းပိူင်မၢႆမီႈမူႇပိူင်သေ တေႁူမ်ႈမိုဝ်းႁဵတ်းၵၢၼ်ၵႂႃႇၸွမ်းၵၼ်။ ႁႂ်ႈဢမေႊရိၵၼ်ႊ ၵိုတ်းယိုတ်းပၼ်ၶိုၼ်းလွင်ႈဢိုတ်းႁၢမ်ႈပၢႆးမၢၵ်ႈမီးဢီႊရၼ်ႊဝႆႉၼၼ်ႉ၊ ဢၼ်ပိုတ်ႇပၼ်ၶိုၼ်းလွင်ႈပၼ်ႇမုၼ်ၵၢၼ်ငိုၼ်းတွင်းဢီႊရၼ်ႊ ၊ ႁႂ်ႈပိုတ်ႇပၼ်ၶိုၼ်းၶူဝ်းၶွင်ၵၢၼ်ၵႃႉၶၢႆ ၶွင်ဢီႊရၼ်ႊ ဢၼ်ဢမေႊရိၵၼ်ႊၵိုတ်းႁႅတ်ႉဝႆႉ၊ ႁႂ်ႈဢမေႊရိၵၼ်ႊသၢႆႈတႅၼ်းပၼ်ၶိုၼ်းၼႂ်းၵၢၼ်ပူၵ်းပွင်ၶိုၼ်းမိူင်းဢီႊရၼ်ႊ ဢၼ်ၺႃးသိုၵ်းဢမေႊရိၵၼ်ႊယိုဝ်းၵွႆဝႆႉၸိူဝ်းၼၼ်ႉ – ၸဵမ်ၸိူဝ်းၼႆႉ။
ၸွမ်ၸိုင်ႈထရမ်ႉတႄႉလၢတ်ႈဝႃႈ – ယွၼ်ႉပိူဝ်ႈဢီႊရၼ်ႊ ဢမ်ႇၶႂ်ႈၵိုတ်းလွင်ႈၼိဝ်ႊၶလီႊယႃႊမၼ်းလႄႈ – ပၢင်ၵုမ်လွင်ႈငမ်းယဵၼ် ဢၼ်ႁဵတ်းတီႈဝဵင်းဢိတ်ႉသ်လႃႊမႃႊပတ်ႉ မိူင်းပႃႊၵိတ်ႉသ်ထၢၼ်ႊ ၸင်ႇဝႃႈဢမ်ႇဢွင်ႇ- ဢီႊရၼ်ႊၼႆႉထုၵ်ႇလီပိုတ်ႇပၼ်ၶိုၼ်း သဵၼ်ႈတၢင်းၼမ်ႉ ႁေႃႊမူတ်ႉသ် လီလီငၢမ်းငၢမ်း ၵူၺ်းၵႃႈမၼ်းဢမ်ႇပိုတ်ႇပၼ်။ ၵွပ်ႈၼႆ ယူႇတီႈဢမေႊရိၵၼ်ႊ တေႁဵတ်းႁႂ်ႈသဵၼ်ႈတၢင်းၼၼ်ႉပိၵ်ႉတႄႉပႅတ်ႈႁေ။ ႁိူဝ်းၸိူဝ်းပၼ်ၶွၼ်ႇတီႈ ဢီႊရၼ်ႊၵေႃႈတေႁၢမ်ႈႁႄႉပႅတ်ႈမူတ်းမူတ်း” – ဝႃႈၼႆ။
ထရမ်ႉ တႄႉလၢတ်ႈဝႃႈ ၵၢၼ်ပိၵ်ႉဢိုတ်းသဵၼ်ႈတၢင်းၼမ်ႉႁေႃႊမူတ်ႉသ် တေတႄႇၼႂ်းဝၼ်းတီႈ 13/04/2026 မိူဝ်ႈၼႆႉ တႄႇၶၢဝ်းယၢမ်း 8 မူင်းၵၢင်ၶမ်ႈၼႆႉ – သိုဝ်ႇၶၢဝ်ႇယႂ်ႇ Reuters တႅမ်ႈတၢင်ႇပိုၼ်ၽႄႈဝႆႉၼင်ႇၼႆ။
Source: Reuters
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ