ႁူဝ်လိူၼ်ဢေႃးၵၢတ်ႉသ်ၼႆႉ ၾူၼ်တူၵ်းႁႅင်း ႁဵတ်းႁႂ်ႈၵႄးၼမ်ႉပွင်ႈ ၼွင်းထူမ်ႈ တူင်ႈၼႃး သဵၼ်ႈတၢင်း လႄႈ ၼမ်ႉၶဝ်ႈထိုင်ပႃး ၸွမ်းႁိူၼ်းယေးၵူၼ်းမိူင်း ၸိူဝ်းယူႇၼႂ်းထုင်ႉၼမ်ႉပွင်ႈ ၸႄႈဝဵင်းလႃႈသဵဝ်ႈ မိူင်းတႆးပွတ်းႁွင်ႇ ၼႆယဝ်ႉ။

တႄႇမိူဝ်ႈဝၼ်းတီႈ 3/8/2026 ယၢမ်းၵၢင်ၶမ်ႈ တေႃႇထိုင် မိူဝ်ႈၼႆႉ ဝၼ်းတီႈ 4/8/2026 ယၢမ်းၵၢင်ၼႂ် ၾူၼ်တူၵ်းႁႅင်း ၼႂ်းထုင်ႉၼမ်ႉပွင်ႈသေ ၵႄးၼမ်ႉပွင်ႈ ၵိုင်ႉၵၢင်ႉၼွင်းၼမ်ၶိုၼ်ႈမႃးႁႅင်း ႁၢႆႉၸႃႉလိူဝ်ၵူႈပီပူၼ်ႉမႃး ၼႆယဝ်ႉ။

ၵူၼ်းမိူင်းပိုၼ်ႉတီႈ ၵေႃႉယူႇဝႆႉၼႂ်းထုင်ႉၼမ်ႉပွင်ႈၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ “ၼမ်ႉႁူၺ်ႈၼမ်ႉလွႆ လေႃႇလူင်းမႃးသႂ်ႇၼႂ်းၼမ်ႉႁူးတွင်းႁႄ ဢဝ်ၼွင်းၶိုၼ်ႈလူၼ်ႉၾင်ႇ ထူမ်ႈပႃးတူင်ႈၼႃး လႄႈ ႁိူၼ်းၵူၼ်း၊ ၸွမ်းသဵၼ်ႈတၢင်းၸိူဝ်းၼႆႉႁႅင်းတေႉတေႉ။ မိူဝ်ႈလဵဝ် ၾူၼ်ၵေႃႈတိုၵ်ႉတူၵ်းယူႇဢမ်ႇပႆႇထၢတ်ႇ။ ၼမ်ႉၼႆႉ ထူမ်ႈပႃးသဵၼ်ႈတၢင်းလူင် ဢၼ်တေလုၵ်ႉ ၼမ်ႉပွင်ႈၵႂႃႇတၢင်းလႃႈသဵဝ်ႈ ၸွမ်းႁိမ်းပၢႆႉတၢင်းၶဝ်ႈဝဵင်းၼမ်ႉပွင်ႈ ၼၼ်ႉ။ ဢၼ်ၺႃးၼမ်ႉထူမ်ႈႁႅင်းၼႆႉ ပဵၼ်ပွၵ်ႉ (1) ၊ ပွၵ်ႉ (3) ၼႆႉဢေႃႈ။ ပွၵ်ႉ (5) တႄႉ တၢင်းၼမ်ႉႁူးတွင်းၼၼ်ႉ ၵူၺ်း ၺႃးၼမ်” ဝႃႈၼႆ။

ယွၼ်ႉၸုမ်းယိပ်းၵွင်ႈၵၢင်ႇ ဢဝ်ၶိူင်ႈၸၢၵ်ႈလူင် ၶဝ်ႈၵႂႃႇၶုတ်းဢဝ်ၶမ်း ၸွမ်းသၢပ်ႇၵႄးၼမ်ႉလႄႈ ႁဵတ်းႁႂ်ႈၶီႈလိၼ် ၶူၺ်လိၼ် ငႆႈဢၼ်ဢွၵ်ႇမႃးၼႂ်းၵၢၼ်ထွင်ၶမ်းၼၼ်ႉ လႆၶဝ်ႈၵႂႃႇယိုင်ႈဝႆႉၼႂ်းၵႄးၼမ်ႉသေ ၾူၼ်တူၵ်းၼိုင်ႈဢိတ်းၵူၺ်းၵေႃႈ ၼမ်ႉၼွင်းလူၼ်ႉၾင်ႇငၢႆႈလိူဝ်ၵဝ်ႇၼႆ -ၵူၼ်းမိူင်းပိုၼ်ႉတီႈ သိုပ်ႇလၢတ်ႈၼင်ႇၼႆ။

“ၼမ်ႉပွင်ႈႁဝ်းၼႆႉ ၼမ်ႉဢမ်ႇၼွင်းႁႅင်းၸိူင်ႉၼႆႁိုင်ၼႃႇယဝ်ႉဢေႃႈ။ ဢၼ်ႁၢႆႉၸႃႉသုတ်းၼႆႉ ပဵၼ်မိူဝ်ႈ 10 ပီပူၼ်ႉမႃးၼၼ်ႉၵူၺ်း ယၢမ်ႈၼွင်းယူႇပွၵ်ႈၼိုင်ႈ။ မိူဝ်ႈလဵဝ်ၼႆႉ ပိူၼ်ႈမႃး ၶုတ်းၶမ်းႁႄ ငႆႈ ၶူၺ်လိၼ်ၸိူဝ်းၼၼ်ႉၵႂႃႇၵွင်ယူႇၼႂ်းၵႄႈၼမ်ႉလႄႈ ဢဝ်ၼမ်ႉၼွင်းၶိုၼ်ႈထိုင်ၸွမ်းတၢင်း။ ဢၼ်ၶုတ်းၶမ်းၼႆႉ ၶႄႇၵေႃႈၶုတ်း၊ တႆးၵေႃႈ ၶုတ်းယဝ်ႉ။ ဢဝ်ၸၢၵ်ႈႁႄမႃးၶုတ်းၵွၼ်ႇဢေႃႈ။ မၢင်ပီၵေႃႈၼွင်းယူႇမၼ်းဢမ်ႇၼွင်းၶိုၼ်ႈတီႈၽႅဝ်မႃးၼႂ်းႁိူၼ်းၸိူင်ႉၼႆ။ မိူဝ်ႈလဵဝ်ၼႆႉ ပၢႆသလိူဝ်ပဵၼ်ၶၢဝ်းသွမ်ႈၼႃး။ ၼႃးၵေႃႈထူမ်ႈ ႁိူၼ်းၵေႃႈထူမ်ႈ။ ဢၼ်ၶုတ်း ဢဝ်ၶမ်းၼႆႉ ပဵၼ်ၵူႈၸုမ်းယဝ်ႉ။ ႁူဝ်ႁိူၼ်းၵေႃႈပႃး၊ ၸုမ်းယိပ်းၵွင်ႈၵၢင်ႇၵေႃႈပႃး။ ၸမ်တီႈၽႂ်ၵေႃႈသၢင်းဢၶွၼ်ႇပၼ်မၼ်း။ ၸမ်တႆးၵေႃႈ သၢင်းပၼ်တီႈတႆး၊ ၸမ်ၶႄႇသၢင်းၶႄႇ၊ ၸမ်ဝႃႉ သၢင်းဝႃႉ” ဝႃႈၼႆ။

လႆႈႁူႉဝႃႈ ၵူၼ်းၸိူဝ်းၵႂႃႇၶုတ်းဢဝ်ၶမ်းၼႂ်းထုင်ႉၼမ်ႉပွင်ႈၼႆႉ ဢမ်ႇၵွမ်ႉၵႃး ၸုမ်းယိပ်းၵွင်ႈၵၢင်ႇၵူၺ်း ၵူၼ်းႁိူၼ်း ၸိူဝ်းမီးငိုၼ်းၼမ်ၶဝ်ၵေႃႈ ဢွၼ်ၵၼ်ၵႂႃႇၶုတ်းဢဝ်ၶမ်းၼမ်ၶိုၼ်ႈမႃး ႁႅင်းတေႉတေႉလႄႈ ႁဵတ်းႁႂ်ႈ ၾိင်ႈၾႃႉသၽႃႇဝလူႉၵွႆၵႂႃႇ- ၼႆ ၵူၼ်းမိူင်းပိုၼ်ႉတီႈလၢတ်ႈ။

ယၢမ်းလဵဝ် ထုင်ႉၼမ်ႉပွင်ႈၼႆႉ ၸုမ်းသိုၵ်းၶႄႇၵဝ်ႈၵၢင်ႉ (MNDAA) ၵုမ်းၵမ်ပၼ်ႇၵၢၼ်ၽွင်းငမ်းဝႆႉ ပဵၼ် တၢင်းၵၢၼ်ၼႆသေတႃႉ ၼႂ်းပိုၼ်ႉတီႈၼၼ်ႉ မီးပႃး ၸုမ်းသိုၵ်းတႆး (SSPP/SSA) လႄႈ ၸုမ်းသိုၵ်းဝႃႉ (UWSA) တူင်ႉၼိုင်ၵႂႃႇမႃးယူႇဝႆႉၸွမ်း ၼႆယဝ်ႉ။