မိူဝ်ႈၼႆႉဝၼ်းတီႈ 8/6/2026 ယၢမ်းၵၢင်ၼႂ်ၸဝ်ႉ ၽႅၼ်ႇလိၼ်ဝႆတီႈမိူင်းၾိလိပ်ႉပိၼ်းသ် ႁႅင်းသၼ်ႇမီး 7.8 ရိတ်ႉတိူဝ်ႊ ထိုင်တီႈႁိူၼ်းယေးၵူၼ်ႇပင်း ႁွၼ်ၼမ်ႉပၢင်ႇလၢႆႇပုင်ႈသုင်ထိုင်တီႈလူင်ပွင်ၸိုင်ႈပိုၼ်ၽၢဝ်ႇဝႆႉၽေးသိုဝ်ႊၼႃႊမီႊ။

သုၼ်ၽႅၼ်ႇလိၼ်ၼႆႉမီးတီႈၾၢႆႇတူၵ်းဝဵင်း ၵျႅၼ်ႊၼရႄႊ သၼ်ႊတူဝ်ႉသ် မွၵ်ႈ 8 လၵ်း ၼိူဝ်ၵုၼ်မိၼ်ႊတႃႊၼၢဝ်ႊ။ လုၵ်ႉတႂ်ႈလိၼ်မွၵ်ႈ 6 ၵီႊလူဝ်ႊသေသၼ်ႇဝႆ ၶၢဝ်းယၢမ်းၵၢင်ၼႂ် 7 မူင်း 37 မိၼိတ်ႉ။ ႁိူၼ်းယေးၵူၼ်ႇပင်းလူႉၵွႆၼမ်၊ ၵူၼ်းမၢတ်ႇၸဵပ်းလူႉတၢႆတႄႉပႆႇႁၼ်ႁူဝ်ၼပ်ႉတႅတ်ႈတေႃး။ ၶၢဝ်ႇ BBC တႄႉႁၢႆးငၢၼ်းဝႆႉဝႃႈ မီးၵူၼ်းတၢႆ ၵေႃႉၼိုင်ႈၼႆယူႇ။ ၵူၼ်းၸိူဝ်းယူႇႁိမ်းၾင်ႇပၢင်ႇလၢႆႇၵေႃႈ လႆႈဢွၼ်ၵၼ်သုတ်ႉၶၢႆႉၶိုၼ်ႈယူႇတီႈသုင်တႃႇႁႂ်ႈလွတ်ႈၽေး။

ဝၢႆးလင် ၽႅၼ်ႇလိၼ်သၼ်ႇဝႆႁႅင်းႁွပ်ႈႁႅၵ်ႈယဝ်ႉ Aftershocks ဢၼ်ဝႆၸွမ်းတၢင်းလင်ၵေႃႈမႃးဢမ်ႇထၢတ်ႇဢမ်ႇဝၢႆး ။ သၼ်ႇႁႅင်းထိုင် 6.1 ရိတ်ႉတိူဝ်ႊၵေႃႈမီးဝႃႈၼႆ။

ယွၼ်ႉပိူဝ်ႈၽႅၼ်ႇလိၼ်ဝႆတီႈမိူင်းၾိလိပ်ႉပိၼ်ႊသ်ၵမ်းၼႆႉသေ ႁႅင်းသၼ်ႇဝႆ ယွၼ်ႈထိုင်ၾင်ႇပၢင်ႇလၢႆႇ ဢိၼ်ႊတူဝ်ႊၼီႊသျႃႊလႄႈ မလေးသျႃႊ ၊ ႁွၼ်ၼမ်ႉသုင်ထိုင် 3 ပေႇ။ မိူၼ်ၼင်ႇတီႈၵုၼ် ထၢႆႊဝၼ်ႊ ၊ ၵျပၼ်ႊ၊ ၵွမ်ႊ၊ ပႃႊပူႊဝႃႊၼိဝ်ႊၵီႊၼီႊ လႄႈ ၵုၼ်ၼႂ်းသမ်ႇမုၵ်ႉတြႃႇ ပၸိၾိၵ်ႉသ် ၵေႃႈ မီးႁွၼ်ၼမ်ႉသုင်ဢိတ်းဢီႈ။ ၵုၼ်ႁႃႊဝၢႆႊဢီႊ လႄႈ ၾင်ႇၼမ်ႉပၢင်ႇလၢႆႇမိူင်းဢမေႊရိၵၼ်ႊ တႄႉလွတ်ႈၽေးလီယူႇဝႃႈၼႆ။