မိူဝ်ႈၼႆႉ 14/5/2026 ၸွမ်ၸိုင်ႈမိူင်းဢမေႊရိၵၼ်ႊ တေႃႊၼႄႊလ် ထရမ်ႉ တင်း ၸွမ်ၸိုင်ႈမိူင်းၶႄႇ သျီႊၵျိၼ်ႉၽိင်ႊ ႁူပ်ႉဢုပ်ႇဢူဝ်းၵၼ် တီႈႁူင်းႁေႃလူင် Great Hall of the People ဝဵင်းလူင်ပေႊၵျိၼ်ႊ ၼႂ်းမိူင်းၶႄႇ။

ဢုပ်ႇဢူဝ်းၵၼ် လွင်ႈပၼ်ႁႃ ပၢင်တိုၵ်းမိူင်းဢီႊရၼ်ႊ လႄႈ ၵၢၼ်ၵႃႉၶၢႆ တင်းလွင်ႈယုၵ်ႉမုၼ်းၵၢၼ်ၸႂ်ႉတိုဝ်း AI ၸဵမ်ၸိူဝ်းၼႆႉ ဝႃႈၼႆ။

ၸွမ်ၸိုင်ႈမိူင်းၶႄႇ သျီႊၵျိၼ်ႉၽိင်ႊ မွၵ်ႇလၢတ်ႈၶေႃႈၵႂၢမ်းဢွၼ်တၢင်းသုတ်း ၼႂ်းပၢင်ပိုတ်ႇႁပ်ႉတွၼ်ႈ ၸွမ်ၸိုင်ႈ မိူင်းဢမေႊရိၵၼ်ႊ ထရမ်ႉ တင်း ၽူႈမၢၵ်ႈၵူၼ်းမီးလူင် မိူင်းဝၼ်းတူၵ်းၶဝ်ဝႃႈ “ပၢင်ႁူပ်ႉထူပ်း ဢုပ်ႇဢူဝ်း ႁဝ်းပွၵ်ႈၼႆႉ ၵူၼ်းတင်းလုမ်ႈၾႃႉ ပၵ်းတႃပႂ်ႉတူၺ်းၸွမ်းဝႆႉယူႇ။ ယၢမ်းလဵဝ်ၼႆႉ ၵၢၼ်လႅၵ်ႈလၢႆႈ ၼႂ်းလုမ်ႈၾႃႉ ၵိုင်ႉၵၢင်ႉႁဵတ်းႁႂ်ႈႁဝ်း လႆႈႁူႉလႆႈႁၼ် ဢၼ်ႁဝ်းဢမ်ႇယၢမ်ႈႁူပ်ႉမႃးၼၼ်ႉသေ ငဝ်းလၢႆးလုမ်ႈၾႃႉၵေႃႈ ယုင်ႈယၢင်ႈဝႆႉ။ ငဝ်းလၢႆးလုမ်ႈၾႃႉယၢမ်းလဵဝ်ၼႆႉ ထိုင်မႃး သဵၼ်ႈတၢင်းၽႄ တီႈၼိုင်ႈယဝ်ႉ။ မိူင်းၶႄႇ တင်း မိူင်းဢမေႇရိၵၼ်ႊၼႆႉ ၸွင်ႇတေႁူမ်ႈၵၼ်သေ တေႃႇသူႈလွင်ႈယၢပ်ႇၽိုတ်ႇ ငဝ်းလၢႆးၵၢၼ်မိူင်း လုမ်ႈၾႃႉ ဢမ်ႇၼိမ်တဵင်ႈၸိူဝ်းၼႆႉသေ ၸွင်ႇတေႁဵတ်းႁႂ်ႈ ငဝ်းလၢႆးၶၵ်ႉၵၢၼ်လုမ်ႈ ၾႃႉ ၵူႈလွင်ႈလွင်ႈၼိမ်တဵင်ႈ ၵတ်းယဵၼ်ၶိုၼ်းလႆႈၼႆၼၼ်ႉ ပဵၼ်လွင်ႈယႂ်ႇတေႉတေႉ” ဝႃႈၼႆ။

ၼႂ်းပၢင်ဢုပ်ႇဢူဝ်း ၸွမ်ၸိုင်ႈ ဢမေႊရိၵၼ်ႊ လႄႈ မိူင်းၶႄႇ ႁူပ်ႉဢုပ်ႇၵၼ်ၼႆႉ သိုဝ်ႇၶၢဝ်ႇၵႃႊတီႊယၼ်ႊ ပိုၼ်ၽၢဝ်ႇဝႆႉဝႃႈ – ၽူႈၼမ်းတင်းသွင်ၸိုင်ႈမိူင်း တေဢုပ်ႇဢူဝ်းၵၼ်ၵႂႃႇ လွင်ႈပၼ်ႁႃလုမ်ႈၾႃႉ ၊ ၵၢၼ်ၵႃႉၶၢႆ လႄႈ လွင်ႈသၢင်ႈဢေႊဢၢႆႊ (AI) တႃႇၶၢဝ်းတၢင်းမိူင်းၼႃႈ ႁႂ်ႈယဝ်ႉတူဝ်ႈ ၼႂ်းၶၢဝ်းတၢင်း 24 ၸူဝ်ႈမူင်း – ၼႆယဝ်ႉ။

လႆႈႁူႉဝႃႈ တွၼ်ႈၵၢင်ၼႂ် ၸွမ်ၸိုင်ႈတင်းသွင်မိူင်း ႁူပ်ႉဢုပ်ႇၵၼ်ၶေႃၶႃ ၵဵဝ်ႇလွင်ႈ ပၢင်တိုၵ်းၾၢႆႇဝၼ်းဢွၵ်ႇၵၢင်၊ ပၼ်ႁႃ မိူင်းယူႊၶရဵၼ်ႊ လႄႈ လွင်ႈၵုၼ်မိူင်းၵူဝ်ႊလီႊယိူဝ်ႊ ၸဵမ်ၸိူဝ်းၼႆႉသေ ၾၢႆႇႁွင်ႈၵၢၼ်ၽွင်းလူင် ၼွၵ်ႈမိူင်း မိူင်းၶႄႇၵေႃႈ ပိုၼ်ၽၢဝ်ႇဢွၵ်ႇပဵၼ်တၢင်းၵၢၼ်ဝႆႉဝႃႈ ၸွမ်ၸိုင်ႈမိူင်းၶႄႇ လႆႈဢုပ်ႇလၢတ်ႈၸွမ်း ၸွမ်ၸိုင်ႈ ဢမေႊရိၵၼ်ႊဝႃႈ လွင်ႈမိူင်းထၢႆႇဝၼ်ႊၼႆႉ ပဵၼ်လိူင်ႈဢၼ်လမ်ႇလွင်ႈတီႈသုတ်း တႃႇလွင်ႈမိုတ်းၵိုဝ်းၸမ်ၸႂ် မိူင်းၶႄႇ လႄႈ ဢမေႇရိၵၼ်ႊ ၼႆယဝ်ႉ။

ၸွမ်ၸိုင်ႈမိူင်းဢမေႊရိၵၼ်ႊ ထရမ်ႉၼႆႉ ႁွတ်ႈထိုင်ၵႂႃႇတီႈမိူင်းၶႄႇ မိူဝ်ႈဝၼ်းတီႈ 13/5/2026 ယၢမ်းၵၢင်ၶမ်ႈ ၵွၼ်ႇပႆႇထိုင် 8 မူင်းၼၼ်ႉသေ ၵႅမ်ၸွမ်ၸိုင်ႈ မိူင်းၶႄႇ လႄႈ တပ်ႉသိုၵ်းမိူင်းၶႄႇ ၾၢႆႇၼႄၾၢင်ႁၢင်ႈသိုၵ်းၶဝ် ၵႂႃႇပႂ်ႉႁပ်ႉတွၼ်ႈ ဝႃႈၼႆ။

ၼႂ်းၶၢဝ်းတၢင်း ထရမ်ႉ ၵႂႃႇဢုပ်ႇ ၸွမ်ၸိုင်ႈမိူင်းၶႄႇၼႆႉ မၼ်းႁွင်ႉပႃး ဢီႊလွၼ်ႊမၵ်ႉသ် လႄႈ ၽူႈလူင်ႉလႅၼ်ႇၾၢႆႇပၢႆးသၢႆႊ IT တင်း ၸဝ်ႈၵၢၼ်ပၢႆးမၢၵ်ႈမီး လူင် ၼႂ်းမိူင်းဢမေႊရိၵၼ်ႊ လၢႆလၢႆၵေႃႉ ၵႂႃႇၸွမ်း ၼႆယဝ်ႉ။