မိူဝ်ႈၼႆႉဝၼ်းတီႈ 17 လိူၼ်ၵျူႊလၢႆႊ ယၢမ်းၵၢင်ၼႂ် ဢိင်ႇသၼ်ႇ (ၽႅၼ်ႇလိၼ်ဝႆ) ၵႂႃႇ ႁိမ်းဝဵင်းၼွင်ၶဵဝ် လႄႈ တိူင်းမၢၼ်းတလေး၊ သုၼ်ၵၢင်ပဵၼ်ႁိမ်းဝဵင်းၸိၼ်ႉၵူး တၢင်ႉႁႅင်းမီးယူႇ 5.2 လႄႈ 4.1 ယွၼ်ႈထိုင်ပႃး ၸႄႈဝဵင်းၵျွၵ်ႉမႄး၊ ၸႄႈဝဵင်းသီႇပေႃႉ၊ ၸႄႈဝဵင်းလႃႈသဵဝ်ႈ၊ ဝဵင်းၼမ်ႉတူႈ၊ သႅၼ်ဝီ၊ မူႇၸေႊ လႄႈ ၸႄႈဝဵင်းတူၼ်ႈတီး ၸဵမ်ၸိူဝ်းၼႆႉ။
မိူဝ်ႈ 7 မူင်း 56 မိၼိတ်ႉၼၼ်ႉ ၽႅၼ်ႇလိၼ်ဝႆၵႂႃႇ ႁိမ်းဝဵင်းၼွင်ၶဵဝ်ပဵၼ်သုၼ်ၵၢင် တၢင်းလိုၵ်ႉတႂ်ႈလိၼ်မွၵ်ႈ 14 ၵီႊလူဝ်ႊမီႊတိူဝ်ႊသေ ႁႅင်းဢိင်ႇသၼ်ႇ မီးယူႇ 5.2 ရိတ်ႊတႃႊသၵေးလႄႈ လႆႈဝႃႈ ႁႅင်းယူႇတၢၼ်ႇတၢၼ်ႇမၼ်း- ဝႃႈၼႆ။
လိူဝ်ႈၼၼ် ၵၢင်ၼႂ် 8 မူင်းပၢႆ 12 မိၼိတ်ႉၼၼ်ႉသမ်ႉ ၽႅၼ်ႇလိၼ်ဝႆၵႂႃႇ ႁိမ်းဝဵင်းၸိၼ်ႉၵူးပဵၼ်သုၼ်ၵၢင် တၢင်းလိုၵ်ႉတႂ်ႈလိၼ်မွၵ်ႈ 10 ၵီႊလူဝ်ႊမီႊတိူဝ်ႊ ႁႅင်းဢိင်ႇသၼ်ႇမီးယူႇ 4.2 ရိတ်ႊတႃႊသၵေးၼၼ်ႉ ယွၼ်ႈထိုင်ပႃး ၸႄႈဝဵင်းၼႂ်းတိူင်းမၢၼ်းတလေး (ဝဵင်းလိူဝ်ႇ) လႄႈ ၸႄႈဝဵင်းမိူင်းၵုတ်ႈ ၸဵမ်ၸိူဝ်းၼႆႉ – ဝႃႈၼႆ။
မိူင်းႁူမ်ႈတုမ်ၼႆႉ ၺႃးၽႅၼ်ႇလိၼ်ဝႆႁႅင်းၵႂႃႇတေႉတေႉၵူၺ်းဢမ်ႇၵႃး ယွၼ်ႈထိုင်ပႃးမိူင်းထႆးပတ်းပိုၼ်ႉ ၵူၼ်းမိူင်းလႆႈပၢႆႈ ႁူပ်ႉတၢင်းယၢပ်ႇႁၢဝ်ႈႁႅင်း မိူဝ်ႈလိူၼ်မၢတ်ႉသ်ႉ 23 ဝၼ်း သုၼ် ၵၢင်ပဵၼ်တိူင်းၸႄႈၵဵင်း ၼႂ်းဝဵင်းလိူဝ်ႇ။ ႁဵတ်းႁႂ်ႈႁိူၼ်းတိူၵ်ႈယႂ်ႇသုင် လႄႈ ဝတ်ႉဝႃးၽႃသိူဝ်ႇၵူၼ်ႇပင်းလူႉၵွႆၼမ် လုၵ်ႈဢွၼ်ႇ၊ ၵူၼ်းလူင်၊ သင်ႇၶႃႇၸဝ်ႈတင်းၼမ် မၢတ်ႇၸဵပ်းလူႉတၢႆႁၢႆလၢႆ တင်းၼမ်။
ဝၢႆးလင်ၼၼ်ႉမႃး ပေႃးဢိင်ႇသၼ်ႇၼႆ ၵူၼ်းမိူင်းၸိူဝ်းယူႇၼႂ်းပိုၼ်ႉတီႈ ဢွၼ်ၵၼ် ၾၢင်ႉလႄႈ တူင်ႉတိုၼ်ႇၵၼ်တေႉတေႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ