မိူဝ်ႈဝၼ်းတီႈ 16 လိူၼ်ၵျုၼ်ႊ ၽႅၼ်ႇလိၼ်ဝႆ တီႈမိူင်းၶႄႇ တၢင်ႉႁႅင်း 6.3 မႅၵ်ႊၼီႊၵျုတ်ႉ တင်း မိူင်းဢိၼ်ႊတူဝ်ႊၼီႊသျႃႊ တၢင်းႁႅင်း 6.7 မႅၵ်ႊၼီႊၵျုတ်ႉ မီးၵူၼ်းလူႉတၢႆၸွမ်း 1 ၵေႃႉ၊ မၢတ်ႇၸဵပ်းၵႂႃႇ 8 ၵေႃႉ ၼႆယဝ်ႉ။

ၽႅၼ်ႇလိၼ်ဝႆ (ဢိင်ႇသၼ်ႇ) တီႈမိူင်းၶႄႇ ပွၵ်ႈၼႆႉ ပဵၼ်ၵႂႃႇတၢင်းၸဵင်ႇႁွင်ႇဝၼ်းဢွၵ်ႇမိူင်းၶႄႇ တၢင်းလိုၵ်ႉလူင်းတႂ်ႈလိၼ် 10 ၵီႊလူဝ်ႊမီႊတိူဝ်ႊလႄႈ ႁဵတ်းႁႂ်ႈမီးလွင်ႈတုမ်ႉယွၼ်ႈထိုင် ၾၢႆႇၼိူဝ်ၼင်ႇလိၼ်ႁၢဝ်ႈႁႅင်းသေ ၵူၼ်းလူႉတၢႆ 1 ၵေႃႉ မၢတ်ႇၸဵပ်းၵႂႃႇ 8 ၵေႃႉ ဝႃႈၼႆ။

လႆႈႁူႉဝႃႈ ၵူၼ်းမၢတ်ႇၸဵပ်းၵႂႃႇယွၼ်ႉၽႅၼ်ႇလိၼ်ဝႆၼႆႉ ၾၢႆႇၸဝ်ႈၼႃႈတီႈၽူႈမီးပုၼ်ႈၽွၼ်းၶဝ် လႆႈဢဝ်ၵႂႃႇသူင်ႇယူတ်းယႃတူဝ်ဝႆႉတီႈႁူင်းယႃ ၵမ်ႈၼမ်တႄႉမၢတ်ႇၸဵပ်းၵႂႃႇၽိဝ်မၼ်း ၵူၺ်းလႄႈ ဢမ်ႇပေႃးလႆႈမႆႈၸႂ်ႁႅင်း။ ၾၢႆႇၼိုင်ႈၵေႃႈ လႆႈႁွင်ႉဢဝ် လုၵ်ႈႁဵၼ်း တင်း ၶႅၵ်ႇမိူင်းၼွၵ်ႈမိူင်း ၸိူဝ်းၶဝ်ႈၵႂႃႇတွင်ႈတဵဝ်းဝႆႉ ၼႂ်းပိုၼ်ႉတီႈ ယူႇသဝ်းဝႆႉဢွင်ႈတီႈလွတ်ႈၽေးယဝ်ႉလီငၢမ်း ဝႃႈၼႆ။

ၼႂ်းဝၼ်းလဵဝ်ၵၼ်ၵူၺ်းၼင်ႇၵဝ်ႇ တီႈမိူင်းဢိၼ်ႊတူဝ်ႊၼီႊသျႃႊၵေႃႈ ၽႅၼ်ႇလိၼ်ဝႆ (ဢိင်ႇသၼ်ႇ) ၵႂႃႇ တၢင်းႁႅင်း 6.7 မႅၵ်ႊၼီႊၵျုတ်ႉ တၢင်းႁိုင် မွၵ်ႈ 1 မိၼိတ်ႉၸိူဝ်းၼႆႉသေ ဝၢႆး ၼၼ်ႉဢိင်ႇသၼ်ႇယွၼ်ႉလင်ထႅင်ႈ ႁႅင်းဢမ်ႇပေႃးယႂ်ႇ လၢႆလၢႆၵမ်း ႁဵတ်းႁႂ်ႈၵူၼ်းမိူင်း ဢွၼ်ၵၼ်တိုၼ်ႇသၢၼ်ႈ တူၵ်းၸႂ်ၸွမ်း ၼႆယဝ်ႉ။

ၸဝ်ႈၼႃႈတီႈၽူႈမီးပုၼ်ႈၽွၼ်း ၸိူဝ်းၵႂႃႇၸွႆႈထႅမ် လႄႈ ၵူတ်ႇထတ်းၼႂ်းပိုၼ်ႉတီႈၼၼ်ႉ ပိုၼ်ၽၢဝ်ႇလၢတ်ႈဝႃႈ – မီးလွင်ႈလူႉသုမ်း ႁိူၼ်းတိုၵ်းၵူၼ်ႇပင်းၵႂႃႇယူႇၵမ်ႈၽွင်ႈသေတႃႉ သဵၼ်ႈမၢႆၵူၼ်းမၢတ်ႇၸဵပ်းလူႉတၢႆတႄႉ ပႆႇႁူႉလႆႈတႅတ်ႈတေႃး ၼႆယဝ်ႉ။

မိူင်းဢိၼ်ႊတူဝ်ႊၼီႊသျႃႊၼႆႉ မီးၸမ်ပိုၼ်ႉတီႈဝူင်းၾႆး ပၸိၾဵၵ်ႉသ်လႄႈ ၵႆႉလႆႈထူပ်းၺႃး ၽေးၽႅၼ်ႇလိၼ်ဝႆ၊ လွႆၾႆးတႅၵ်ႇ။ မိူဝ်ႈပီ 2018 ပူၼ်ႉမႃးၼၼ်ႉ ၽႅၼ်ႇလိၼ်ဝႆၵႂႃႇ ႁိမ်း ၾင်ႇပၢင်ႇလၢႆႇ။ တၢင်ႉႁႅင်းမီး 7.5 မႅၵ်ႊၼီႊၵျုတ်ႉ၊ မိူဝ်ႈၼၼ်ႉ လႆႈႁူပ်ႉပႃးၽေးသူႊၼႃႊမီႊလႄႈ မီးၵူၼ်းလူႉတၢႆၵႂႃႇ 2200 ၵေႃႉပၢႆ ဝႃႈၼႆ။

မိူၼ်ၼႆၼင်ႇၵဝ်ႇ မိူဝ်ႈဝူင်ႈပူၼ်ႉမႃးၼႆႉၵူၺ်း ၽႅၼ်ႇလိၼ်ဝႆ တၢင်းႁႅင်း 7.8 မႅၵ်ႊၼီႊၵျုတ်ႉ တီႈမိူင်းၾလိပ်ႉပိၼ်း။ ႁိူၼ်းတိုၵ်းယႂ်ႇလူင် ၵူၼ်ႇပင်းလူႉၵွႆတင်းၼမ်၊ တေႃႇထိုင်ယၢမ်းလဵဝ် မီးၵူၼ်းလူႉတၢႆ 68 ၵေႃႉ၊ ႁၢႆလၢႆဝႆႉ 33 ၵေႃႉ ၼႆယဝ်ႉ။