သဵၼ်ႈတၢင်းလူင် ၵႄႈၵၢင် ၵဵင်းတုင် – မိူင်းၽျၢၵ်ႈ လႄႈ မိူင်းပဵင်း ၸိူဝ်းပဵၼ်တၢင်းၵူတ်ႉငွၵ်း ၸွမ်းသၼ်လွႆ ၼႂ်းမိူင်းတႆးပွတ်းဢွၵ်ႇၼႆႉ ၸဝ်ႈၼႃႈတီႈၶဝ် မႄးသဵၼ်ႈတၢင်းပႆႇယဝ်ႉတူဝ်ႈလႄႈ ပေႃးၾူၼ်တူၵ်းၸိုင် ႁဵတ်းႁႂ်ႈရူတ်ႉၵႃးၵႂႃႇမႃး ယၢပ်ႇၽိုတ်ႇလိူဝ်ၸႂ်ႁႅင်း ၼႆယဝ်ႉ။

ၵူၼ်းႁေႃႈရူတ်ႉၵႃးတၢင်ႇၶူဝ်းၵုၼ်ႇ လုၵ်ႉမိူင်းတႆးပွတ်းဢွၵ်ႇၵႂႃႇတၢင်းမိူင်းတႆးပွတ်းၸၢၼ်း လၢတ်ႈၼႄတီႈၽူႈတွႆႇႁွၵ်ႈဝႃႈ “ပေႃးၾူၼ်တူၵ်းၼႆ ၵႃးၸိူဝ်းတႆႇၼိူဝ်သဵၼ်ႈတၢင်းၼၼ်ႉ လႆႈၾၢင်ႉႁႄ ႁေႃႈတေႉတေႉ။ ပေႃးပဵၼ် ၵႃးလူင် သႅၼ်း မၢၵ်ႇ 12 လေႃႉ တၢင်ႇၵုၼ်ႇၸိူဝ်းၼၼ်ႉ ယိုင်ႈၶႅၼ်းၵႂႃႇယၢပ်ႇယဝ်ႉ။ ၶဝ်မႄးသဵၼ်ႈတၢင်းဝႆႉလႄႈ ၾူၼ်တူၵ်းဢိတ်းၼိုင်ႈ ၵူၺ်းၵေႃႈ တၢင်းမိုၼ်ႈယဝ်ႉ။ ပေႃးပဵၼ်ၶၢဝ်းၾူၼ်တေႉတေႉ ယိုင်ႈၶႅၼ်းတေၵႂႃႇမႃးယၢပ်ႇႁႅင်းယဝ်ႉ။ သဵၼ်ႈတၢင်းၵေႃႈ ၶဝ်မႄးတိုၵ်ႉယဝ်ႉ ပဵၼ်ပွတ်းပဵၼ်တွၼ်ႈၵူၺ်း” ဝႃႈၼႆ။

ပေႃးထိုင်မႃးၶၢဝ်းၾူၼ်ၸိုင် ၼိူဝ်သဵၼ်ႈတၢင်းလူင် ၵဵင်းတုင် – မိူင်းၽျၢၵ်ႈ- မိူင်းပဵင်း တၢင်းမိူင်းတႆးပွတ်းဢွၵ်ႇၼႆႉ ၵႆႉပဵၼ်လိၼ်ၵူၼ်ႇတူၵ်းလွႆသေ သဵၼ်ႈတၢင်းဢိုတ်း၊ သဵၼ်ႈတၢင်း မိုၼ်ႈသေ ရူတ်ႉၵႃးပိၼ်ႈ ပဵၼ်ၽေးၵိုင်ႉၵၢင်ႉ ၸိူဝ်းၼႆႉ။

ယွၼ်ႉသဵၼ်ႈတၢင်းၵႂႃႇမႃး တၢင်းမိူင်းတႆးပွတ်းဢွၵ်ႇ ယၢပ်ႇၽိုတ်ႇႁႅင်းလႄႈ ႁဵတ်းႁႂ်ႈၸဝ်ႈရူတ်ႉၵႃး လႄႈ ၵူၼ်းဢွၵ်ႇၶၢဝ်းတၢင်းၶဝ် ၸိူင်ႉၶၢဝ်းယၢမ်းႁိုင်။ ၵွပ်ႈၼၼ် ပေႃးလုၵ်ႉတၢင်း မိူင်းတႆးပွတ်းဢွၵ်ႇ ၵႂႃႇတၢင်း မိူင်းတႆးပွတ်းၸၢၼ်းၸိုင် ၸဝ်ႈရူတ်ႉၵႃးၶဝ် လႆႈဝႄႉၼွၼ်းလိုဝ်ႈတီႈ ဝဵင်းၵႃလိ လႄႈ ဝၢၼ်ႈပၢင်ၵိဝ်ႇ တင်း ဝၢၼ်ႈၼွင်ၶဵဝ် ၸႄႈဝဵင်းၵဵင်းတုင်ယဝ်ႉ ၸင်ႇသိုပ်ႇၶၢဝ်းတၢင်းလႆႈ ဝႃႈၼႆ။

လႆႈႁူႉဝႃႈ ဢၼ်ႁဵတ်းႁႂ်ႈသဵၼ်ႈတၢင်းလူႉၵွႆႁႅင်းၼႆႉ ပဵၼ်ၵႃးလူင် သႅၼ်းမၢၵ်ႇ 12 လေႃႉ တေႃႉတၢင်ႇ ထၢၼ်ႇႁိၼ် ၊ ၵုၼ်ႇႁႅင်ႈၵူႈသႅၼ်းသႅၼ်း လႄႈ လဵၵ်းယွၵ်းလဵၵ်းယႅၵ်း ၸဵမ်ၸိူဝ်း ၼႆႉ ၼႆယဝ်ႉ။