သိုၵ်းၶၢင် KIA/KIO တီႉၵူၼ်းမိူင်းၸိူဝ်းလုၵ်ႉတၢင်းဝဵင်းမၢၼ်ႈမေႃႈ မိူင်းမွၵ်ႇ မၢၼ်ႈၸေႊ ပၢႆႈၽေးသိုၵ်း မႃးယူႇသဝ်း ၼႂ်းဝၢၼ်ႈတႆး 8 ဝၢၼ်ႈ ၸႄႈမိူင်းၶၢင်ၵႂႃႇႁၢပ်ႇၵၢၼ်သိုၵ်း။ သင်ၽူႈ ၵဵဝ်ႇၶွင်ႈၵႂႃႇယွၼ်းထုတ်ႇတူဝ်ၸိုင် ယွၼ်းငိုၼ်းၶႄႇၼိုင်ႈၵေႃႉလႂ် 1000 ထိုင် 10000 ယႂၼ်ႊဝႃႈၼႆ။

ၵူၼ်းမိူင်းၸိူဝ်းၺႃးတီႉၺွပ်းၵႂႃႇၼၼ်ႉ ၵမ်ႈၼမ်ပဵၼ်ၵူၼ်းပၢႆႈၽေးသိုၵ်းတင်းမိူင်းၶၢင် ၶဝ်ႈမႃးပိုင်ႈဢိင်ယူႇၼႂ်းထုင်ႉဝၢၼ်ႈတႆး ၸွမ်းလႅၼ်လိၼ်မိူင်းၶႄႇ-မိူင်းတႆး-မိူင်းၶၢင် တိတ်းၸပ်း ၵၼ်ၼၼ်ႉသေ ယၢမ်းလဵဝ် ၵူၼ်းၼႂ်းပိုၼ်ႉတီႈၸိူဝ်းတေလုၵ်ႉဝဵင်းၼိုင်ႈလႄႈဝၢၼ်ႈၼိုင်ႈ ၵႂႃႇမႃးသူႇၸႂ်းႁႃၵၼ်ၸိုင် ဢမ်ႇမီးလွင်ႈႁူမ်ႇလူမ်ႈ သေဢိတ်းယဝ်ႉ ဝႃႈၼႆ။

ၵူၼ်းမိူင်းပိုၼ်ႉတီႈ ၵေႃႉယူႇဝႆႉၼႂ်းဝၢၼ်ႈၵွင်း လၢတ်ႈတီႈၽူႈတွႆႇႁွၵ်ႈဝႃႈ “သိုၵ်းၶၢင်ၶဝ်ၼႆႉ ယူႇၸွမ်းၵဵတ်ႉလၢၼ်ႇၸွမ်းႁူဝ်ဝၢၼ်ႈႁၢင်ဝၢၼ်ႈ ၸွမ်းႁိမ်းၸမ်ၵျွင်းမုၼ်ၸဝ်ႈ ၸိူဝ်းၼၼ်ႉသေပႂ်ႉၺွပ်း ၵူၼ်းပၢႆႈၽေးသိုၵ်းၸိူဝ်းဢွၵ်ႇပၢင်သဝ်းၵႂႃႇႁႃႁဵတ်းၵၢၼ်ႁႃၵိၼ်လဵင်ႉတွင်ႉ ၵႂႃႇၸဝ်ႉပွၵ်ႈၶမ်ႈ ။ ၵူၼ်းပၢႆႈၽေး ၺႃးၺွပ်းၵႂႃႇ 7 ၵေႃႉယဝ်ႉ။ ၸိူဝ်းၶဝ်ၺႃးဢဝ်ၵႂႃႇၾိုၵ်းၵၢၼ်သိုၵ်းတီႈဝၢၼ်ႈ ၶႃလႃပုမ် ၼႆၼၼ်ႉ ။” – ဝႃႈၼႆ။

ဢၼ်သိုၵ်းၶၢင်မႃးၺွပ်းၵူၼ်းပၢႆႈၽေးသိုၵ်းၼႆႉ ဢမ်ႇမီးဝႃႈ လၢႆလိူၼ်ၼိုင်ႈပွၵ်ႈ ။ ၵူၺ်းၵႃႈ ၶႂ်ႈၶဝ်ႈၺွပ်းမိူဝ်ႈလႂ်ၵေႃႈ ၶဝ်ႈၺွပ်းၸိူင်ႉၼၼ်ၵူၺ်းလႄႈၵူၼ်းပိုၼ်ႉတီႈဢမ်ႇမီးလွင်ႈႁူမ်ႇ လူမ်ႈဝႃႈၼႆ။

“မၢင်ပွၵ်ႈ ႁိုင် 2 လိူၼ်ၵူၺ်းၺွပ်းၼိုင်ႈပွၵ်ႈ။ မိူဝ်ႈတႄႇမၼ်းၶဝ်ၺွပ်းဢဝ်ၵႂႃႇဝႆႉတီႈ တပ်ႉ မၢႆ 3 တီႈဝၢၼ်ႈဢုင်လူင် (မဂျာယန်)ၼၼ်ႉ။ တီႈၼၼ်ႉ မၼ်းၸမ်ဝၢၼ်ႈၵူၼ်းလႄႈ ပီႈၼွင်ႉ ၸိူဝ်ႉၶိူဝ်းပေႃႈမႄႈၵူၼ်းၸိူဝ်းၺႃးတီႉၼၼ်ႉသမ်ႉ ဢွၼ်ၵၼ်ၵႂႃႇယွၼ်းႁူပ်ႉၽူႈယႂ်ႇၵူၼ်းလူင်ၶဝ်ႁႄ ၵႂႃႇယွၼ်းတွင်းပၢၼ်ႇၸိူဝ်းၼႆႉယူႇ။ ၶဝ်ဢမ်ႇပၼ်ႁူပ်ႉႁႄ သမ်ႉၶိုၼ်းၶၢႆႉဢဝ် ၵူၼ်းၸိူဝ်းၼႆႉၵႂႃႇဝႆႉတီႈ ပၢင်ႇသွၼ်ၵၢၼ်သိုၵ်းၶဝ်တၢင်း ဝၢၼ်ႈၶႃလႃပုမ် ဢၼ်မီးၼႂ်းၵႄႈၵၢင် တပ်ႉမႁႃႇ 3 လႄႈ တပ်ႉငဝ်ႈလူင်ၶဝ်လၢႆႇၸႃႇၼၼ်ႉ ။ ” ဝႃႈၼႆ။

လႆႈႁူႉဝႃႈ ၵူၼ်းပၢႆႈၽေးသိုၵ်း ၸိူဝ်းၺႃးတီႉဢဝ်ၵႂႃႇၾိုၵ်းၵၢၼ်သိုၵ်းၼၼ်ႉပဵၼ် ၼၢင်းဢိမျၢတ်ႈၸူႉဢွင်ႇ ၊ ၶုၼ်ႇရႃႇၸႃႇ၊ မွင်ႇၵျေႃႇလုၼ်ႇ၊ မွင်ႇငူၺ်ႇလိၼ်း၊ ဢူးၼၢႆႇဝိၼ်း ၸႄႈဝဵင်း မိူင်းမွၵ်ႇ ၊ မွင်ႇမိၼ်းလၢတ်ႉ ဝဵင်းမၢၼ်ႈမေႃႈ လႄႈ ၸၢႆးလၢဝ်ၶိူဝ်း ယူႇဝဵင်းၵျွၵ်ႉမႄး ၵႂႃႇယူႇၸွမ်းတီႈပီႈၼၢင်း ၸူဝ်ႈၶၢဝ်းမၢၼ်ႈၸေႊ ၸႄႈမိူင်းၶၢင် ၼႆယဝ်ႉ။

ၵူၼ်းမိူင်းပိုၼ်ႉတီႈၵေႃႉယူႇဝႆႉ ၼႂ်းထုင်ႉမိူင်းၶၢင်လၢတ်ႈတီႈၽူႈတွႆႇႁွၵ်ႈဝႃႈ “ၵူၼ်းၸိူဝ်းၺႃးၺွပ်းၵႂႃႇၼၼ်ႉ လႆႈၵႂႃႇ ၶိုၼ်ႈပၢင်ၾိုၵ်းၵၢၼ်သိုၵ်းမွၵ်ႈ 2 လိူၼ်ၼႆႉ ဢေႇသုတ်းယဝ်ႉႁႄ ၺႃးသူင်ႇၵႂႃႇပၢင်တိုၵ်းၵမ်းလဵဝ်ဢေႃႈ။ ၼမ်ႉၵတ်ႉ ၵၢၼ်တိုၵ်းသိုၵ်းၶဝ်တမ်ႉဢမ်ႇတဵမ်ထူၼ်ႈ။ ၵွပ်ႈၼၼ်ပေႃႈမႄႈပီႈၼွင်ႉၸိူဝ်ႉၶိူဝ်းၶဝ်မႆႈၸႂ်ႁႄ ၵႂႃႇထူပ်း ၽူႈယႂ်ႇ ၵူၼ်းလူင်ၼႂ်းတပ်ႉ ၶဝ် ယွၼ်းႁွင်ႉဢွၵ်ႇမႃးၶိုၼ်းၼႆ။ ၵူၼ်းလူင်ၶဝ်သမ်ႉ ဢမ်ႇၶႂ်ႈပၼ်ဢဝ်ဢွၵ်ႇလႄႈ ၸႂ်ႉၵႂႃႇယွၼ်း ဝႂ်ၵမ်ႉတီႈၼိုင်ႈယဝ်ႉတီႈၼိုင်ႈ။ ႁႃမႃးပၼ်ၶဝ်လႆႈယဝ်ႉႁႄ ၵႂႃႇတၢင်ႇၼႆ သမ်ႉၶိုၼ်းဝႃႈ လွင်ႈၼႆႉ ဢမ်ႇၵဵဝ်ႇသင်တင်းႁွင်ႈ ၵၢၼ်ၶဝ်ၼႆႁႄ ၸၼ်ၶၢဝ်းယၢမ်းယူႇတိၵ်းတိၵ်း။ လိုၼ်းသုတ်းၵေႃႈ သဵင်ႈငိုၼ်းလၢႆလၢႆ ၵူၼ်း ၸိူဝ်းၺႃးတီႉၺွပ်းၵႂႃႇၼၼ်ႉ ဢမ်ႇလွတ်ႈမႃးၶိုၼ်းသေပွၵ်ႈ။ လွင်ႈၸိူင်ႉၼႆ တၢင်းဝၢၼ်ႈၵွင်း ထုင်ႉမိူင်းၶၢင်ၼႆႉ ၼမ်မႃး တိၵ်းတိၵ်းယဝ်ႉဢေႃႈ” ဝႃႈၼႆ။

လိူဝ်ၼၼ်ႉ ၵူၼ်းမိူင်းၸိူဝ်းယူႇၼႂ်းပိုၼ်ႉတီႈၸႄႈမိူင်းၶၢင် လႆႈသႂၢင်းၶွၼ်ႇႁူဝ်လိူၼ်ႁူဝ်ပီပၼ်ၸုမ်းသိုၵ်းၶၢင် KIO/KIA ၵူၺ်းဢမ်ႇၵႃး လႆႈသူင်ႇၶဝ်ႈသၢၼ်ၼမ်ႉမီႇၼမ်ႉမၼ်း ပႃးၸဵမ် ၶဝ်ႈၽၵ်းသုၵ်းၸိူဝ်းၼႆႉပၼ်တႃႇ ၼႂ်းပိုၼ်ႉတီပၢင်တိုၵ်း။ ယၢမ်းလဵဝ် (လိူၼ်ဢေႃးၵၢတ်ႉသ် ပီ 2026) ၼႆႉ ၵၢၼ်တီႉၺွပ်းဢဝ်ၵူၼ်းမိူင်း ၵႂႃႇႁဵတ်းသိုၵ်းၶိူဝ်းယႂ်းမႃးလိူဝ်ၵဝ်ႇတေႉတေႉလႄႈ ႁဵတ်းႁႂ်ႈၵူၼ်းမိူင်းၸိူဝ်းပၢႆႈၽေးသိုၵ်းသေ ၵႂႃႇႁဵတ်းၵၢၼ်ႁႃၸဝ်ႉၵိၼ်ၶမ်ႈ ဝၼ်းလႂ်ဝၼ်းၼၼ်ႉ ယၢပ်ႇၽိုတ်ႇ ၵိၼ်းၸႂ်ႁႅင်းဝႆႉ – ဝႃႈၼႆ။